އޭޕްރިލް 18 ވީ ހުކުރު ދުވަހު ފުރާޅެއްގެ މައްޗަށް ވެއްޓިފައި އޮއްވާ ފެނުނު ހައްވާ ޔުމްނު ރަޝީދުގެ މައްސަލައިގައި މިނިވަން އަދި އިންސާފުވެރި ތަޙުޤީޤެއް ކުރިއަށް ގެންދިއުމަށްޓަކައި ޓްރާންސްޕޯޓް މިނިސްޓަރު މުޙައްމަދު އަމީން ވަގުތުން ސަސްޕެންޑްކުރުމަށް ދިވެހިރައްޔިތުންގެ ޑިމޮކްރެޓިކް ޕާޓީ އެމްޑީޕީގެ ޕާލިމެންޓަރީ ގްރޫޕުން ގޮވާލައިފިއެވެ.
އެމްޑީޕީގެ ޕާލިމެންޓަރީ ގްރޫޕުން ނެރުނު ނޫސްބަޔާނެއްގައި ބުނެފައިވަނީ، މި ޙާދިޞާއާއި ގުޅޭ ތަޙުޤީޤަށް މިނިސްޓަރު އަމީން ނުފޫޒު ފޯރުވަމުންގެންދަވާކަމަށް ތުހުމަތުކުރެވޭ ކަމަށެވެ. އަދި މި މައްސަލައިގައި އިންސާފުވެރި ތަޙުޤީޤެއް ކުރިއަށް ނުދާ ކަމަށާއި، ޙާދިޞާގެ މަޢުލޫމާތު ސިއްރުކުރަމުންދަނީ މިކަމުގައި ޝާމިލްވާ ބައެއް ފަރާތްތަކަކީ ސަރުކާރުގެ ނުފޫޒުގަދަ ބައެއް ފަރާތްތަކާއި އެ ފަރާތްތަކާ ޢާއިލީގޮތުން ގުޅުންހުރި ބައެއްކަމަށް ތުހުމަތުކުރެވޭތީ ކަމަށް ބަޔާނުގައި ފާހަގަކޮށްފައިވެއެވެ.
އެމްޑީޕީން ބުނީ މި ޙާދިޞާއާއި ގުޅުންހުރި އެއް އިމާރާތަކީ މިނިސްޓަރު އަމީން ދިރިއުޅުއްވާ ގެ ކަމަށާއި، ހާދިސާގައި ޝާމިލްވާ ބައެއް ފަރާތްތަކަކީވެސް މިނިސްޓަރު އަމީންއާއި ޢާއިލީގޮތުން ގުޅުންހުރި ފަރާތްތަކެއް ކަމަށެވެ. މި ސަބަބުތަކަށްޓަކައި، ތަޙުޤީގަށް ނުފޫޒު ފޯރުވާކަމުގެ ތުހުމަތުތަކެއް މިނިސްޓަރު އަމީނަށް ރައްދުވެފައިވާ ކަމަށް ބަޔާނުގައި ފާހަގަކޮށްފައިވެއެވެ.
އެމްޑީޕީގެ ޕާލިމެންޓަރީ ގްރޫޕުން ނެރުނު ނޫސްބަޔާނުގައި ބުނެފައިވަނީ، މި މައްސަލައިގައި މިނިވަން އަދި އިންސާފުވެރި ތަޙުޤީޤެއް ކުރިއަށް ގެންދެވޭނީ މިނިސްޓަރު އަމީން މަޤާމުން ވަކިކޮށް ނުވަތަ ސަސްޕެންޑްކުރުމަށްފަހު ކަމަށް ދެކޭ ކަމަށެވެ. އެހެންކަމުން، މިނިސްޓަރު އަމީން މަޤާމުގެ މަސްއޫލިއްޔަތުން ވަގުތަށް އެކަހެރިކުރުމަށް ރައީސުލްޖުމްހޫރިއްޔާ މުޙައްމަދު މުޢިއްޒަށްް އެޕާޓީން ގޮވާލާފައިވެއެވެ.
ބުރާސްފަތިދުވަހު ޕޮލިހުން ބޭއްވި ނޫސްވެރިންގެ ބައްދަލުވުން ކުރިއަށްދިޔަ ވަގުތު މިނިސްޓަރު އަމީން ސީޕީއަށް ގުޅުއްވުމަކީ ތަހުޤީގަށް ނުފޫޒު ފޯރުވުމަށް ހިންގި އަމަލެއް ކަމުގައި ބެލުމުގެ ޖާގަ އޮތް ކަމަށް ވެސް އެމްޑީޕީން ބުނެފައިވެއެވެ.
މިނިސްޓަރު އަމީން އިތުރުފުޅު ހެއްދެވި ކަމަށް ތުހުމަތުކޮށް އެމްޑީޕީން ވަނީ، ރައްޔިތުންގެ ވިންދާ ގުޅިފައިވާ މިފަދަ މައްސަލައެއްގައި ރައްޔިތުންގެ އިތުބާރު ލިބިދާނެ ފަދަ އިންސާފުވެރި ތަހުގީގެއް ހިންގޭނީ މިނިސްޓަރު މަގާމުން ދުރުކޮށްގެން ނުވަތަ ސަސްޕެންޑުކޮށްގެން ކަމަށް ބުނެފައެވެ.
މި މައްސަލައާ ގުޅޭގޮތުން މިނިސްޓަރު އަމީން ވަނީ އެކްސްގައި ޕޯސްޓެއް ކުރައްވާފަކަން ފާހަގަކޮށްލެވެއެވެ. މިގޮތުން ތަޙުޤީޤަށް އެއްވެސް ނުފޫޒެއް ނުފޯރުވާ ކަމަށާއި، ފުލުހުންގެ އެއްވެސް ބޭފުޅަކަށް ނުވަތަ އެހެން ފަރާތަކަށްވެސް މިކަމުގައި ވަކިގޮތަކަށް ޢަމަލުކޮށްދިނުމަށް އެދި ގުޅާފައިނުވާނެ ކަމަށް މިނިސްޓަރ އަމީން ވިދާޅުވެފައެވެ.
