ހިތް ހެޔޮ ކަމާއި އޯގާތެރިކަމަކީ ޑޮކްޓަރެއްގެ އެންމެ މަޤުބޫލު އެއްސިފައެވެ. ބަލިމީހުންނަށް ބައްޔާގުޅޭ މައުލޫމާތު ސާފުކޮށްދިނުމަކީ ބަލިމީހުންގެ އިތުބާރު ޑޮކްޓަރަށް ލިބިގެންދާނެކަމެކެވެ. ރާއްޖޭގައި އަންހެނުންގެ ބަލިތަކަށް ފަރުވާދޭ ފިރިހެން ޑޮކްޓަރުން މަދެވެ. އަދި ޒަމާނީ ބަދަލުތަކާއި އެކު ދުނިޔޭ އެހެންބައްރުތަކުގައި ޞިއްޚީ ޚިދުމަތް ދެމުންދާ ޑޮކްޓަރުންގެ ތެރޭގައި އަންހެނުންގެ ބަލިތަކަށް ފަރުވާދޭ ފިރިހެން ޑޮކްޓަރުން މަދެއްނޫނެވެ. އަދި އަންހެނުންގެ ބަލިތަކަށް ޚާއްސަ ފިރިހެން ޑޮކްޓަރުންނަށް ދެއްކުންމަށް ރާއްޖޭގެ އަންހެނުންގެ މެދުގައި ކުރިން އޮތް ފަސްޖެހުމާއި އިތުބާރުގެ މިހާރު އަންނަނީ ބޮޑުތަނުން ބަދަލުވަމުންނެވެ.
މިހާ ހިސާބުން މިހިއްސާ ކޮށްލަނީ އަންނެހުންގެ ބަލިތަކަށް ޚާއްޞަ މިޞްރުގެ ފިރިހެން ޑޮކްޓަރު އަހުމަދު މުޙައްމަދު އަލީ، އައްޑޫ ސިޓީގައި 11 އަހަރު ޚިދުމަތުގެ ކުރުތަފްޞީލެވެ.
އަންނެހުންގެ ބަލިތަކަށް ފަރުދާ ދިނުމުގައި ބަލިމިހުންގެ އިހުތިރާމާއި ލޯތްބާއި އިތުބާރު ބަލިމީހުންގެ ފަރާތުން ދެމުގެންދާ އައްޑޫ ގައި މަޝްހޫރު މިޞްރުގެ ޑޮކްޓަރ އަހުމަދުގެ ޚިދުމަތުގެ ޞަފުހާއެއްގެ ހިއްސާކޮށްލާނަމެވެ. އައްޑޫ ރައްޔިތުންނަށް ޚާޢްސަކޮށް އައްޑު ކަނބަލުންނަށް، 11 އަހަރު އަންހެނުންގެ ބަލިތަކަށް ފަރުވާ ދެއްވި 16 އަހަރުދުވަހުގެ ތަޖުރިބާކާރު ޑޮކްޓަރު އަހުމަދަކީ:
މިޞްރުގައި މެޑިސިން ހެދުމަށްފަހު ، އޮބްސްޓެޓްރިކްސް އަދި ގައިނެކޮލޮޖީގައި މާސްޓަރސް ޑިގްރީ އާއި ސްޕެޝަލިސްޓް ތަމްރީނު ހާސިލުކޮށްފައިވާ ޑޮކްޓަރެކެވެ. މިޞްރުގެ ކައިރޯގެ މުހިންމު ބޮޑެތި ހޮސްޕިޓަލްތަކުގައި ތަމްރީނު ހޯދާ، އޮބްސްޓެޓްރިކްސް އަދި ގައިނެކޮލޮޖީގެ ތަފާތު ދާއިރާތަކުގައި ތަޖުރިބާ ވަނީ ހާސިލުކޮށްފައެވެ.
