އައްޑޫގެ ކަރަންޓުގެ ޙާލަތު ކޮޅެއްގައި ނުޖެހުމުން ފެނަކަ ކޯޕަރޭޝަންގެ މެނޭޖިން ޑިރެކްޓަރު މޭޖާ (ރިޓަޔަޑް) މުހައްމަދު ނަޖާޙު އިސްތިއުފާ ދެއްވަން ހިތަދޫ މެދު ދާއިރާގެ މެމްބަރު އަޙުމަދު އަޒާން ގޮވާލައްވައިފިއެވެ.
އަޒާން މިހެން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.
މި ރޯދަ މަސް ފެށުމުގެ ކުރިން ވެސް އައްޑޫގެ ގުޅިފައިވާ ރަށްތަކަށް ކަރަންޓުގެ ހިދުމަތްދޭ ޕަވާ ސްޓޭޝަންގެ ތިން އިންޖީނު މަސައްކަތެއް ނުކުރާކަން ފާހަގަކުރެވެއެވެ.
އެހެންވެ ކަރަންޓުގެ މައްސަލަ ހައްލުކުރަން އެއް މެގަވޯޓުގެ ޖެނެރޭޓަރެއް ފޮނިވާފައިވަނިކޮށް އިތުރު އިންޖީނެއް ހަލާކުވެ އައްޑޫގައި ކަރަންޓު ކަނޑާ ވަގުތު ހޯމަ ދުވަހު ވަނީ އިތުރުކޮށްފައެވެ.
އެކަމާ ގުޅިގެން އަޒާން އެކްސްގައި ވިދާޅުވީ ރޯދައިގެ ކުރިން އައްޑޫގެ ކަރަންޓުގެ މައްސަލަ ހައްލުނުކުރެވިއްޖެނަމަ އިސްތިއުފާ ދެއްވާނެ ކަމަށް އެމްޑީ ނަޖާހު އޮތީ ވައުދުވެޑައިގެންފައި ކަމަށެވެ.
އަދި ރޯދަ މަސް ނިމެން ކުޑަތަންވީއިރު ވެސް މައްސަލަ ޙައްލުނުވާއިރު ވައުދާ އެއްގޮތަށް އެމްޑީ އިސްތިއުފާ ދެއްވުމުގެ ވަގުތު ޖެހިއްޖެކަމަށް އަޒާން ވިދާޅުވިއެވެ.
ފާއިތުވި ހަ މަސް ތެރޭގައި ވެސް 84 ދުވަހު ކަރަންޓު ކެނޑުނު. އެއީ ކޮންމެ ދެ ދުވަހަކުން އެއް ދުވަހުހެން. މިދިޔަ މަހުގެ 75 އިންސައްތަ ދުވަހު ކަރަންޓު ކެނޑުނުކަމަށް އަޒާން ވިދާޅުވިއެވެ..
މީގެ އިތުރުން އަޒާން ވިދާޅުވީ ކަރަންޓު ކެނޑޭތީ އައްޑޫގެ މީހުން ގެންގުޅޭ ކަރަންޓުގެ ސާމާނުވެސް ހަލާކުވެ އާންމު ދިރިއުޅުމަށް ބުރޫ އަރާފައިވާ ކަމަށެވެ. އެހެން ނަމަވެސް އައްޑޫގެ ރައްޔިތުން ދެއްކީ ކެތްތެރިކަން ކަމަށް އަޒާންވެސް އަޒާންގެ ޕޯސްޓްގައި ވިދާޅުވިއެވެ.
އައްޑޫގެ ކަރަންޓުގެ މައްސަލަ މައްސަލައަށް ހައްލެއް ނުލިބޭތީ އަޒާން ވަނީ މަޖިލިހުގެ މެމްބަރުން ފެނައިގެ އިސްވެރިންނާ ބައްދަލުކުރުމުގެ އިތުރުން މަޖިލިހަށް ކުއްލި މައްސަލައެއްވެސް ހުށަހަޅާފައެވެ.
ކަރަންޓު ކެނޑޭތީ އައްޑޫ ސިޓީގައި މުޒާހަރާތަކެއްވެސްކޮށްފައިވާކަން ފާހަކޮށްލެވެއެވެ. މިގޮތުން މި ރޯދަމަހުވެސް ވަނީ މުޒާހަރާތަކެއްކޮށްފައެވެ.
