ނ. އަތޮޅު ވިހަފަރުގައި އެއާޕޯޓެއް އެޅުމުގެ އަމަލީ މަސައްކަތް އަންނަ އަހަރުގެ ކުރީކޮޅު ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ހޮޅުދޫ ރައްޔިތުންނާ ބައްދަލުކުރެއްވުމަށް އެ ރަށުގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުންނެވެ. ރައީސް ވިދާޅުވީ، ހޮޅުދޫގެ އިތުރުން ނ. ވެލިދޫ، ނ.ފޮއްދޫ ހިމެނޭ ސަރަހައްދަށް ޑޮމެސްޓިކް އެއާޕޯޓެއް ވަރަށް މުހިންމު ކަމަށެވެ. އެއީ ގާތްގަނޑަކަށް 30 މިނެޓުން ދަތުރުކުރެވޭ ހިސާބުގައި އެއާޕޯޓެއް އޮތުމަކީ މިސަރުކާރުގެ ސިޔާސަތެއް ކަމުގައިވާތީ އެ ސިޔާސަތުގެ ދަށުން ތަރައްގީ ކުރާ އެއާޕޯޓެއް ކަމަށް އެމަނިކުފާނު ވިދާޅުވިއެވެ.
މި އަތޮޅަށް އިތުރު އެއާޕޯޓެއް، މިސަރަަހައްދުން ހޮޅުދޫ، ވެލިދޫ އަދި ފޮއްދޫ މި ސަރަހައްދަށް އެބަ ބޭނުންވޭ. އަޅުގަނޑުމެންގެ ސްޓޭންޑާޑްގަވެސް އިތުރު އެއާޕޯޓެއް އިތުރު ޑޮމެސްޓިކެއް އޮންނަ އެއާޕޯޓެއްް އޮންނަން އެބަޖެހޭ. އެއީ ގާތްގަނޑަކަށް 30 މިނެޓުން ދަތުރުކުރެވޭ ހިސާބުގައި އަޅުގަނޑުމެންގެ ސިޔާސަތަކީ އެއާޕޯޓްތައް ގާއިމްކުރެވިގެން ދިޔުން“ ރައީސް ވިދާޅުވިއެވެ.
ރައީސް ވިދާޅުވީ ވެލިދޫ ކައިރީގައި އޮންނަ ވިހަފަރުގައި އެއާޕޯޓެއް އެޅުމުގެ އަމަލީ މަސައްކަތް އަންނަ އަހަރުގެ ކުރީކޮޅުގައި ފެށުމަށް ނިންމާފައިވާ ކަމަށެވެ.
”އެހެންކަމުން ވެލިދޫ ކައިރީ އޮންނަ ވިހަފަރުގައި އެއާޕޯޓެއް އެޅުމުގެ އަމަލީ މަސައްކަތް މިއަންނަ އަހަަރުގެ ކުރީކޮޅު ފެށުމަށް އަޅުގަނޑު ނިންމާފައިކަން އިރާދަކުރެއްވިއްޔާ އެގޮތަށް އެކަން ފަށާނެކަން ތިބޭފުޅުންނަށް މިޖަލްސާގައި އަޅުގަނޑު އިއުލާން ކުރަން“ ރައީސް ވިދާޅުވިއެވެ.
މިހާރު ނ.އަތޮޅުގައި އެއަރޕޯޓް އޮންނަނީ މާފަރުގައެވެ. ފޮއްދޫ ހޮޅުދޫ އަދި ވެލިދޫ ން މާފަރު އެއާޕޯޓަށް ދިއުމަށް ދިގު ދަތުރެއް ކުރަން ޖެހެއެވެ. ވިހަފަރުގައި އެއާޕޯޓު އެޅުމަކީ މިތިންރަށުގެ ރައްޔިތުން އެދެމުން ދިޔަ ކަމެވެ. މިސަރަހައްދުގައި ފަތުރުވެރިކަން ފުޅާވަމުން ދާއިރު ކައިރި އެއާޕޯޓެއް އޮތުމަކީ މުހިއްމު ކަމެވެ. ވިހަފަރުގައި އެއާޕޯޓް އެޅުމަށް ސަރުކާރުން ނިންމެވުމުގެ ސަަބުން މިސަރަހައްދަށް އިތުރު ތަރައްޤީ އަންނާނެ ކަމަށް ޝުކުރުވެރި ކަމާއިއެކު ރައްޔިތުން ފާހަގަ ކުރެއެވެ.
