މިނިސްޓަރ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓް ޑރ. ޢަލީ ޙައިދަރު އަޙްމަދު ބުދަ ދުވަހު އޮންނަ ރައްޔިތުންގެ މަޖިލީހުގެ ޖަލްސާއަށް ހާޒިރުކުރުމަށް އެޖެންޑާކޮށްފިއެވެ.
މިނިސްޓަރ ޙައިދަރު މަޖިލީހުގެ ޖަލްސާއަށް ހާޒިރުކުރަނީ ދަރިވަރުންގެ ކަންބޮޑުވުންތަކާ ގުޅޭގޮތުން ސުވާލުކުރެއްވުމަށެވެ.
ހިތަދޫ މެދު ދާއިރާގެ މެންބަރު އަޙްމަދު އަޒާން ވަނީ މިނިސްޓަރ ޙައިދަރާ ދެ ސުވާލެއް ކުރައްވާފައެވެ. މި ސުވާލުތަކަކީ ދަރިވަރުންނާއި ބެލެނިވެރިންގެ ފަރާތުން މެންބަރު އަޒާނާ ހިއްސާކޮށްފައިވާ ކަންބޮޑުވުންތަށްކަން ފާހަގަކޮށްލެވެއެވެ.
ފުރަތަމަ ސުވާލުގައި މެންބަރު އަޒާން ވަނީ މިނިސްޓްރީއަށް ދަރިވަރުން ފޮނުވާފައިވާ އީމެއިލް އަދި ސިޓީތަކަށް ޖަވާބުދިނުން ލަސްވާ މައްސަލައަށެވެ. މި ކަންބޮޑުވުމާ ގުޅިގެން، އެކަން ލަސްވަނީ ކީއްވެކަމާއި، އެކަން ހައްލުކުރުމަށް އަޅުއްވާފައިވާ އަދި އަޅުއްވަމުންގެންދަވާ ފިޔަވަޅުތަކަކީ ކޮބައިކަން ސާފުކޮށްދެއްވުމަށް ވަނީ އެދިވަޑައިގެންފައެވެ.
ދެވަނަ ސުވާލުގައި މެންބަރު އަޒާން ފާހަގަކުރައްވާފައިވަނީ ސްޓޫޑެންޓް ލޯނު އަދި ސްކޮލަރޝިޕްތަކުގައި ކިޔަވާ ދަރިވަރުންގެ ސްޓައިޕެންޑް ފައިސާ ޖަމާކުރުމާއި ދައްކަންޖެހޭ ޓިއުޝަން ފީތައް ދެއްކުން ލަސްވާ މައްސަލައެވެ. މިކަމާ ގުޅިގެން، މި ފައިސާތައް ދެއްކުން ލަސްވަނީ ކީއްވެކަމާއި، އެގޮތަށް ލަސްވުމަށް މެދުވެރިވާ ސަބަބު ނައްތާލުމަށް ކުރެވިފައިވާ މަސައްކަތަކީ ކޮބައިކަން ސާފުކޮށްދެއްވުމަށް ވަނީ އެދިވަޑައިގެންފައެވެ.
މި ދެ ސުވާލަށް ޖަވާބުދެއްވުމަށް މިނިސްޓަރ ޑރ. ޙައިދަރު ބުދަދުވަހު އޮންނަ މަޖިލީހުގެ ޖަލްސާއަށް ހާޒިރުވެވަޑައިގަންނަވަން ވަނީ އެޖެންޑާ ކޮށްފައެވެ.
އަންގާރަ ދުވަހުގެ މަޖިލިސް ޖަލްސާއަށް ބަލާލާއިރު ވަޒީރުން މަޖިލީހަށް ހާޒިރުނުކުރާ ކަމަށާއި ސަބަބެއް ނާންގާ މަޖިލީހުގެ ޖަލްސާތައް ކެންސަލްކުރާ ކަމަށް ވިދާޅުވެ، ކަންބޮޑުވުން ފާޅުކުރައްވައި މަޖިލީހަށް އެމްޑީޕީއަށް ނިސްބަތްވާ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމްވަނީ ޤަރާރެއް ހުށަހަޅުއްވާފަކަން ފާހަގަކޮށްލެވެއެވެ.
ވަޒީރުން ހާޒިރުނުކޮށް ލަސްކުރަނީ މަޖިލީހުގެ ރައީސް އަބްދުއްރަހީމް އަބްދުﷲ ކަމަށާއި އެ މަނިކުފާނު ގެންދަވަނީ ސަބަބެއް ނެތި ޖަލްސާތައް ނުބާއްވައި ކެންސަލްކުރަމުން ކަމަށް ވެސް މީކާއިލް ވަނީ ތުހުމަތުކުރައްވައިފައެވެ.
