ކްރިސްމަސް ފާހަގަކުރުމާއި އެފަދަ އިހްތިފާލުތަކުގައި ބައިވެރިވުމަކީ އިސްލާމްދީން ހުއްދަކުރާ ކަމެއް ނޫން ކަމަށް މިއަދު ރާއްޖޭގައި ކުރި ހުކުރު ނަމާދުގެ ޚުތުބާގައި ވިދާޅުވެއްޖެއެވެ. ހުކުރު ޚުތުބާގެ މިއަދުގެ މައުޟޫއުއަކީ ”ޣައިރު ދީންތަކުގެ ޝިއާރުތައް ފާޅުކުރުން“ މިއެވެ. މިއަދުގެ ޚުތުބާގައި ބުނެފައިވަނީ އަހަރެމެންގެ އިސްލާމްވަންތަކަމާއި ދީނީ ޝަހްސިއްޔަތު ދެމެހެއްޓުމަކީ އިސްލާމީ ޝަޢީރާގެ ތެރޭގައި ހިމެނޭ ކަމެއްކަމަށާއި ހުރިހާ ދަންނަ ބޭކަލުން އެއްބަސްވެވަޑައިގަންނަވާ ގޮތުގައި މުސްލިމުން އެއްވެސް ކަމެއްގައި ޣައިރު ދީންތަކުގެ މީހުންނާ އެއްގޮތަށް އުޅެގެންނެއް ނުވާނެކަމަށެވެ. “ އިލްމު ވެރިން ވިދާޅުވާ ގޮތުގައި ، މުސްލިމް ޣައިރު މުސްލިމުންގެ ދީނީ ޝިއާރުތަކަށް ތަބަޢަވުމަކީ ކަނޑައެޅިގެން ހަރާމް ކަމެކެވެ. އެއިގެ ތެރޭގައި އެމީހުންގެ ޢީދުތައް ފާހަގަ ކުރުމާއި އެކަމުގައި ބައިވެރިވެ ތަޙުނިޔާ ކިޔުން ހިމެނޭ ކަމަށް ޚުތުބާގައި ވިދާޅުވިއެވެ.
”އަޅުކަމުގެ ގޮތުން ކުރެވޭ ކަންކަމުގައި އެހެން ބަޔަކު ކޮޕީކުރުމަކީ ނުވަތަ އެހެން ބަޔަކާ އެއް ގޮތަށް އަމަލުކުރުމަކީ އިސްލާމީ އުންމަތުގެ ޝަހްސިއްޔަތު ފުނޑުފުނޑުވެ މި ދީނުގެ އަމިއްލަވަންތަކަން ގެއްލޭނެ ކަމެކެވެ. މުސްލިމުން ކްރިސްމަސް ފާހަގަކުރުމާއި މި އިހްތިފާލުތަކުގައި ބައިވެރިވުމަކީ އިސްލާމްދީން ހުއްދަކުރާ ކަމެއް ނޫނެވެ. ކްރިސްމަސްގަހާއި ސެންޓަ ކްލޯސް ފަދަ ނަޞާރާއިން އެ މީހުންގެ ދީނަށް ނިސްބަތްކޮށް ކުރާ ކަންތައްތައް މި ޢީދުގެ ތެރޭގައި ހިމެނެއެވެ.“ ޚުތުބާގައި ބުނެފައިވެއެވެ.
ޚުތުބާގައި އިތުރަށް ބުނެފައިވަނީ ޣައިރު މުސްލިމުންގެ އީދުތަކާއި އެއުރެންގެ އަގީދާއާ ގުޅިފައިވާ ކަންކަމުގައި ބައިވެރިވުން ހަރާމްވުމަކީ އެއުރެންނާ މެދު އިހްސާންތެރިވެ އަދުލުވެރި ނުވާންވީ ސަބަބެއް ނޫންކަމަށާއި ދީނާ އަޤީދާއާ ގުޅުންހުރި ކަންކަމަކީ ވަކި މައްސަލައެއްކަމަށެވެ. މުސްލިމުންނާއި ޣައިރު މުސްލިމުންގެ ގުޅުމުގެ އަސްލަކީ، އަނިޔާވެރި ނުވާހާ ހިނދެއްގައި ސުލުހަވެރި ކަމާއި އަދުލުވެރިކަން ބޭއްވުން ކަމަށާއި، ޣައިރު މުސްލިމުންނަށް ހެޔޮކޮށްހިތައި އިޙްސާންތެރިވެ އަދުލު ވެރިވުމަކީ މުސްލިމުންނަށް މާތްﷲ އަމުރު ކުރައްވާފައި ވާ ކަމެއް ކަމަށެވެ.
