ކުރިއަށް އޮތް 20 އަހަރަށް އެކުލަވާލާ ޤައުމީ ތަރައްޤީގެ ޕްލޭނަށް ރައްޔިތުންގެ ޚިޔާލާއި މަޝްވަރާ ހޯދުމަށް ކުރިއަށްގެންދާ ”ކުރިމަގު ސައްލާ“ އަށް މައުލޫމާތު އެއްކުރުމަށް ނެކްސިއާގެ ޓީމްތަކުން އެކި އަތޮޅުތަކުގައި ހަރަކާތްތެރިވަމުން އެބަގެންދެ އެވެ.
ރާއްޖޭގެ ހުރިހާ ރަށަކަށް ދަތުރުކޮށް ރައްޔިތުންނާއި ބައްދަލުކޮށް ޚިޔާލު އެއްކުރުމަށް ކުރިއަށްގެންދާ މި ދަތުރުތަކުގައި ހަރަކާތްތެރި ވަނީ މި ޕްލޭން އެކުލަވާލުމުގެ މަސައްކަތް އެވޯޑްކޮށްފައިވާ ކޮންސަލްޓެންޓް، ނެކްސިޔާ މޯލްޑިވްސްގެ ޓީމް ތަކުން ކަމަށާއި، އަދި މި ބައްދަލުވުންތަކުގައި މީގެ 20 އަހަރު ފަހުން އެބައެއްގެ ވަޒަން ނުވަތަ ދިވެހިރާއްޖެ އޮންނަން ބޭނުންވާ ގޮތަކީ ކޮބައިތޯ އޮޅުންފިލުވައި ރައްޔިތުން ބޭނުންވާ ތަސައްވުރަށް މި ޕްލޭންގެ ދަށުން މަގްޗާޓް ކުރަހަދޭނެ ކަމަށް މިނިސްޓްރީ އޮފް ފިނޭންސް އެންޑް ޕްލޭނިންގ އިން މަޢުލޫމާތު ދެއްވައެވެ.
ރައްޔިތުންގެ ޚިޔާލު ހޯދުމަށް ކުރަމުންދާ މި ދަތުރުތަކުގެތެރެއިން މިއަދު ބައްދަލުވުންތައް އދ، ހދ، އަދި ވ. އަތޮޅާއި ފުވައްމުލަކުގައި ކުރިއަށްގެންދިއުމަށް ވަނީ ނިންމާފައެވެ.
ޤައުމީ ތަރައްޤީގެ ޕްލޭން ”ވިލުންތެރި ރާއްޖެ 2045“ އަށް ރައްޔިތުންގެ ޚިޔާލާއި މަޝްވަރާ ހޯދުމަށް ރާއްޖޭގެ އެކި ކަންކޮޅުތަކުގައި އެއްފަހަރާ ކުރިއަށްގެންދާ ”ކުރިމަގު ސައްލާ“ ބައްދަލުވުންތަކުގައި ރަށު ކައުންސިލާއި މުވައްސަސާތަކުގެ އިތުރަށް ރައްޔިތުންނާއި ބައްދަލުކޮށް ޚިޔާލާާއި މަޝްވަރާ ހޯދުމަށް ވަނީ ނިންާފައެވެ.
”ވިލުންތެރި ރާއްޖެ“ ޤައުމީ ތަރައްޤީގެ ޕްލޭން އަކީ، ޤާނޫނީ ފުރިހަމަ ބާރުވެރިކަން ލިބިދެވޭގޮތަށް އެކުލަވާލުމަށް ތައްޔާކުރަމުންދާ ޕްލޭނެކެވެ. މި ޕްލޭން ވެގެންދާނީ ކުރިއަށްއޮތް 20 އަހަރުގެ ތެރޭގައި، ރާއްޖޭގެ ތަރައްޤީގެ ކަންކަން ރާވާ ހިންގުމުގައި އަމަލުކުރަންޖެހޭ އަދި އޭގައި ރައްޔިތުން ހިމަނުއްވާ ކަންކަން ތަންފީޒުކުރެވިގެންދާނެ ޕްލޭނަކަށެވެ.
