ތިލަދުންމަތީ އުތުރުބުރީ ދިއްދޫގައި ލޮނު އުފައްދާ ފެކްޓްރީ އެއް ހުޅުވައިފިއެވެ. މިފެކްޓްރީ ހުޅުވާ ދެއްވީ ދިއްދޫ ކައުންސިލްގެ ރައީސް ޢަބްދުﷲ ރަޝީދު އެވެ. ލޮނު ފެކްޓްރީގެ މަސައްކަތަށް ދިއްދޫ އިން 15،000 އަކަފޫޓުގެ ބިމެއް ދިގު މުއްދަތަކަށް ކުއްޔަށް ދޫކޮށްފައި ވެއެވެ. ފެކްޓްރީގައި ލޮނު އުފައްދަން ފަށާފައި ވަނީ ޓެސްޓުތައް ހެދުމަށް ފަހުގައެވެ. ޞިއްޚީ މިންގަޑަށް ފެތޭ ގޮތަށެވެ. މިފެކްޓްރީން ތިންވައްތަރެއްގެ ލޮނު ތައްޔާރު ކުރާނެ އެވެ. މިފެކްޓީ މަހަކު 12,000/-ރުފިޔާގެ ފައިދާއެއް ލިބޭނެ ކަމަށް ދިއްދޫ ކައުންސިލުން ވިދާޅުވެއެވެ.
ދިއްދޫ ކައުންސިލްގެ ރައީސް އަބްދުﷲ ރަޝީދު “ އެން ނިއުސް“ އަށް މައުލޫމާތު ދެއްވަމުން ވިދާޅުވީ ރާއްޖޭގައި މުޅިން އަލަށް ލޮނު އުފައްދާ ފެކްޓްރީއެއް ހުޅުވުގެން ދިއުމަކީ ކައުންސިލަށާއި ދިއްދޫގެ ރައްޔިތުންނަށް ލިބުނު ވަރަށް ބޮޑު އުފަލެއް ކަމަށެވެ. އަދި މިފެކްޓްރީގައި ރަށުގައި ވަޒީފާތައް އިތުރުވެގެން ދާނެ ކަމަށްވެސް ކައުންސިލް ރައީސް ވިދާޅުވިއެވެ. ދިއްދޫ ކައުންސިލުން މައުލޫމާތު ދެއްވާ ގޮތުގައި މިފެކްޓްރީ ޤާއިމުކޮށްފައިވަނީ ޖަޕާނުގެ ޓެންޕޭ ކުންފުންޏާ ގުޅިގެން ކަމަށާއި މިފެކްޓްރީން ތައްޔާރު ކުރާ ލޮނު ޖަޕާނަށް އެކްސްޕޯޓް ކުރާނެ ކަމަށާއި، އަދި ރާއްޖެގެ ބެއެއް ރިސޯޓްތަކަށް ވިއްކުމަށް ހަމަ ޖެހިފައި ވާކަމަށެވެ.
