ދ.އަތޮޅު ބަނޑިދޫ ފަޅުގައި ހަމަސް ދުވަހަށް ވުރެގިނަ ދުވަހު އޮތް މުށިމަސްގަނޑު މަރުވާން ފަށައިފިއެވެ. ބަނޑިދޫ ކައުންސިލުން ”އެން ނިއުސް“ އަށް މައުލޫމާތު ދެއްވަމުން ކައުންސިލްގެ ސެކްޓްރީ ޖެނަރަލް ( އެސްޖީ ) ޢާރިފު މޫސާ ވިދާޅުވީ ބަނޑިދޫ ފަޅުގައި މުށިމަސް ގަނޑެއް އޮންނަ ތާ ގާތްގަޑަކަށް 6މަސްވެއްޖެ ކަމަށާއި، ކޮންމެ ދުވަހަކު އިރު އޮއްސުމުން ފަޅުތެރެއިން މަސްގަނޑު ނުކުންނަ ކަމަށެވެ. އޭނާ ފާހަގަ ކުރި ގޮތުގައި އަނެއް ދުވަހު ހެނދުނު މަސްތައް ފަޅަށް އަލުން ވަންނަ ކަމަށެވެ. މިދިޔަ އާދިއްތަ ދުވަހު އިރުއޮއްސުނު ފަހުން މަސްތައް މަރުވާކަން ފާހަގަ ކުރެވުނު ކަމަށެވެ. އެސްޖީ އިތުރަށް ވިދާޅުވީ މުށިމަހާ އެކު ފަޅުގައި އުޅޭ އެހެނިހެން މަސްމަހާ މެހިވެސް މަރުވެފައި ވާކަމަށެވެ. ގާތްގަޑަކަށް ލައްކައެއްހާ މަސް މަރުވިކަން އޭނާ މައުލޫމާތު ދެއްވިއެވެ. މަސްތައް މަރުވާން ދިމާވި ސަބަބެއް ނޭގެ ކަމަށާއި އަދި މަރުވި މަސްތައް ނަގާ ފަޅުތެރެ ސާފު ކުރުމުގެ މަސައްކަތް ކައުންސިލާއި ރަށުގެ މުއައްސަސާތަކާއި ރައްޔިތުން ކޮށްފައިވާ ކަމަށް އެސްޖީ ބުނުއްވިއެވެ.
