ވަޒީފާއާއި ބެހޭ ޓްރައިބިއުނަލްގެ މެންބަރު ފާތިމަތު ސައުސަން ނިޔާވެއްޖެއެވެ.
ވަޒީފާއާ ބެހޭ ޓްރައިބިއުނަލްގެ ނައިބު ރައީސް، އަހުމަދު މަމްދޫހް ކުރެއްވި ޕޯސްޓެއްގައި ވިދާޅުވީ ވަޒީފާއާ ބެހޭ ޓްރައިބިއުނަލްގެ އިންޑަސްޓްރިއަލް ރިލޭޝަން ޑިވިޝަންގެ މެމްބަރު ސައުސަން ކުއްލިގޮތަކަށް ނިޔާވެފައިވާ ކަމަށެވެ.
އެނގިފައިވާ ގޮތުގައި އޭނާ ނިޔާވެފައި ވަނީ އިންޑިއާއަށް ބޭސް ފަރުވާއަށް ގޮސް ހުއްޓާ މިއަދު ހެނދުނުގެ ވަގުތެއްގަ އެވެ.
ވަޒީފާއާ ބެހޭ ޓްރައިބިއުނަލަށް ސައުސަން އައްޔަންކުރެއްވީ އޭޕްރީލް، 2024 ގަ އެވެ.އޭނާ އެ މަގާމަށް އައްޔަންކުރެއްވީ އިންޑަސްޓްރިއަލް ޑިސްޕިއުޓް ރިޒޮލިއުޝަން ޑިވިޒްނަށް ހާއްސަ ކޮށްގެންނެވެ.
ގާނޫނީ ދާއިރާގައި ގިނަ ދުވަސްތަކެއް ވަންދެން ހިދުމަތް ކުރެއްވި ސައުސަންއަކީ، ގާނޫނީ ވަކީލެއްގެ ގޮތުންނާއި މެންބަރެއްގެ ގޮތުން ގައުމަށް އަގުހުރި ހިދުމަތްތަކެއް ކޮށްދެއްވާފައިވާ، ކަނބަލެކެވެ.
