ހއ.އަތޮޅު ހޮސްޕިޓަލުގައި ސީޓީއާއި މެމޮގްރަފީގެ ޚިދުމަތް ފެށުމަށް ބޭނުންވާ ޢިމާރާތުގެ މަސައްކަތާއި، ރ.ދުވާފަރު ސިއްޙީ މަރުކަޒު ހޮސްޕިޓަލް ފެންވަރަށް އަޕްގްރޭޑުކުރުމަށް އިތުރުކުރާ ޢިމާރާތުގެ މަސައްކަތް، ދެ ކުންފުންޏަކާ ހަވާލުކޮށްފިއެވެ.
ހއ.އަތޮޅު ހޮސްޕިޓަލުގައި ސީޓީއާއި މެމޮގްރަފީއާއި އެކްސްރޭގެ ޚިދުމަތް ފެށުމަށް ބޭނުންވާ ޖާގައިތުރުކުރުމުގެ މަސައްކަތް ހަވާލުކުރެވުނީ ޕާފެކްޓް މަލަފެހި މޯލްޑިވްސް ޕްރައިވެޓް ލިމިޓެޑާއެވެ. 4.9 މިލިއަން ރުފިޔާއަށް ހަވާލުކުރި މި މަސައްކަތް ހަ މަސް ދުވަހުގެ ތެރޭގައި ނިންމުމަށް ވަނީ އެއްބަސްވެފައެވެ.
މި މަޝްރޫޢުގެ ދަށުން އެ ހޮސްޕިޓަލުގައި ސީޓީ ރޫމްއަކާއި އެކްސްރޭ ރޫމަކާއި، އަލްޓްރާސައުންޑް ސްކޭން ރޫމެއްގެ އިތުރުން ސްޕީޗް ތެރަޕީއަށް ޚާއްސަ ރޫމެއް ތަރައްގީ ކުރާނެއެވެ. މި އެއްބަސްވުމުގައި ހެލްތް މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޯ ހެލްތު އަޙްމަދު ޤާސިމެވެ. އަދި އެކުންފުނީގެ ފަރާތުން ސޮއިކުރެއްވީ މާކެޓިން މެނޭޖަރ މުޙައްމަދު ޢިމާދެވެ.
ރ.ދުވާފަރު ސިއްހީ މަރުކަޒު ހޮސްޕިޓަލް ފެންވަރަށް ތަރައްގީކުރުމަށްޓަކައި އިމާރާތް އަޕްގްރޭޑްކުރުމުގެ މަސައްކަތް ހަވާލުކުރީ އަލްޓެކް މޯލްޑިވްސް ޕްރައިވެޓް ލިމިޓެޑާއެވެ. 25.5 މިލިއަން ރުފިޔާއަށް ހަވާލުކުރި މި މަސައްކަތްވެސް ނިންމަން ޖެހެނީ ހަ މަސް ދުވަހުގެ ތެރޭގައެވެ. މި މަޝްރޫއުގެ ދަށުން އޮޕަރޭޝަން ތިއޭޓަރ ކޮމްޕްލެކްސްއަކާއި، އައިސީޔޫއާއި ނަރސް ސްޓޭޝަންއާއި، ޕްރޮސީޖަރ ރޫމެއްގެ އިތުރުން މެޑިކަލް އަދި ނޮން-މެޑިކަލް ސްޓޯރ ރޫމެއް ގާއިމުކުރާނެއެވެ.
ދުވާފަރު މަޝްރޫއުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޯ ހެލްތު އިސްމާޢިލް ޢަބްދުﷲ އެވެ. އެކުންފުނީގެ ފަރާތުން ސޮއިކުރެއްވީ، ޖެނެރަލް މެނޭޖަރ ޙުސެއިން ތަސްމީންއެވެ.
ރާއްޖޭގެ ރަށްރަށުގެ ސިއްޙީ ޚިދުމަތްދޭ ތަންތަނުގެ ޚިދުމަތް އަޕްގްރޭޑްކުރުމަށް ސަރުކާރުން ދަނީ ގިނަ މަޝްރޫއުތަކެއް ކުރިއަށް ގެންދަމުންނެވެ.
