މޭޑޭގައި އިދިކޮޅު އެމްޑީޕީން މާލޭގައި ބޮޑު އެއްވުމެއް ބާއްވަން ނިންމައިފިއެވެ.
މި އެއްވުން ބާއްވަން ހަމަޖެހިފައިވަނީ އެ ރޭގެ 8:30 ގައި އާޓިފިޝަލް ބީޗު ސަރަޙައްދުގައެވެ.
މިކަމާ ގުޅޭގޮތުން މަޢުލޫމާތު ދެއްވަމުން އެމްޑީޕީން ހުކުރުދުވަހު ބޭއްވި ނޫސްވެރިންގެ ބައްދަލުވުމެއްގައި ރައްޔިތުންގެ މަޖިލީހުގެ އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވީ، ރައްޔިތުންގެ ހައްގުތައް ކަށަވަރު ސަރުކާރުން ކުރަން ހުރި ކަންތައްތަކަށް ވަކާލާތުކޮށް އަޑު އުފުލުމަކީ އެމްޑީޕީން އަބަދުވެސް ކުރާ ކަމެއް ކަމަށާއި މޭޑޭ ހަރަކާތުގެ ތެރެއިންވެސް އެކަން ކުރައްވާނެ ކަމަށެވެ.
އަދި ސަރުކާރު ޖަވާބުދާރީ ކުރުވުމަށް ކުރަންޖެހޭ ކަންކަން އެމްޑީޕީން ކުރަމުންދާނެ ކަމަށްވެސް ބިގޭ ވިދާޅުވުއެވެ.
ބިގޭ ވިދާޅުވީ، ރާއްޖޭގައި މިވަގުތު، އަސާސީ ދަތިކަމެއް ތަހަންމަލުކުރަން ނުޖެހޭ އެއްވެސް މީހަކު ނެތް ކަމަށާ، ގިނަ ބައެއްގެ ހައްގުތަކަށް ސަރުކާރުން އަރައިގެންފައިވާ ކަމަށެވެ.
މީގެ އިތުރުން ސިޔާސީ ނުފޫޒުގެ ސަބަބުން، ސަރުކާރާ ކުޑަކޮށްވެސް ޚިޔާލުތަފާތު މީހެއް ނަމަ، މިނިވަންކަމާއެކު ވަޒީފާގައި ހުރުމުގެ ފުރުސަތެއް މިހާރު ނެތް ކަމަށާ، ސިޔާސީ ބޭނުމަށްޓަކައި، އިގްތިޞާދުގައި ނެތް މިންވަރުން ވަޒީފާތައް ދެމުންދާ ކަމަށްވެސް ބިގޭ ވިދާޅުވިއެވެ.
މި އެއްވުމުގައި ވީހާ ވެސް ގިނަ ބަޔަކު ބައިވެރިވާން އެމްޑީޕީއިން އެދިފަވާއިރު އެ އެއްވުމުގައި ގިނަ އަދަދެއްގެ މަސައްކަތްތެރީން އަމަލީ ގޮތުން ބައިވެރިވާނެ ކަމަށް ވެސް އެމްޑީޕީން ބުނެއެވެ. މޭޑޭގެ އެއްވުންތައް އެކި އަހަރުތަކުގައި މީގެ ކުރިން ވެސް އެމްޑީޕީން ކުރިއަށް ގެންގޮސްފައިވާކަން ފާހަގަކޮށްލެވެއެވެ.
އެމްޑީޕީން މޭޑޭއާ ގުޅިގެން އެންމެ ވަރުގަދަ ހަރަކާތެއްބާއަވާފައިވަނީ ކުރީގެ ރައީސް ޔާމީންގެ ވެރިކަމުގައި 2015 ވަނަ އަހަރު އެވެ. އެ ހަރަކާތާ ގުޅިގެން އެމްޑީޕީއާއި އެ ޕާޓީއާއެކުގައި މަސައްކަތް ކުރި ބައެއް ފަރާތްތައް ޖަލަށް ވެސް ލިއެވެ.
’މޭއި ޑޭ‘ ގޮތުގައި ފާހަގަކުރަނީ މެއި މަހުގެ 1 ވަނަ ދުވަހެވެ މޭޑޭ އަކީ މަސައްކަތްތެރިންގެ ހައްޤުގައި ފާހަގަކުރަމުން އަންނަ ދުވަހެކެވެ.
