މިނިސްޓަރ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް މުޙައްމަދު ސަޢީދުގެ މައްޗަށް އިތުބާރު ނެތް ކަމުގެ މައްސަލައެއް އެމްޑީޕީގެ ޕާލަމެންޓަރީ ގްރޫޕުގެ ފަރާތުން ރައްޔިތުންގެ މަޖިލީހަށް މިއަދު ހުށަހަޅައިފިއެވެ.
އެމްޑީޕީން ސަޢީދުގެ މައްޗަށް ހުށަހެޅި މައްސަލައިގައި ހަ ކަމެއް ފާހަގަކޮށްފައިވެއެވެ.
ހުށައެޅި މައްސަލަތަކުގައި ތެރޭގައި، ޑޮލަރުގެ އަގު ކަޅުބާޒާރުގައި ހުއްޓުމެއްނެތި މައްޗަށްގޮސްތަކެތީގެ އަގު އިންތިހާއަށް އުފުލުން ، ދައުލުތުގެ މުދަލާއި ފައިސާ އަމާނަތްތެރިކަމާއި އެކުނުބެލެހެއްޓުން، ރައްޔިތުންގެ މަޖިލީހަށް ޖަވާބުދާރީ ވުމަށް ހުރަސްއެޅުން،އަމިއްލަ ވިޔަފާރިތައް ހިމާޔަތްކުރުމުގައި ފެއިލްވުން އިތުރުން ސްޕެޝަލް އިކޮނޮމިކް ޒޯނުގެ އެސްއީޒެޑް ޤާނޫނަށް ގެނައި އިސްލާހާއި ދައުލަތުގެ ސިޔާދަތައް އޮތް ނުރައްކާ ހިމެނެއެވެ.
ހުށަހެޅި މައްސލާގައި އިގުތިޞާދީ އިސްލާހުތައް ގެނައުމަށް އެދެވޭ އެއްވެސް ސިޔާސަތެއް ތަންފީޒުކޮށްފައި ނެތުމުގެ ސަބަބުން ޑޮލަރު ލިބުން ދަތިވެ، ކަޅު ބާޒާރުގައި ޑޮލަރުގެ އަގު 21 ރުފިޔާއަށް ވުރެ މައްޗަށް ގޮސްފައިވުން ހިމެނޭކަމަށްވަނީ ބަޔާންކޮށްފައެވެ. އަދި މައްސަލަ ހައްލުކުރަން އުޅުއްވުމުގެ ބަދަލުގައި އެއީ ޠަބީޢީކަމެއް ކަމަށް ވިދާޅުވެ،ވަޒީރު ސަޢީދު މި މައްސަލައިގެ ހައްސާސްކަން ކަނޑައިލައްވައިފައިވާ ކަމަށް އެ މައްސަލައިގައި އެމްޑީޕީން ވަނީ ބަޔާންކޮށްފައެވެ.
އިތުރު މައްސަލައެއްގެ ގޮތުގައި ފާހަގަކުރީ، ވަޒީރު ސަޢީދު ދައުލަތުގެ މުދަލާއި ފައިސާ އަމާނާތްތެރިކަމާއެކު ބަލަހައްޓައިފައި ނުވާ ކަމަށެވެ. އެގޮތުން ދައުލަތުގެ މާލީ ހާލަތު ގޯސް ދަނޑިވަޅެއްގައި ރާއްޖޭން ބޭރުގައި ބޭއްވި އިންވެސްޓަރު ފޯރަމްތަކަށާއި މަޝްރޫއުތައް އިފުތިތާހުކުރުމުގެ ރަސްމިއްޔާތު ތަކަށް ދައުލަތުގެ ގިނަ އަދަދެއްގެ ފައިސާއާއި ވަސީލަތްތައް ބޭނުންކޮށްފައިވާ ކަމަށް، މައްސަލައިގައި ވެއެވެ.
އިތުރަށް މައްސަލާގައިވަނީ، އަދިވެސް ހިންގަން ނުފެށޭ ޑިވެލޮޕްމެންޓް ބޭންކުގެ ވާހަކަ އަދި އެ ބޭންކުގެ ޚިދުމަތްތައް ނުފެށި މިދިޔަ އަހަރުގެ މާރިޗު މަހުގެ ނިޔަލަށް 6.56 މިލިއަން ރުފިޔާ އެ ބޭންކަށް ޚަރަދުކޮށްފައިވާ ކަމަށެވެ.
ވަޒީރު ސަޢިދުގެ އިތުބާރުނެތް މައްސަލާގައި ސޮއިކުރައްވާފައިވަނީ، ރައްޔިތުންގެ މަޖިލީހުގައި ތިއްބަވާ އެމްޑީޕީގެ 13 މެންބަރުން ނެވެ. އެއީ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް، ވައިކަރަދޫ ދާއިރާގެ މެންބަރު ހުސެއިން ޒިޔާދު، މަރަދޫ ދާއިރާގެ މެންބަރު އަޙުމަދު ދީދީ ، ގަލޮޅު ދެކުނުދާއިރާގެ މެންބަރު މީކާއިލް އަޙުމަދު ނަސީމް، ހުޅުމާލެ ދެނުކުދާއިރާގެ މެންބަރު ޑޮކްޓަރ އަޙުމަދު ޝަމްހީދު، ކަނޑިތީމު ދާއިރާގެ މެންބަރު އަމީން ފައިޝަލް، ހަނިމާދޫ ދާއިރާގެ މެންބަރު ޢަބްދުލް ޢަފޫރު މޫސާ، ތޮއްޑޫ ދާއިރާގެ މެންބަރު ޙުސައިން ސަމީރު ، ކެންދޫ ދާއިރާގެ މެންބަރު މަޢޫރޫފް ޛާކިރު، މާވަށު ދާއިރާގެ މެންބަރު އަޙުމަދު ޝާކިރު، ކެޔޮދޫ ދާއިރާގެ މެންބަރު މުހައްމަދު ނިއުޝާދު ގެ އިތުރުން ހިތަދޫ އުތުރު ދާއިރާގެ މެންބަރު ޢަބްދުﷲ ޞާދިޤު، ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް އެވެ.
