ވަކި މީހެއްގެ ނުފޫޒަށް ތަބާވެގެން ކަންކަން ނުކުރައްވާނެ ކަމަށް އެމްޑީޕީގެ ވަގުތީ ޗެއާޕާސަން އަދި ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ (ގަޕޯ) ވިދާޅުވެއްޖެ އެވެ.
އެމްޑީޕީގެ ޗެއާޕާސަންގެ މަގާމު ހުސްވީ އެ މަގާމުގައި ހުންނެވި ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް މިދިޔަ މަހުގެ 23 ވަނަ ދުވަހު އިސްތިއުފާ ދެއްވުމުންނެވެ. އެމްޑީޕީން ރޭ ބޭއްވި ގައުމީ މަޖިލީހުގެ ޖަލްސާގައި ވަނީ ވަގުތީ ޗެއާޕާސަންގެ މަގާމަށް ޣަފޫރު އިންތިހާބުކުރަން 65 މެމްބަރުންގެ ވޯޓާއެކު ފާސްކޮށްފަ އެވެ.
ރޭގެ ޖަލްސާ ނިންމަވާލައްވަމުން ޣަފޫރު ވިދާޅުވީ އެމްޑީޕީގެ ވަގުތީ ޗެއާޕާސަންގެ މަގާމު އަދާކުރަމުންދާނީ ޕާޓީގެ އަސާސީ ގަވާއިދާއި އުސޫލާއި ހަމައިގެ ތެރެއިން ކަމަށާއި އެ ނޫން ގޮތަކަށް އެއްވެސް ކަމެއް ނުކުރައްވާނެ ކަމަށެވެ.
”އަޅުގަނޑަކީ ވަކި މީހަކަށް ވަކި ގޮތެއް ހަދަން، ވަކި މީހެއްގެ ނުފޫޒަށް ތަބާވެގެނެއް ކަން ކުރާނެ މީހެއް ނޫން އަޅުގަނޑަކީ. އެ ޔަގީންކަން ތި އެންމެ ބޭފުޅުންނަށް އަޅުގަނޑު އަރުވަން،“ ޣަފޫރު ވިދާޅުވި އެވެ.
ގައުމީ މަޖިލީހުގެ ރޭގެ ޖަލްސާގައި ވަނީ އެމްޑީޕީއަށް ޗެއާޕާސަނަކު ހޮވުމަށް ބާއްވާ އިންތިހާބު ކުރިއަށް އޮތް ލޯކަލް ކައުންސިލް އިންތިހާބަށް ފަހު ބޭއްވުމަށް ވެސް ފާސްކޮށްފަ އެވެ.
އެމްޑީޕީގެ ވަގުތީ ޗެއާޕާސަން ކަމަށް ޣަފޫރު އިންތިހާބުކޮށްފައިވާއިރު، އެމްޑީޕީ ތެރޭގައި ކުރީގެ ރައީސް މުހައްމަދު ނަޝީދާއި ކުރީގެ ރައީސް އިބްރާހިމް މުހައްމަދު ސޯލިހުގެ ފެކްޝަނެއް އުފެދި، ޕާޓީ ވަނީ ބައިބައިވެފަ އެވެ.
