އިޒްރޭލް ޕާސްޕޯޓް މަނާކުރުމަކީ މި ސަރުކާރުގެ ޚާރިޖީ ސިޔާސަތުގެ ފަޚުރުވެރި ނިންމުމެއް ކަމަށް ރައީސުލްޖުމްހޫެރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ރައީސް އޮފީހުގައި މިއަދު ކުރިއައްދިޔަ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ. ރައީސް ވިދާޅުވި ގޮތުގައި މިއީ ފަލަސްތީނުގައި ހިންގަމުންދާ ޤަތުލުއާންމާއި ދެކޮޅަށް އަޑުއުފުލައި ފަލަސްތީނުގެ ރައްޔިތުންގެ ހައްޤުގައި ރާއްޖެއިން ނިންމި ފަހުރުވެރި ނިންމުމެކެވެ.
”އިސްރާއީލް ޕާސްޕޯޓް މަނާކުރުމަކީ ޚާރިޖީ ސިޔާސަތުގެ ފަހުރުވެރި ނިންމުމެއް. އެއީ އަޅުގަނޑުމެން ފަޚުރުވެރިކަމާއެކީ ނިންމި ނިންމުމެއް. ޖެނޮސައިޑްއެއް ހިނގަމުންދާ، އެ އެކްސެސިޓީތަކާ ދެކޮޅަށް ފަލަސްތީނު ރައްޔިތުންގެ ހައްޤުގައި، ދިވެހި ހުރިހާ ރައްޔިތުންގެ ފަރާތުން ސަރުކާރުން ނިންމި މުޙިއްމު ނިންމުމެއް އެއީ.“ ރައީސް ވިދާޅުވިއެވެ.
”ޖެނޮސައިޑެއް ހިންގަމުންދާއިރު އެ އެޓްރޯސިޓީސްތަކާ ދެކޮޅަށް ފަލަސްތީން ރައްޔިތުންގެ ހައްގުގަ ދިވެހި ހުރިހާ ރައްޔިތުންގެ ފަރާތުން ސަރުކާރުން ނިންމި މުހިއްމު ނިންމުމެއް މިއީ. އަޅުގަނޑުމެންގެ ޤައުމު ކުޑަވެދާނެ. އެހެންނަމަވެސް 100 އިންސައްތަ އިސްލާމީ ގައުމެއް، އަޅުގަނޑުމެން އެކަމާ ދެކޮޅުކަން އަޅުގަނޑުމެން ހާމަކުރީ. އެކަން އެގޮތުގަ ދެމިއޮންނާނެ. “ ރައީސުލްޖުމްހޫެރިއްޔާ ޑރ. މުހައްމަދު މުއިއްޒު“
އިޒްރޭލު ޕާސްޕޯޓުގައި ރާއްޖެއަށް އެތެރެ ނުވެވޭ ގޮތަށް އިމިގްރޭޝަން ގާނޫނަށް އިސްލާހު ގެންނަން ރައްޔިތުންގެ މަޖިލީހުން ފާސްކުރި ބިލު ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު ތަސްދީގު ކުރެއްވީ އޭޕްރީލް 15 ވަނަ ދުވަހު އެވެ.
އިޒްރޭލު ޕާސްޕޯޓުގައި ރާއްޖެ އެތެރެވުން މަނާކުރަން މަޖިލީހުން ފާސްކޮށްފައި މި ވަނީ އިޒްރޭލުން ޣައްޒާއަށް ދެމުންދާ ލާއިންސާނީ ހަމަލަތާ ގުޅިގެންނެވެ. އެ ހަމަލާތައް ވަގުތުން ހުއްޓުވައި ދިނުމަށް ރާއްޖޭން އަންނަނީ ދުނިޔެއަށް ގޮވާލަމުންނެވެ.
ސަރުކާރުން ދަނީ ބައިނަލްއަޤުވާމީ އެކި މަންސަތަކުގައި ފަލަސްޠީނުގެ އުޚުއްވަތްތެރި ރައްޔިތުންގެ ޙައްޤުގައި ގިނަ މަސައްކަތްތަކެއް ކުރައްވަމުންނެވެ. އިރުމަތީ ޤުދުސް ހިމެނޭގޮތަށް 1967 ވަނަ އަހަރުގެ ކުރިން އޮތް ބޯޑަރުތަކާ އެއްގޮތްވާގޮތުގެ މަތީން، ފަލަސްޠީނުގައި މިނިވަން ދައުލަތެއް ޤާއިމުކުރުމަށާއި އދ.ގެ ފުރިހަމަ މެންބަރުކަން ފަލަސްޠީނަށް ދިނުމަށްވެސް ރައީސް ވަނީ މީގެ ކުރިން އެތައް ފަހަރަކު ބައިނަލްއަޤްވާމީ މައިދާނުގައި ގޮވާލައްވާފަކަންފާހަގަކުރެވެއެވެ.
