އަނެއްކާވެސް އައްޑޫން ކަރަންޓު ކެނޑެން ފަށައިފި

އައްޑޫ ސިޓީގެ ގުޅިފައިވާ ރަށްތަކުން ކަރަންޓު ކެނޑޭ މައްސަލަ ހައްލުކުރުމަށް 1.8 މެގަވޮޓްގެ އިތުރު ޖަނަރޭޓަރެއް އެ ސިޓީއަށް ގެންގޮސް އޮޕަރޭޝަން ފެށިތާ ދެ ދުވަސް ފަހުން އަނެއްކާވެސް އައްޑޫން ކަރަންޓު ކެނޑެން ފަށައިފިއެވެ.

އައްޑޫ ސިޓީއަށް ދިމާވެފައިވާ ކަރަންޓު ކެނޑުމުގެ މައްސަލަ ހައްލުކުރުމަށް އިންޑިއާއިން ގެނައި، 1.8 މެގަވޮޓް ޖަނަރޭޓަރު ބޭނުންކުރަން ފަށާފައިވަނީ އަންގާރަދުވަހުއެވެ.

އަދި އައްޑޫގައި ހަލާކުވެފައި ހުރި 3 ޖަނަރޭޓަރުގެ ތެރެއިން 1 ޖަނަރޭޓަރު ހެދުމަށްފަހު އަންގާރަ ދުވަހުވަނީ ބޭނުންކުރަން ފަށާފައިވާކަމަށް ވެސް އޭނާ ވިދާޅުވިއެވެ

އައްޑޫގެ ޖަނަރޭޓަރުތަކަށް ދިމާވި މައްސަލައާއި ހެދި މި ރޯދަމަހު ވަރަށް ގިނައިން ކަރަންޓް ކަނޑަންޖެހުނެއެވެ. އެކަމާ ވަރަށް ބޮޑަށް ރައްޔިތުން ނުރުހުންވެސް ފާޅުކުރިއެވެ

ފެނަކައިން ދަނީ އައްޑޫގެ ކަރަންޓް މައްސަލަހައްލުކުރުމަށް މެދުކެނޑުމެއްނެތި މަސައްކަތް ކުރަމުންކަން ފާހަގަކޮށްލެވެއެވެ.

ރޯދަމަހުގެ ފުރަތަމަ ދުވަހު ކަރަންޓު މައްސަލަ ހައްލުވާނެކަމަށް ފެނަކައިން ބުނި ނަމަވެސް އެ ކަން ރޯދަމަހުގެ ފަހު ދިހަ ފެށުނުއިރު ވެސް ހައްލުނުވާކަމަށް ބުނެ ރައްޔިތުންގެ ފާޑުކިޔުމާއި ނުރުހުން ސަރުކާރަށާއި އައްޑޫއަށް ކަރަންޓުގެ ޚިދުމަތް ދޭ ފެނަކައަށް އަމާޒުވިއެވެ.

އައްޑޫއަށް ކުރިމަތިވެފައިވާ ކަރަންޓުގެ މައްސަލަ ހައްލުކުރުމަށް މިދިޔަ މާރޗް މަހުގެ 13ވަނަ ދުވަހު އައްޑޫއަށް އެއް މެގަވޮޓުގެ ޖެނެރޭޓަރު ސެޓެއް ގެންދިޔައެވެ. އެއަށްފަހު މިދިޔަ މަހުގެ 25ވަނަ ދުވަހު ވަނީ 1.8 މެގަވޮޓްގެ އިތުރު ޖަނަރޭޓަރެއް އައްޑޫއަށް ފޮނުވައިފައެވެ. އެ ޖަނަރޭޓަރު އޮޕަރޭޝަނަށް ގެނެސްފައި ވަނީ މިދިޔަ ހޯމަ ދުވަހުއެވެ.

މީޑިއާއަކަށް މައުލޫމާތު ދެއްވަމުން ސިޓީ ކައުންސިލްގެ މީޑިއާ އޮފިޝަލަކު ވިދާޅުވީ ބުދަދުހަހު ވެސް އައްޑޫގެ އެކި ހިސާބުތަކުން ކަރަންޓު ކެނޑުނު ކަމަށެވެ. އެގޮތުން ހިތަދޫ، ނޭޗާ ޕާކު ސަރަޙައްދުންނާއި، މަރަދޫ ފޭދޫން ވެސް ކަރަންޓު ކެނޑުނު ކަމަށް އޭނާ ވަނީ މައުލޫމާތު ދީފައެވެ.

ފެނަކައިން ބުނީ ކަރަންޓު ކެނޑިފައި ވަނީ އިންޖީނަކަށް ދިމާވި މައްސަލައަކާ ގުޅިގެންކަމަށެވެ.

ފެނަކައިންނާއި އައްޑޫ ސިޓީ ކައުންސިލުން ވެސް މީގެ ކުރިން ބުނި ގޮތުގައި އައްޑޫގެ ކަރަންޓުގެ މައްސަލަ ހައްލުކުރުމަށް ބޭނުންވަނީ 15 ކިލޯވޯޓްގެ ޖަނަރޭޓަރެވެ.

އައްޑޫ ސިޓީ ކައުންސިލާއި އެ ސިޓީއަށް ނިސްބަތްވެ ވަޑައިގަންނަވާ މަޖިލިސް މެންބަރުން ވެސް ދަނީ މި މައްސަލައިގައި ކަންބޮޑުވުން ފާޅުކޮށް، ފެނަކައިގެ އިހުމާލު އޮތްކަމުގެ ތުހުމަތު ކުރައްވަމުންނެވެ.

އެގޮތުން، އެ ސިޓީގެ ރަށްތަކުން އަސާސީ އާންމު ދިރިއުޅުމަށް ދަތިވާ ވަރަށް ކަރަންޓު ކެނޑޭތީ، މިދިޔަ މަހުގެ 10ވަނަ ދުވަހު ހިތަދޫ ދެކުނު ދާއިރާގެ އެމްޑީޕީގެ މެންބަރު އިބްރާހީމް ނާޒިލް މަޖިލީހަށް ކުއްލި މައްސަލައެއް ހުށަހެޅުއްވިއެވެ. އެ މައްސަލަ ބަލައިގަތުމަށް އެމްޑީޕީގެ 12 މެންބަރުންނާއި ޕީއެންސީއަށް ނިސްބަތްވާ ހިތަދޫ މެދު ދާއިރާގެ މެމްބަރު އަހުމަދު އަޒާން ވޯޓު ދެއްވި ނަމަވެސް، ޕީއެންސީގެ ސުޕަ މެޖޯރިޓީން ވަނީ އެ މައްސަލަ ބޭރުކޮށްލާފަކަންފާހަގަކޮށްލެވެއެވެ.

އައްޑޫއަކީ ރާއްޖޭގެ ދެވަނައަށް އެންމެ ބޮޑު އާބާދީއެވެ.