ދިވެހިރާއްޖެ އިސްލާމްވިތާ ނުވަ ޤަރުނު (900 އަހަރު) ފުރުމުގެ މުނާސަބަތާ ގުޅުވައިގެން، މާލެ ސިޓީ ކައުންސިލްގެ އިސްލާމިކް އެންޑް ކަލްޗަރަލް އެފެއާޒް ކޮމެޓީއިން ރަންނަމާރު ވާހަކައިގެ ދިރާސާއެއް ހިމަނައިގެން ”ޚާއްޞަ ގޮފިކޮޅު“ ގެ ނަމުގައި ފޮތެއް އިއްޔެ ނެރެފިއެވެ.
މި ފޮތް ނެރެފައިވަނީ ރާއްޖެ އިސްލާމްވީދުވަސް ފާހަގަކުރުމުގެ ގޮތުން އިއްޔެ ހަވީރު ސަލްޓަން ޕާކުގައި ބޭއްވި ޚާއްޞަ ޕެނަލް ޑިސްކަޝަންގެ ތެރެއިންނެވެ. ބޭއްވި މި ރަސްމިއްޔާތުގައި މި ފޮތް ނެރެދެއްވީ މާލެ ސިޓީ ކައުންސިލްގެ ޑެޕިއުޓީ މޭޔަރ މީކާއީލް މުޙައްމަދު ރިޔާޟް އެވެ.
ސަލްޓަން ޕާކުގައި ކުރިއަށްދިޔަ މި ރަސްމިއްޔާތުގައި ސިޓީ ކައުންސިލްގެ އެކި ދާއިރާތަކުގެ ކައުންސިލަރުންނާއި، ކައުންސިލްގެ އިސްވެރިންގެ އިތުރުން ގިނަ ޢަދަދެއްގެ މުވައްޒަފުން ބައިވެރިވެފައިވެއެވެ..
ދިވެހިރާއްޖެ އިސްލާމްދީނުގެ ހިދާޔަތު ލިބިގަތީ ހިޖުރައިން 548 ވަނަ އަހަރުގެ ރަބީޢުލްއާޚިރު މަހުގެ ދެވަނަ ދުވަހުއެވެ. އެއީ މީލާދީ ސަނަތުން 1153 ވަނަ އަހަރެވެ. އިއްޔެއަކީ އެ މަތިވެރި ތާރީޚަށް 900 އަހަރު ފުރުނު މުހިންމު ދުވަހެވެ.
