ކަރަންޓްގެ މައްސަލަ ހައްލުކުރުމަށް މިއަދު އާވިސްނުންތަކަށް ޖާގަ ދޭންޖެހޭކަމަށް އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެއެވެ.
އަތޮޅުތެރޭގެ ބައެއް ރަށްރަށުގައި ކަރަންޓް ކަނޑައިގެންދާ މައްސަލައަށް އިޝާރަތްކުރައްވައި އެމްޑީޕީގެ ޗެއާޕާސަން ފައްޔާޒް އެކްސްގައި ކުރެއްވި ޕޯސްޓެއްގައި ވިދާޅުވީ، ކަރަންޓްގެ މައްސަލަ ހައްލުކުރުމަށް މިހާރު ގެންގުޅެމުން އަންނަ ގޮތްތަކާމެދު ވިސްނައި، އައު ވިސްނުންތަކަށް ޖާގަދޭން ޖެހިފައިވާކަމަށެވެ. އެގޮތުން ކޮމިއުނިޓީ އަދި ޕްރައިވެޓް ސެކްޓަރގެ ބައިވެރިވުން އިތުރުކޮށް އިއާދަކުރަނިވި ހަކަތަ އާއި އެހެނިހެން އާ އީޖާދުތައް ހިމެނޭ ކަރަންޓު ގްރިޑެއް ބިނާކުރަން ޖެހޭކަމަށް ފައްޔާޒް އެކްސް ވިދާޅުވިއެވެ.
ފައްޔާޒް އިތުރަށް ވިދާޅުވީ ކަރަންޓްގެ ކަންކަން މެނޭޖްކުރުމުގެ އައު ގޮތްތައް ބޭނުން ކޮށް އެ މަގަށް ކަންކަން ފަހި ކުރުމަށް މިވަގުތު އަމަލުކުރަމުންދާ ހަކަތައާ ގުޅޭ ސިޔާސަތުތަކާއި ގަވާއިދުތަކާ މެދު އަލުން ވިސްނަން ޖެހޭކަމަށެވެ.
ފައްޔާޒް ވަނީ އައްޑޫސިޓީ ކަރަންޓް މައްސަލައަށް ސަރުކާރުން ދުރާލައި ތައްޔާރުވެވުނުނަމަ، ހައްލެއް ހޯދުނީސް ކަމަށް ވިދާޅުވެފައެވެ. އެގޮތުން ވޭތުވެ ދިޔަ ތަނގާއި ހުރިހާ ސަރުކާރުތަކަކުންވެސް ރޯދަމަހަށް ހާއްސަ ސަމާލުކަމެއްދީގެން ތައްޔާރީތައް ވަމުން އައިސްފައިވާކަން ފައްޔާޒު ފާހަގަކުރެއްވިއެވެ.
އައްޑޫސިޓީގެ ގުޅިފައިވާ ރައްތަކަށް ކަރަންޓް ކަނޑައިގެން ދިއުމުގެ މައްސަލަ ކުރިމަތިވެފައިވާއިރު، ފެނަކައިން ދަނީ އެ މައްސަލަ ހައްލުކުރުމަށް އައްޑޫސިޓީއަށް 1.8 މެގަވޮޓްގެ އިންޖީނެއް ގެންގޮސްގެން ކަރަންޓުގެ ހިދުމަތް ރަނގަޅުކުރުމަށް މަސައްކަތްކުރަމުންނެވެ. ފެނަކައިން މީގެ ކުރިން ބުނެފައިވަނީ ބުދަދުވަހުގެރޭގެ ވަގުތެއްގައި އިންޖީނު ހިފައިގެންދާ އުޅަނދު އައްޑޫސިޓީއަށް ބަނދަރުކުރާނޭ ކަމަށެވެ.
މި ރޯދަ މަސް ފެށުމުގެ ކުރިން ވެސް އައްޑޫގެ ގުޅިފައިވާ ރަށްތަކަށް ކަރަންޓުގެ ހިދުމަތްދޭ ޕަވާ ސްޓޭޝަންގެ ތިން އިންޖީނު މަސައްކަތެއް ނުކުރާކަން ފާހަގަކުރެވެއެވެ.
އައްޑޫގެ ކަރަންޓުގެ ޙާލަތު ކޮޅެއްގައި ނުޖެހުމުން ފެނަކަ ކޯޕަރޭޝަންގެ މެނޭޖިން ޑިރެކްޓަރު މޭޖާ (ރިޓަޔަޑް) މުހައްމަދު ނަޖާޙު އިސްތިއުފާ ދެއްވަން ހިތަދޫ މެދު ދާއިރާގެ މެމްބަރު އަޙުމަދު އަޒާން މިމަހުގެ 24 ވަނަ ދުވަހު ގޮވާލައްވާފައިވާކަން ފާހަގަކޮށްލެވެއެވެ.
