މި އަހަރުގެ ތެރޭގައި ރާއްޖެއަށް ޒިޔާރަތްކުރި ފަތުރުވެރިންގެ އަދަދު ދެ މިލިއަނަށް އަރައިފިއެވެ.
މިއަހަރުގެ ތެރޭގައި ރާއްޖެއަށް ޒިޔާރަތްކުރި ދެ މިލިއަން ވަނަ ފަތުރުވެރިޔާ މިއަދު ހެނދުނު ރާއްޖެ އައިސްފައިވާއިރު، ޓޫރިޒަމް މިނިސްޓްރީ އާއި އެމްއޭސީއެލްގެ އިތުރުން އެމްއެމްޕީއާރުސީއާ ފަތުރުވެރިިކަމުގެ ސިނާއަތުގައި ހަރަކާތްތެރިވާ ފަރާތްތަކުން ވަނީ އެ ފަތުރުވެރިޔާއަށް މަރުހަބާކިޔާފައެވެ. މިކަމަށްޓަކައި ވެލާނާ އިންޓަރނޭޝަނަލް އެއާޕޯޓްގައި ހަފްލާއެއް ބާއްވާފައިވާއިރު، މި ހަފްލާ ޝަރަފްވެރިކޮށަްދެއްވީ ޓޫރިޒަމް މިނިސްޓަރު އިބްރާހީމް ފައިސަލް އެވެ.
މިގޮތުން ރާއްޖޭގެ ދެ މިލިއަންވަނަ ފަތުރުވެރިޔާއަކީ އޮސްޓްރިއާގެ އަންހެނެކެވެ. އޭނާ ޢާއިލާއާއެކު ރާއްޖެ އައި މިއަދު ހެނދުނު ޖެއްސި ޤަތަރު އެއާވޭސްގެ ކިޔުއާރު 670 ފްލައިޓުންނެވެ.
މި އަހަރުގެ ތެރޭގައި ރާއްޖެއަށް ދެ މިލިއަން ފަތުރުވެރިން ގެނައުމަކީ މި ސަރުކާރުގެ އަމާޒެކެވެ. މިކަން ހާސިލުކުރުމަށްޓަކައި ސަރުކާރުން ވަނީ ބޭރު ޤައުމުތަކުގައި ރާއްޖެ އިޝްތިހާރުކުރުމަށް ގިނަ މަސައްކަތްތަކެއް ކޮށްފަކަން ފާހަގަކޮށްލެވެއެވެ.
2025 ވަނަ އަހަރަށް ސަރުކާރުން އަމާޒު ހިފާފައިވަނީ ރާއްޖެއަށް 2.2 މިލިއަން ފަތުރުވެރިން ގެނައުމަށެވެ.
