ކުރީގެ ރައީސުންނަށް ދޭ އިނާޔަތުން ބައެއް އުނިކޮށް ނައިބު ރައީސުންނަށް އިނާޔަތެއް ދެނީ

ކުރީގައި ރައީސްކަން ކުރެއްވި ބޭފުޅުންގެ ރަސްމީ އޮފީސް ހިންގަވަން ކޮންމެ މަހަކު ދައުލަތުގެ ބަޖެޓުން ދެމުން އަންނަ 175،000 ރުފިޔާ އުނިކޮށް، ނައިބު ރައީސްކަން ކުރެއްވި ބޭފުޅުންނަށް 25،000 ރުފިޔާގެ އިނާޔަތެއް ދޭން ރައްޔިތުންގެ މަޖިލީހަށް ބުރާސްފަތި ދުވަހު ހުށަހަޅައިފިއެވެ.

ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭންޖެހޭ ރައްކާތެރިކަމާއި އިނާޔަތްތަކާބެހޭ ގާނޫނަށް ސަރުކާރުގެ ފަރާތުން މި އިސްލާހު ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދު އެވެ.

މަޖިލީހުގެ މިއަދުގެ ޖަލްސާގައި ބިލުގެ ފުރަތަމަ ކިޔުން ވަނީ އިއްވާފައެވެ.

މިހާރު ގާނޫނުގައިވާ ގޮތުން ރައީސުލްޖުމްހޫރިއްޔާކަން ކޮށްފައިވާ ބޭފުޅަކު މުޖުތަމައުއަށް ފައިދާހުރި އިޖުތިމާއީ މަސައްކަތްތައް ކުރުމަށްޓަކައި އެ ބޭފުޅަކު ބޭނުންވެއްޖެ ހިނދެއްގައި މަސައްކަތް ކުރާނެ އޮފީހަކާއި މުވައްޒަފުންނާއި އެހެނިހެން ކަންތައްތައް ހަމަޖެއްސުމަށްޓަކައި މަހަކު 175،000 ރުފިޔާ އާ ހަމައަށް ދައުލަތުން ފައިސާ ހަމަޖައްސައިދޭންޖެހެ އެވެ.

ސަރުކާރުން ގާނޫނަށް ހުށަހެޅުއްވި އިސްލާހުގައި ވަނީ، އެ 175،000 ރުފިޔާގެ އިނާޔަތް ކަނޑާލާށެވެ. އަދި ނައިބު ރައީސުންނަށް އިނާޔަތެއްގެ ގޮތުގައި މަހަކު 25،000 ދިނުމަށާ، ރާއްޖެ އާއި ރާއްޖެއިން ބޭރުން ދައުލަތުގެ ޚަރަދުގައި ސިއްޙީ ޚިދުމަތްތައް ލިބިދޭނެ އިންތިޒާމް ހަމަޖެއްސުމަށެވެ.

މީގެ އިތުރުން، ކުރީގެ ރައީސަކު ދެވަނަ ދައުރަކަށް އިންތިޚާބުވެއްޖެ ނަމަ ނުވަތަ ނާއިބަކު މަގާމަކަށް އިންތިޚާބުވެއްޖެ ނަމަ ކުރީގެ ރައީސުންނާއި ނައިބުންގެ އިނާޔަތް ނުލިބޭ ގޮތަށް ވަނީ ހުށަހަޅުއްވާފައެވެ.

އަދި އެ ރައީސުން ދައުލަތުގެ އެހެން މަގާމެއް ފުރުއްވާ ނަމަ މަގާމުގައި ހުންނަހާ ހިނދަކު ރައީސުންގެ އިނާޔަތްތައް ނުލިބޭ ގޮތަށް އިސްލާހުގައި ވަނީ ހިމަނާފައެވެ.

ހަމައެހެންމެ، ކުރީގެ ރައީސަކު ރާއްޖެއިން ބޭރުގައި ދިރިއުޅޭ ނަމަ، އެ މުއްދަތުގައި އެ ބޭފުޅަކަށް ހިމާޔަތާއި ރައްކާތެރިިކަން ފޯރުކޮށްދިނުން ލާޒިމުނުވާ ގޮތަށް އިސްލާހުގައި ވަނީ ހިމަނާފައެވެ.

މީގެ އިތުރުން އިގުތިސާދީ ތަދުމަޑުކަމަކާ ގުޅިގެން ކޮންމެހެން ޚަރަދު ކުޑަކުރަންޖެހޭ ހާލަތެއް އަތުވެއްޖެނަމަ ސަރުކާރުން ބޭނުންވާ ގޮތަށް ކުރީގެ ރައީސުންނާއި ނައިބު ރައީސުންނަށް ދޭ އިނާޔަތްތަކަށް ބަދަލު ގެނެވޭނެ ކަމަށާ އެކަން ކުރަން މަޖިލީހަށް ކޮންމެހެން ހުށަހަޅާކަށް ނުޖެހޭނެ ކަމަށްވެސް ބުނެފައިވެއެވެ.

މިހާރު ގާނޫނު އޮންނަ ގޮތުން ކުރީގެ ނައިބު ރައީސުންނަށް އެއްވެސް އިނާޔަތެއް ނުލިބެއެވެ.