ރާއްޖޭގެ ފަސް ރަށެއްގައި އިސްލާމީ މަރުކަޒުތަކާއި، މިސްކިތް އަދި ޤުރުއާނާ ބެހޭ މަރުކަޒުތައް ބިނާކުރުމުގެ މުހިންމު މަޝްރޫޢުތަކެއް ސަރުކާރުން ބަޔަކާ ހަވާލުކޮށްފިއެވެ.
އިސްލާމީ މަރުކަޒުތައް ތަރައްޤީކުރުން މި މަޝްރޫޢުގެ ދަށުން ތިން ރަށެއްގައި އިސްލާމީ މަރުކަޒު ބިނާކުރުމަށް ވަނީ ހަމަޖެހިފައެވެ. އެގޮތުން ޅ. ނައިފަރުގައި 1,000 މީހުންގެ ޖާގައިގެ މިސްކިތަކާއެކު ބިނާކުރާ އިސްލާމީ މަރުކަޒުގެ މަސައްކަތް ހަވާލުކޮށްފައިވަނީ ސެންޓްރަލް ލައިން ޕްރައިވެޓް ލިމިޓެޑާއެވެ. މި މަރުކަޒުގައި އަންހެނުންނަށް ނަމާދުކުރެވޭނެ ޚާއްޞަ ބައެއްގެ އިތުރުން ކްލާސްރޫމް، ލައިބްރަރީ އަދި ކޮންވެންޝަން ހޯލެއް ހިމެނޭނެއެވެ.
ހއ. އިހަވަންދޫގައި 700 މީހުންގެ ޖާގައިގެ މިސްކިތަކާއެކު ތަރައްޤީކުރާ މަރުކަޒު ފީޑޯ ޕްރައިވެޓް ލިމިޓެޑާ ހަވާލުކޮށްފައިވާއިރު، ގއ. ވިލިނގިލީގައި 700 މީހުންގެ ޖާގައިގެ އިސްލާމީ މަރުކަޒެއް ބިނާކުރުމަށް ހަވާލުކޮށްފައިވަނީ ކޭ އެންޑް އެފް ހޯލްޑިންގްސްއާއެވެ. މި މަރުކަޒުތަކަކީ ތަޢުލީމީ އަދި އިޖުތިމާޢީ ކަންކަމަށް ޚާއްޞަ ވަސީލަތްތައް ހިމެނޭ ގޮތަށް ފަރުމާކުރެވިފައިވާ ތަންތަނެވެ.
ޤުރުއާން ސެންޓަރާއި މިސްކިތްތައް އިސްލާމީ މަރުކަޒުތަކުގެ އިތުރުން، ގއ. ވިލިނގިލީގައި ޤުރުއާނާ ބެހޭ މަރުކަޒެއް ބިނާކުރުމަށް އަފާމީ މޯލްޑިވްސްއާ ވަނީ ހަވާލުކޮށްފައެވެ. މި ސެންޓަރުގައި ކްލާސްރޫމްތަކާއި ހިފްޒު ކުރާނެ ޚާއްޞަ ކޮޓަރިތައް ހިމެނޭނެއެވެ. މީގެ އިތުރުން، ކ. ގުޅީގައި 500 މީހުންގެ ޖާގައިގެ އައު މިސްކިތެއް އެޅުމަށްވެސް ވަނީ ސޮއިކޮށްފައެވެ. މި މިސްކިތަކީ ކްލާސްރޫމާއި ލައިބްރަރީ ހިމެނޭގޮތަށް، އަންހެނުންނަށްވެސް ނަމާދުކުރެވޭނެ އިންތިޒާމުތަކާއެކު ބިނާކުރާ ތަނެކެވެ.
އިސްލާމިކް މިނިސްޓްރީން ހާމަކުރި ގޮތުގައި، ދީނީ ދާއިރާގެ ޢުމްރާނީ ތަރައްޤީއަށް ގިނަ މަސައްކަތްތަކެއް ދަނީ ކުރެވެމުންނެވެ. އެގޮތުން ކުރިއަށް އޮތް ބަރަކާތްތެރި ރަމަޟާން މަސް ފެށުމުގެ ކުރިން، ރާއްޖޭގެ އެކި ހިސާބުތަކުން ޖުމުލަ 15 މިސްކިތެއްގެ މަސައްކަތް ނިންމާ، ނަމާދުކުރަން ހުޅުވާލުމަށް އަމާޒު ހިފާފައިވާ ކަމަށް އެ މިނިސްޓްރީން ބުންޏެެވެ.
