ހުޅުމާލެ ހިޔާ 9ވަނަ ޓަވަރެއްގެ އެޕާޓްމަންޓެއްގައި ރަހީނުކޮށްފައި ހުރި މީހަކު ފުލުހުން ސަލާމަތްކޮށްފިއެވެ.
މަޢުލޫމާތު ލިބޭގޮތުގައި މީހަކު ރަހީނުކޮށްފައި ހުރީ ހިޔާ 9ވަނަ ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމަންޓްގައެވެ.
މިވަގުތު ފުލުހުން ދަނީ ހާދިސާ ހިނގި ތަނުގައި ހަރަކާތްތެރިވަމުންނެވެ. ފުލުހުން ވަނީ މިހާދިސާގައި ހައްޔަރުކޮށްފައި ހުރި މީހާ ސަލާމަތްކޮށް، އޭނާއަށް ހިމާޔަތްދީފައެވެ. އަދި އެކަމާ ގުޅޭ ތަހުގީގީ ކަންކަމުގައި ފުލުހުން ދަނީ އެ އެޕާޓްމަންޓާއި ޓަވަރުގައި ހަރަކާތްތެރިވަމުންނެވެ.
މަޢުލޫމާތު ލިބޭގޮތުގައި އެމީހާއަށް އެކި ކަހަލަ އަނިޔާތައް ދޭން ވަނީ މަސައްކަތްކޮށްފައެވެ. އެގޮތުން އެމީހާގެ އިސްތަށިގަނޑު ކޮށައި އަދި ހަށިގަނޑަށްވެސް އެކިވަރުގެ އަނިޔާތައް ދޭން މަސައްކަތް ކޮށްފައި ހުރިކަމަށް މަޢުލޫމާތު ލިބެއެވެ.
މިމައްސަލައާ ގުޅޭ އެއްވެސް މަޢުލޫމާތެއް މިހާތަނަށް ފުލުހުން ހާމަކޮށްފައެއް ނުވެއެވެ. ނަމަވެސް ރަހީނުކުރި މައްސަލައާއި ގުޅިގެން ބަޔަކު ހައްޔަރުކޮށްފައިވާކަމަށް ޕީއެސްއެމަށް ވަނީ މަޢުލޫމާތު ލިބިފައެވެ.