ރާއްޖެ އައުމުގެ ފުރުޞަތު ލިބުނީ ކިހިނެތްތޯ؟
މިސުވާލަށް ޖަވާބު ދެއްވަމުން ޑޮކްޓަރ އަހަމަދު ވިދާޅުވީ، ރާއްޖޭގައި ޚާއްޞަ ޑޮކްޓަރުން ބޭނުންވި ވަގުތެއްގައި، ޕްރޮފެޝަނަލް ރެކްރޫޓްމެންޓް މަގުން މި ފުރުޞަތު ލިބުނީ ކަމުގައެވެ. އިތުރަށް ޖަވާބުދެއްވަމުން ހިއްސާ ކުރެއްވީ، ފުރަތަމަ ވިސްނީ ކުޑަ އަހަރުތަގައި މަސައްކަތްކޮށްފައި އެނބުރި މިސްރަށް ދިޔުމަށެވެ. ނަމަވެސް ރާއްޖޭގެ މީހުންގެ ދެއްވި އިތުބާރާއި ކުރަމުންގެންދާ ގަދަރާއި އިހުތިރާމް އިން ރާއްޖޭގައި ދިގު މުއްދަތަކަށް މަޑުކުރުމަށް ހިތްވަރުލިބުނީކަމުގައެވެ.
ރާއްޖޭއަށް ފުރަތަމަ އާދެވުން ދުވަހު ކުރެވުނު އިހުސާސްއަކީ ކޮބައިތޯ؟
މިސުވާލުގެ ޖަވާބުގައި ޑޮކްޓަރު އަހުމަދު ވިދާޅުވީ، ރާއްޖެއަށް ފުރަތަމަ އައިދުވަހު، އެންމެފުރަތަމަ ވެސް ޑޮކްޓަރުގެ ލޮލަށް އެންމެ ފާހަގަވީ މި ޤައުމުގެ ޤުދުރަތީ ރީތިކަމެވެ. ނޫކަނޑާއި، ހުދު ދޮންވެލިއާއި، ޖަޒީރާތަކުގެ ރީތި މަންޒަރުތަކަކީ ފުރަތަމަ ދެކުނު އެންމެ އަޖައިބު ކުރުވެނެވި ތަންތަނެވެ. އެކަމަކު، އަދި އެއަށް ވުރެ ވެސް ބޮޑަށް ހިތަށް ލިބުނީ ރާއްޖޭގެ މީހުންގެ ލޯބިވެތިކަމާއި، އިޙްތިރާމާއި، އެހީތެރިކަމެވެ.
އައްޑޫސިޓީގައި ޚިދުމަތްކުރަން ފެށުނީ ކިހިނެތްތޯ؟
މިސުވާލުގެ ޖަވާބުގައި ޑޮކްޓަރު އަހުމަދު ވިދާޅުވީ، އައްޑޫ ސިޓީގައި ޚިދުމަތް ފެށީ ”ހިތަދޫ ރީޖަނަލް ހޮސްޕިޓަލް“ ގައި ފަހުން ”އައްޑޫ އިކުއޭޓޯރިއަލް ހޮސްޕިޓަލް“ ބަދަލުވި ހޮސްޕިޓަލަށް ކަމަށެވެ.
އަދި އައްޑޫގައި 11 އަހަރުގެ ދިގުމުއްދަތުގައި ކޮންސަލްޓަންޓް އޮބްސްޓެޓްރިޝަން އަދި ގައިނެކޮލޮޖިސްޓް ކަމުގައި އަދި ފަހުން ޑިޕާޓްމެންޓްގެ ހެޑް ކަމުގައި ޚިދުމަތް ކުރެއްވިކަމުގައެވެ. އެއީ ޑޮކްޓަރ އަހުމަދު ސިފަކުރެއްވި ގޮތުގައި، ޑޮކްޓަރުކަމުގެ ހަޔާތުގައި އެންމެހިތްހަމަ ޖެހުން ލިބުން ދުވަހުގެ ހަނދާނެއްގެ ގޮތުގައި އަބަދުވެސް ދެކޭކަމުގައެވެ.
11 އަހަރު ދުވަހުގެ ދިގުމުއްދަތުގައި ރާއްޖޭގައި ދިރިއުޅުމާއި ޚިދުމަތް ކުރުމުގެ ސިއްރަކީ ކޮބައިތޯ؟
މި ސުވާލުގައި ޖަވާބުގައި ޑރ. އަޙްމަދު ވިދާޅުވީ، ގިނަ މީހުން އޭނާ އާއި މި ސުވާލު ކުރާކަމުގައެވެ. އެ ސުވާލުގެ ޖަވާބަކީ، ކޮންމެ ފަހަރަކު އެހެން ޤައުމަކަށް ދިއުމަށް ވިސްނާއިރު، އަހަރެންގެ ހިތަށް އައީ އަހަރެންގެ ފަރުވާދެމުންގެންދާ ބަލިމީހުންނާމެދު ބިނާވި އިތުބާރާއި، ގުޅުންތަކެވެ. މެޑިސިން އަކީ ސައިންސް އެކަނި ނޫންކަމެވެ. އެއީ މީހުންނާއެކު ބިނާވާ އިތުބާރާއި ގުޅުންވެސް މެއެވެ. އެ ގުޅުންތަކަކީ ރާއްޖޭގައި ދިގު މުއްދަތަކަށް ހުރުމުގެ އެންމެ ބޮޑު ސަބަބެވެ.
