އާންމުނަށްހުޅުވާލައިގެން ދިވެހި ފުލުހުންގެ ޚިދުމަތުގެ ދުވަސް ފާހަގަކުރުމުގެ ގޮތުން ބާއްވާ ހާއްސަ ”ޕޮލިސް ފެމިލީ ނައިޓް“ އަންނަ ހޮނިހިރު ދުވަހު ބާއްވަން ފުލުހުންގެ ޚިދުމަތުން ނިންމައިފިއެވެ.
ފުލުހުންގެ ޚިދުމަތުން ބުނީ، މިއަހަރުގެ ފުލުހުންގެ ޚިދުމަތުގެ ދުވަހުގެ ހަރަކާތްތަކުގެ ތެރެއިން ބާއްވާ ފެމިލީ ނައިޓަކީ، ސަގާފީ ނެށުންތަކާއި، ބޮޑުބެރުގެ އިތުރުން ތަފާތު މުނިފޫހިފިލުވުމުގެ އައިޓަމްތައް ހިމެނިގެން ދާނެކަމުގައެވެ. އަދި މަގުބޫލު ސަގާފީ ނެށުންތެރިޔާ ބާރަށު ޝިޔާމްގެ ފޯރިގަދަ ހުށަހެޅުންތަކެއް ފެނިގެންދާނެކަމަށެވެ. ސްޓޭޖުމަތީގައި ދައްކުވައިދޭ ފޯރީގެ ސަބަބުން ގިނަ ބައެއްގެ މަގުބޫލުކަން ހޯދާފައިވާ ބާރަށު ޝިޔާމަކީ މި ޝޯގެ އެންމެ މުހިންމު އެއް ފަންނާކަމަށް ވޭނަކަމުގައެވެ.
ފެމެލީ ނައިޓް ޝޯ އޮންނާނީ އަންނަ ހޮނިހިރު ދުވަހުގެ ރޭގަނޑު 8:30 އިން 11:00 އަށެވެ. މި ޝޯގައި ރާއްޖޭގެ މަޝްހޫރު ”ހަބޭސް ބޮޑުބެރު ގްރޫޕް“ އަދި ”އެމްއެންޔޫ ސްޓޫޑަންޓް ޔޫނިއަންގެ ބޮޑުބެރު ގްރޫޕް“ ގެ ހިތްގައިމު އަދި ފޯރިގަދަ ހުށަހެޅުންތައް ފެނިގެންދާނެއެވެ. މީގެއިތުރުން ދިވެހި ފުލުހުންގެ ޚިދުމަތުގެ އެކި ބަހާތަކުގެ މުވައްޒަފުން ތައްޔާރުކޮށްފައިވާ ހާއްސަ މުނިފޫހިފިލުވުމުގެ އައިޓަމްތައް ވެސް ސްޓޭޖުން ފެނިގެންދާނެއެވެ.
ފުލުހުންގެ މުވައްޒަފުންގެ ހުނަރުތަކާއި، ސަގާފީ ބޮޑުބެރު އެއްތަންވެގެންދާ މި ފެމިލީ ނައިޓް ވެގެންދާނީ ފުލުހުންގެ ބޮޑު އާއިލާގެ މެދުގައި އެކުވެރިކަމާއި އެއްބައިވަންތަކަން އާލާކޮށްދޭނެ ވަރަށް ކުލަގަދަ އަދި އުފާވެރި ހަފުލާއަކަށެވެ.
މި ފެމިލީ ނައިޓަކީ ފުލުހުންގެ ޚިދުމަތުގެ ދުވަސް ފާހަގަކުރުމަށް މާލޭގައި ކުރިއަށްގެންދާ ހަރަކާތްތަކުގެ ތެރޭގައި ހިމެނޭ މުހިންމު އެއް ހަރަކާތެވެ. އެގޮތުން، ހޮނިހިރު ދުވަހުގެ ހެނދުނު 6:00 ގައި ”އެކުވެރިކަމުގެ ހިނގާލުން“ ބޭއްވުމަށް ހަމަޖެހިފައިވާއިރު، ހަވީރު 4:00 އިން 6:00 އަށް އާންމުކޮށް ހުޅުވާލައިގެން ކުޑަކުދިންގެ ހަވީރެއް ވެސް ބޭއްވުމަށް ވަނީ ހަމަޖެހިފައެވެ. އަދި ފުލުހުންގެ ޚިދުމަތުގެ ދުވަހުގެ ރަސްމީ ޖަލްސާ ބޭއްވުމަށް ހަމަޖެހިފައިވަނީ ޖެހިގެން އަންނަ އާދީއްތަ ދުވަހުއެވެ.
