ކުރިއަށް އޮތް ރޯދަމަހުގައިވެސް ރައްޔިތުންނަށް ފެނާއި ކަރަންޓު ބިލުން ޑިސްކައުންޓް ލިބިގެންދާނެ ކަމުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހާމަކުރައްވައިފިއެވެ.
ރައީސުލްޖުމްހޫރިއްޔާ މިކަން ހާމަކުރެއްވީ ދ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ކުޑަހުވަދޫ ރައްޔިތުންނާއި ބައްދަލުކުރެއްވުމަށް ބޭއްވެވި ޖަލްސާގައި ވާހަކަފުޅުދައްކަަވަމުންނެވެ.
މި ޖަލްސާގައި ވާހަކަފުޅު ދައްކަވަމުން، ސަރުކާރުގެ އެކި މަސައްކަތްތަކާ ގުޅޭގޮތުން ފެތުރެމުންދާ ދޮގު މައުލޫމާތުތަކަށް ރައީސް ޖަވާބު ދެއްވިއެވެ. ޚާއްޞަކޮށް ރަމަޟާން މަހަށް ރައްޔިތުންނަށް ހަދިޔާގެ ގޮތުގައި ދެވޭ މަސްދަޅު ކޭހާ ގުޅޭގޮތުން ހަޤީގަތާއި ޚިލާފު ވާހަކަތަކެއް ދެކެވެމުންދާކަން ފާހަގަކުރެއްވިއެވެ.
މަސްދަޅު ކޭހުގެ ވާހަކައަށް އިތުރަށް ބަލާއިރު، ބައެއް ފަރާތްތަކުން މަސްދަޅުގެ ބަރުދަން މަދުކޮށްފައިވާ ކަމަށާއި، ކަނޑަން އުނދަގޫވާގޮތަށް ކެޕް ނުލައި މަސްދަޅު ވިއްކަން ނެރެފައިވާކަމަށް ބުނެ ދޮގު ވާހަކަތަކެއް ފަތުރަމުންދާކަން ރައީސް ފާހަގަކުރެއްވިއެވެ. މިގޮތުން މިއަހަރުގެ ރަމަޟާންމަހަށް ރޯދަ ހަދިޔާގެ ގޮތުގައި ސަރުކާރުން މަސްދަޅުކޭސް ބަހަން ފެށުމާ ގުޅިގެން އިދިކޮޅު ފަރާތްތަކުންވަނީ އެކަމަށް ވަރަށްބޮޑަށް ފާޑުކިޔައި ވާހަކަތައް ދައްކަން ފަށާފައެވެ. އެގޮތުން ސަރުކާރުން ރައްޔިތުންނަށް މަސްދަޅުކޭސް ހަދިޔާގެ ގޮތުގައި ބަހަނީ، ކުރިއަށްއޮތް ރަމަޟާންމަހު ކަރަންޓް ބިލްތައް ބޮޑުކުރުމުގެ ނިޔަތުގައިކަން އިދިކޮޅަށް ނިސްބަތްވާ ބައެއް ފަރާތްތަކުން ވަނީ ބުނެފައެވެ.
އެކަމަށް ރައްދުދެއްވައި ރައީސް ވިދާޅުވީ، ސަރުކާރުން ރައްޔިތުންނަށް މަސްދަޅު ބަހަނީ ބިލްތައް ބޮޑުކުރުމުގެ ނިޔަތުގައި ނޫންކަމަށާއި، އެއީ ކުރިންވެސް ރައްޔިތުންނަށް ވީ ވައުދެއްކަމަށެވެ. ރައީސް ވިދާޅުވީ އެކަމާ ގުޅުވައިގެން ރައްޔިތުންނަށް އޮޅުވާލުމަށް ބައެއް ފަރާތްތަކުން ރައްޔިތުންނަށް އޮޅުވާލުމަށް ދޮގު ބުހުތާން ވާހަކަތަކެއް ދައްކަންމުންދާކަމަށެވެ. އެގޮތުން އެންމެ ފުރަތަމަ ދެއްކީ ރައްޔިތުންނަށް ހަދިޔާގެ ގޮތުގައި ބަހާ މަސްދަޅުން މަސް މަދުކޮށްފައި ބަހަންއުޅޭކަމުގެ ވާހަކަ ކަމަށާއި، ނަމަވެސް މިއަދު އެއީ ދޮގެއްކަން އެނގި ހާމަވެފައިވާކަމަށެވެ.
އަދި ސަރުކާރުން ރައްޔިތުންނަށް ދޭ ކޮންމެ ލުޔެއްގެ ބަދަލުގައި އެހެން ކަމަކުން އޭގެ އަގު ނަގާކަމަށް ބުނެ، މިހާރު ކަރަންޓު ބިލާ ގުޅުވައިގެން ވާހަކަތަކެއް ދައްކަމުންދާކަން ފާހަގަކުރެއްވިއެވެ.
ނަމަވެސް ކުރިން އިއުލާންކުރެއްވި ފަދައިން މި އަހަރުގެ ރަމަޟާން މަހުގައި ވެސް ފެނާއި ކަރަންޓު ބިލުން ޑިސްކައުންޓް ލިބޭނެކަން ރައީސް ޔަގީންކޮށްދެއްވިއެވެ.
ސަރުކާރަށް އަމާޒުކޮށް ފިތުނަވެރިކަން އުފެދޭފަދަ ގޮތަކަށް އެކި ބާވަތުގެ ވާހަކަތައް ފެތުރެމުންދާތީ، އެކަމާމެދު ރައީސް ވަނީ ކަންބޮޑުވުން ފާޅުކުރައްވާފައެވެ.