އަންހެނުންގެ ބަލިތަކަށް ފިރިހެން ޑޮކްޓަރަކަށް ދެއްކުމަށް އަންހެނުން ފަސްޖެހޭތޯ؟
މިސުވާލަށް ޖަވާބު ދެއްވަމުން ޑރ. އަޙްމަދު ހިއްސާ ކުރެއްވި ގޮތުގައި ފުރަތަމަ ހާސްކަމެއް ނުވަތަ ލަދުގަންގޮތް ހުރެއެވެ. އެއީ ތަބީޢީ ކަމެކެވެ. އަދި އެ އިހުސާސްތަކަށް ޑޮކްޓަރ އިޙްތިރާމް ކުރާކަމަށެވެ. ނަމަވެސް ޑޮކްޓަރުގެ ވަޒީފާއަކީ އިލްމާއި، ތަޖުރިބާއާއި، އިހުތިރާމާއި ނަފުސުގެ އަޚްލާޤުން ބަލިމީހުންގެ އިތުބާރު ހޯދުމެވެ.
އިތުރަށް ވިދާޅުވީ، ގިނަ ކޮންސަލްޓޭޝަންތަކުގައި ސީދާބަލީގެ ސަރަހައްދު ބަލަން ނުޖެހޭކަމުގައެވެ. އަދި އެފަދަ ބަލިތައް ބަލަންޖެހޭ މަދުހާލަތްތަކުގައި އަންހެން އެސިސްޓަންޓެއް ހުންނާނެ، އަދި ބަލިމީހާގެ ޕްރައިވެސީ، އިއްޒަތް އަދި ބަލީގެ ހާލަތުގެ ސިއްރުތައް ހިފަހައްޓާކަމަށެވެ.
އިތުރަށް ވާހަކަދައްކަވަމުން، ޑޮކްޓަރ އަހުމަދު ވިދާޅުވީ، އަހަރެން އަބަދުވެސް ބުނާ ވާހަކައެއް އޮވެއެވެ. ހާޓް ސްޕެޝަލިސްޓަކަށް ހާޓް އެޓެކެއް ޖެހިފައިވާކަށް ނުޖެހޭނެ، އަދި ޕީޑިއެޓްރިޝަނަކު ކުއްޖަކަށްވާން ނުޖެހޭނެއެވެ. އެ ގޮތަށް، ގައިނެކޮލޮޖިސްޓަކުގެ މުހިންމު ކަމަކީ ޖިންސް ނޫން، އިލްމާއި، ތަޖުރިބާ އާއި ބަލިމީހާއަށް އިޙްތިރާމް ކުރުމެވެ.
ޑޮކްޓަރ ހިއްސާ ކުރެއްވިގޮތުގައި، ގިނައަހަރުތަކެއްގެ ތަޖުރިބާއަށް ފަހު، ގިނަ ބަލިމީހުން ފުރަތަމަ ވެގެންދިޔައީ އޭނާގެ ބަލިމީހުން ނަށްކަމަށެވެ. ދެން ބަދަލުވީ އެ އެންމެންގެ ޢާއިލާއަކަށެވެ. އަދި ރަހުމަތްތެރިންނަށެވެ.
