ވިލިމާލެ ފުލުހުންގެ ބެލުމުގެ ދަށުގައި ހުރި ސިނގިރޭޓުތަކެއް ގެއްލުމަކީ ބަލައިގަނެވޭނެ ކަމެއް ނޫން ކަމަށާއި، އެ މައްސަލަ ތަހުގީގުކޮށް ޤާނޫނީ ފިޔަވަޅު އެޅުމަށް ބޮޑު އިސްކަމެއް ދޭނެ ކަމަށް ފުލުހުން ބުނެފިއެވެ.
ވިލިމާލެ ފުލުހުންގެ ބެލުމުގެ ދަށުގައި ހުރި 31 ސިނގިރޭޓު ކާޓާންތަކެއް ގެއްލުނު މައްސަލައެއް ފެންމަތިވެ، އެފަދަ މައްސަލައެއް ތަހުގީގުކުރާކަމަށް ފުލުހުން ބުނީ މިއަދުއެވެ.
އެގޮތުން މިއަދު ހެނދުނު ފުލުހުން ބުނި ގޮތުގައި، ފުލުހުންގެ އަތުން ގެއްލުނީ މި އަހަރުގެ މޭއި މަހު، ބިދޭސީއެއްގެ އަތުން ހިފެހެއްޓި 6 ކާޓަންގެ ސިނގިރޭޓާއި، މިދިޔަ އަހަރުގެ ޑިސެމްބަރު މަހުގެ 23 ވަނަ ދުވަހު ދެ ބިދޭސީއެއްގެ އަތުން ފުލުހުންގެ ބެލުމުގެ ދަށަށް ގެނައި 25 ކާޓަންގެ ސިނގިރޭޓު ކަމަށެވެ.
އެހެންކަމުން އެ ދެ މައްސަލައިގައި ޖުމްލަ 31 ކާޓަން ސިނގިރޭޓު ގެއްލިފައިވާ ކަމަށް ފުލުހުން ބުންޏެވެ.
އެކަމާއި ގުޅިގެން މިއަދު މެންދުރު ފުލުހުން ނެރުނު ބަޔާނެއްގައި ބުނީ، ފުލުހުންގެ އަޚުލާގީ މިންގަނޑުތަކާއި އަސާސީ އުސޫލުތަކާއި ޚިލާފު އެފަދަ ކޮންމެ ކަމަކީ ބޮޑު އިސްކަމެއްދީގެން ތަހުގީގުކޮށް ޤާނޫނީ ފިޔަވަޅު އަޅާނެ ކަންކަން ކަމަށެވެ.
އެގޮތުން ފުލުހުންގެ ބެލުމުގެ ދަށުގައި ހުންނަ ތަކެތި ގެއްލުމަކީ ބަލައިގަނެވޭނެ ކަމެއް ނޫން ކަމަށާއި، އެފަދަ ކަންކަމަކީ ފުލުހުންގެ ފަރާތުން ފެންނަންޖެހޭ އަޚުލާގާއި، ހަރުދަނާ މަސައްކަތުގެ ރޫހާއި ކަނޑައެޅިގެން ޚިލާފުކަންކަން ކަމަށެވެ.
ވީމާ، މިކަމުގައި ބައިވެރިވެފައިވާ ފަރާތް ނުވަތަ ފަރާތެއް ދެނެގަނެ، އަަޅަންޖެހޭ ފިޔަވަޅުތައް އެޅުމަށް ކުރަންޖެހޭ އެންމެހައި ކަންކަން މި ޚިދުމަތުން ކުރާނެ ވާހަކަ ދެންނެވީމެވެ.
ފުލުހުންގެ ބަޔާން
އަދި ފުލުހުންގެ ހުރަމަތް ކުޑަކޮށް، އާންމު ރައްޔިތުން ފުލުހުންނަށް ކުރާ އިތުބާރު ގެއްލުވާލަން އެއްވެސް މުވައްޒަފަކަށް ފުުރުސަތެއް ނުދޭނެ ކަމަށާއި، އެ ޚިދުމަތުގެ ހުރިހާ މުވައްޒަފުންނަކީ ވެސް ޖަވާބުދާރީވެ، ނަޒާހަތްތެރިކަން ހިފަހައްޓައި ސާބިތުކަމާއި އެކު ދެމިތިބޭ އިޚްލާސްތެރި ޚިދުމަތްތަކެއް ރައްޔިތުންނަށް ފޯރުކޮށްދޭ ބަޔަކަށް ހެދުމަކީ ފުލުހުންގެ މައިގަނޑު އަމާޒު ކަމަށް ފުލުހުން ބުންޏެވެ.
މި މައްސަލަތަކާ ގުޅިގެން ފުލުހުންގެ ތެރެއިން ހިންގަންޖެހޭ އިދާރީ ކަންކަން ބެލުމުގެ މަސައްކަތް ޕްރޮފެޝަނަލް ސްޓޭންޑާޑްސް ކޮމާންޑްއިން ތަހުގީގުކުރަމުންދާ ކަމަށް ފުލުހުން ބުންޏެވެ. އަދި ގެއްލުނު ސިނގިރޭޓުތަކާ ގުޅޭ ޖިނާއީ ތަހުޤީޤެއް ވަކި މައްސަލަތަކެއްގެ ގޮތުގައި ބަލަމުންދާ ކަމަށް ވެސް ފުލުހުން ބުންޏެވެ.
