ރާއްޖޭގެ ގައުމީ އެއާލައިން، މޯލްޑިވިއަންގެ ސީޕްލޭން ދަތުރުތައް އަންނަ ފެބްރުއަރީ މަހު އއ. ތޮއްޑޫއަށް ފަށަން ތައްޔާރު ވެއްޖެއެވެ.
މޯލްޑިވިއަން އިން ވިދާޅުވީ، އެ އެއާލައިންގެ ސީޕްލޭންގެ ޝެޑިއުލް ދަތުރުތައް ތޮއްޑޫއަށް ފަށަން ހަމަ ޖެހިފައި ވަނީ އަންނަ ފެބްރުއަރީ 12ގައި ކަމަށެވެ.
އަދި މި ހިދުމަތް ފަށަނީ ރާއްޖޭގެ ފަތުރުވެރިކަމުގެ ޑިމާންޑް އިތުރުވަމުންދާތީ، އަދި ރަށްރަށުގެ މެދުގައި އޮންނަ ގުޅުންތައް އިތުރަށް ބަދަހިކުރުމަށާއި، ސަރަހައްދީ ތަރައްގީއަށް ސަރުކާރުން ކުރަމުންދާ މަސައްކަތްތަކުގެ ތެރެއިން ކަމަށައި އަދި މި ހިދުމަތް ފެށުމާއެކު ރަށުގެ ފަތުރުވެރިކަން އިތުރަށް ފުޅާވެގެން ދާނެ ކަަމަށް އުއްމީދު ކުރެވޭ ކަމަށްވެސް މޯލްޑިވިއަން އިން ވިދާޅުވިއެވެ.
މިހާރު ޝެޑިއުލްވާގޮތުން ތޮއްޑޫއަށް ފެބްރުއަރީ 12 ވަނަ ދުވަހުން ފެށިގެން ސީޕްލޭން ދަތުރުތައް ކޮންމެ ހަފްތާއެއްގެ ބުރާސްފަތި އަދި ހޮނިހިރު ދުވަހު ދަތުރު ކުރަން ހަމަ ޖެހިފައި ވެއެވެ.
ތޮއްޑޫގެ ގެސްޓްހައުސް ސިނާއަތާއި ރަށު ފަތުރުވެރިކަމުގެ ދާއިރާ ވަރަށް ބޮޑަށް ކުރިއަރަމުން އަންނައިރު، ސީޕްލޭންގެ ހިދުމަތް ފެށުމާއެކު ރަށުގެ ގެސްޓްހައުސް ހިންގާ ފަރާތްތަކާއި ކުދި ވިޔަފާރިތަކަށް އިތުރު ކުރިއެރުން ލިބިގެންދާނެ ކަމަށް މޯލްޑިވިއަން އިން ވިދާޅުވިއެވެ. އަދި ފަތުރުވެރިކަމުގެ ދާއިރާއިން ކުރާ އިގްތިސާދީ ހަރަކާތްތަކަށް އިތުރު ކުރިއެރުމެއް ލިބިގެންދާނެ ކަމަށް ވެސް ވިދާޅުވިއެވެ.