ޢާއިލާއާއެކު ރާއްޖޭގައި ދިރިއުޅުމުން، ރާއްޖެއިން އެންމެ ޝައުގުވެރިކަމަށް ފެންނަނީ ކޮންކަމެއްތޯ؟
މިސުވާލަށް ޖަވާބުދެއްވަމުން ޑރ. އަޙްމަދު ވިދާޅުވީ، ރާއްޖެއަކީ އަހަރެންނާއި އަހަރެންގެ ޢާއިލާއަށް ދެވަނަ ގެއެއްފަދައެވެ. ރާއްޖޭގައި އަމާން ސަލާމަތްތެރި މާހައުލެއް އޮތްކަމަށެވެ. އިތުބާރުވެރި މުޖުތަމަޢު، އަދި މީހުންގެ ހިތްހެޔޮކަމާއި އިހުތިރާމް އަހަރެންނަށް ވަރަށް ކަމުދާކަމުގައެވެ. ރާއްޖެ މިއީ ޢާއިލާއާއެކު ދިރިއުޅުމަށް ރަނގަޅު ތަންކަމަށެވެ. ރާއްޖޭގައި އަހަރެންނަށް އަދި އަހަރެންގެ ޢާއިލާއަށް ދެމުންގެންދާ އިޙްތިރާމާއި މެހެމާންދާރީ، ލޯބި، އަހަރެން އަބަދުވެސް ޝުކުރުވެރިކަމާއެކު ހަނދާން ކުރާކަމުގައެވެ.
ރާއްޖޭގެ ސަގާފަތާއި މިޞްރުގެ ސަގާފަތް އަޅާބަލާއިރު، ފާހަގަކުރެވޭ ތަފާތާއި އެއްގޮތްކަންކަމަކީ ކޮބައިތޯ؟
ޖަވާބުގައި ޑރ. އަޙްމަދު ވިދާޅުވީ، މިޞްރާއި ރާއްޖެ އޮންނަނީ ވަރަށް ދުރުގައި ކަމަށެވެ. ދެ ޤައުމެއް ނަމަވެސް، ދެ ޤައުމުގެ މީހުންގެ އަސާސީ ދިރިއުޅުން ވަރަށް އެއްގޮތްކަމަށެވެ. ދެ ޤައުމުގައިވެސް ޢާއިލާއަށް ލޯތްބާއި ވަރަށް އަޅާލާކަމަށެވެ. އަދި ފަރުންގެމެދުގައި އެކަކު އަނެކަކަށް އިޙްތިރާމް ކުރޭ، އަދި މެހެމާނުން މަރުޙަބާ ކިޔާބައެއްކަމުގައެވެ.
ތަފާތަކީ، ރާއްޖޭގެ ޖަޒީރާ ރަށްތަކެއްކަމުން ޚާއްޞަ ފަރުވާ ހުރިހާ ވަކިވަކި ރަށަކަށް ފޯރުކޮށް ދިނުމަކީ ޗެލެންޖެއް ކަމަށެވެ. ނަމަވެސް، އެއީ ވެސް ޑޮކްޓަރަކަށް އަލަށް އުނގެނޭ ތަޖުރިބާތަކެއް ހޯދުމަށް ލިބޭ ފުރުޞަތެއްކަމަށެވެ.
ގިނަ އަހަރުތަކަށް ފަހުންވެސް، އަހަރެންގެ އުއްމީދަކީ ރާއްޖޭގެ އަންހެނުންނަށް އިތުރު ރަނގަޅު، ސައިންސްއަށް ބިނާކުރާ، އަދި އިތުބާރުވެރި ފަރުވާ ލިބިދިނުމެވެ.
ޑޮކްޓަރ އަހުމަދު ހިއްސާ ކުރެއްވިގޮތުގައި މިވަގުތު މާލެސީޓީގެ ކްލިކް ތަކުގައި ބަލިމީހުން ބައްވަލާކަން ހިއްސާ ކުރެއްވިއެވެ. އެގޮތުން Primax Medicareގައި އަންހެނުންގެ ޚާއްޞަ ބަލިތައް، ބައްލަވާކަށް ވިދާޅުވިއެވެ.
ނިންމާލަމުން ޑޮކްޓަރ އަހުމަދު ދެއްވި މެސެޖުގައި ވިދާޅުވީ، އަހަރެންގެ އެންމެ ބޮޑު އުއްމީދަކީ، ކޮންމެ ބަލިމީހަކީ އަހަރެންގެ ކުރިމަތީ އެމީހަކީ ”ނަމްބަރެއް“ ނޫންކަމަށެވެ. އެކަމަކު އެއީ ވަކި ވާހަކައެއް، ވަކި އުއްމީދެއް، އަދި ވަކި ދިރިއުޅުމެއް އޮތް މީހެއް ކަމަށް ދެކުމެވެ. އެއީ އަހަރެންގެ ޑޮކްޓަރުކަމުގެ ފަލްސަފާއެވެ.
