ނުފޫޒާއި ބާރުގެ ބޭނުންކޮށްގެން ނާޖާއިޒުގޮތުގައި ޢާއްމު ފަރުދުންގެ މުދަލުންނާއި ދައުލަތުގެ މުދަލުން ތަނަވަސްކަން ހޯދުމަކީ ޙަރާމް ކަމެއް ކަމަށް މިއަދު ރާއްޖޭގެ މިސްކިތްތަކުގެ ކުރި ހުކުރު ނަމާދުގެ ޚުޠުބާގައި ވިދާޅުވެއްޖެއެވެ. މިއަދުގެ ޚުޠުބާގެ މަޢުޟޫޢު އަކީ ”ބާޠިލްގޮތުގައި މުދާ ކެއުން“ އެވެ. މިމަޢުޟޫގެ މައްޗަށް މިއަދު ރާއްޖޭގެ ހުރިހާ މިސްކިތްތަކެއްގައި ކުރި ހުކުރު ނަމާދުގެ ޚުތުބާގައި، މުދަލަކީ ﷲ ސުބުޙާނަޙޫ ވަތަޢާލާ އެކަލާންގެ އަޅުންނަށް ދެއްވާ ބޮޑު ނިޢުމަތެއް ކަމަށާއި، އަދި އެއީ އެކަލާންގެ އަޅުތަކުން އިމްތިޙާނު ކުރެއްވުމަށްޓަކައި ލައްވާފައިވާ ސަބަބެއް ކަމަށްވެސް ވިދާޅުވެފައި ވެއެވެ. އަދިވެސް މުދަލަކީ ދެމިޔަލީ ކަނޑިއެއް ކަމަށާއި އެއީ ބިނާ ކުރުމަށާއި ފަނާ ކުރުމަށް ބޭނުން ކުރެވި ދާނެ ވަސީލަތެއް ކަމަށާއި ، އިންސާނާ މުދާ ހަލާލު ގޮތުގައި ހޯދާ ހަލާލުގޮތުގައި ހޭދަކޮށްފިނަމަ އެއީ އޭނާ ބާއްޖަވެރިކަން ގެނެސްދޭނެ އެއްޗެއް ކަމަށް ވިދާޅުވެފައި ވެއެވެ.
މުދަލަކީ އިންސާނާގެ ހަޔާތުގެ މުހިއްމު އެއްޗަކަށް ވާއިރު އެއާ މެދު ނުހަނު ބޮޑަށް ރައްކާތެރިވާން ޖެހޭނެ އެއްޗެއްކަން ކަމަށާއި މުދަލަށް ރައްކާތެރި ނުވެއްޖެނަމަ ހެޔޮ މަގުން އިންސާނާ ކަސިޔާރު ވެދާނެ ކަމަށް ހުޠުބާގައި ފާހަގަ ކުރައްވާފައި ވެއެވެ. މިހެންވެ މުދަލުގެ ފިތުނައިން ރައްކާތެރި ވުމަށް ކީރިތި ރަސޫލާ އިރުޝާދު ދެއްވާފައި ވާކަން ޚުތުބާގައި ހަދާން ކޮށްދެއްވާފައި ވެއެވެ.
އިސްލާމްދީނުގައި މުދާ ހޯދުމަށާއި ހޭދަ ކުރުމަށް ހަރުދަނާ ނިޒާމެއް ލައްވާފައި ވާކަމަށާއި މީހުންގެ މުދަލަށް އަރައިގަތުން އިސްލާމް ދީނުގައި ހަރާމް ކުރައްވާފައިވާ ކަން ހުޠުބާގައި ވިދާޅުވިއެވެ. މުދަލަށް ޚިޔާނަތްތެރިވުމާއި މުދާ ފޭރުމާއި މުދަލުން ވައްކަން ކުރުމާއި ޓޭކުމާއި ރިޝްވަތުނެގުން ރިބާ ކެއުމާއި ޖުވާ ކުޅުން ފަދަ ކަންކަމުން މުދާ ހޯދުން އިސްލާމް ދީނުގައި މަނާ ކުރައްވާފައިވާ ކަން ޚުތުބާގައި ވިދާޅުވެފައި ވެއެވެ.
މިއަދުގެ ޚުތުބާގައި، ދައުލަތުގެ މުދަލަށް ޚިޔާނަތްތެރި ވުމުގެ ތެރޭގައި ރިޝަވަތު ނެގުން ވާކަން ވިދާޅުވެ، ރިޝްވަތު ނެގުމަކީ ވަރަށް ނުބައި ބައްޔެއް ކަމަށް ފާހަގަ ކުރައްވާފައި ވެއެވެ. އެއީ ކަންކަން ފާސިދު ކުރާ ވަބާއެއް ކަމަށާއި އަދި ހައްޤު ބާޠިލަށް ހަދާ އަދި ބާޠިލް ހައްޤުކަމަށް ފުރޮޅާ އާލަތެއް ކަމަށް ސިފަ ކުރައްވާފައި ވެއެވެ. ރިޝްވަތާ ބެހޭ ގޮތުން މިއަދުގެ ޚުތުބާގައި އިމާމު ވިދާޅުވި ރިޝްވަތަކީ ވަރަށް ތަފާތު ނަންނަމުގައި ވަރަށް ގިނަ ސިފަ ސިފާއިގައި މީހުން މަޅީގައި ޖެއްސުމަށާއި ބޭއިންސާފުން ކަންތައްތައް ކުރުވުމަށް ބޭނުން ކުރާ ތޫނު ހަތިޔާރެއް ކަމަށެވެ. ހަދިޔާ އެއް ނުވަތަ ސައެއް ނުވަތަ އެހެން ނަމެއްގައި ދިން ނަމަވެސް އެވަނީ ރިޝްވަތަށް ކަމަށާއި ދުނިޔެ މަތީގައި އޭގެ އުޤޫބާތުން ސަލާމަތްވި ނަމަވެސް އާޚިރަތުގެ އުޤޫބާތުން އެމީހާ ސަލާމަތް ނުވާނެ ކަން ކަށަވަރު ކަމަށް ޚުތުބާގައި ވިދާޅުވެފައި ވެއެވެ.
