މޯލްޑިވްސް އެގްރިބިޒްނަސް ޕްރޮގްރާމް (މެޕް) އިން ނަމޫނާ ގްރީންހައުސް އަޅައިގެން ދަނޑުވެރިކަމުގެ ތަމްރީން ޕްރޮގްރާމްތައް ކުރިއަށް ގެންދާ ރަށްރަށުގައި ލީޑް ފާމަރުން(އިސް ދަނޑުވެރިން) ގެ ގޮތުގައި ހަރަކާތްތެރިވާނެ ފަރާތްތައް ވަނީ ހޮވާފައެވެ. މިތަމްރީން ޕްރޮގްރާމް ކުރިއަށް ގެންގޮސްފައިވާ އުތުރުގެ ތިން އަތޮޅުން ހޮވާލެވުނު ދަނޑުވެރިންނަށެވެ. މި ލީޑް ފާމަރުގެ ބޭނުމަކީ އެރަށެއްގައި މެޕް ޕްރޮޖެކްޓުން އަޅާފައިވާ ގްރީންހައުސްގައި އަދި މި ޕްރޮޖެކްޓާއެކު މަސައްކަތްކުރާ އައި.އެފް.އެފް މެންބަރުން އަޅާ ގްރީންހައުސްގައާއި ބިމުގައި ގަސްހައްދާއިރުގައި އެ ދަނޑުވެރިން ކަންކަންކުރަނީ ޕްރޮޖެކްޓުން ދަސްކޮށްދޭ، ދަނޑުވެރިކަމުގައި ބޭނުންކުރާ ރަނގަޅު އުޞޫލްތަކާ އެއްގޮތަށްކަން ޔަގީންކުރުން ކަމަށް ދަނޑުވެރިކަމާ ދިރޭތަކެއްޗާ ބެހޭ ވުޒާރާއިން ވިދާޅުވެއެވެ.
މިގޮތުން ޕްރޮޖެކްޓުން ތައްޔާރުކޮށްފައިވާ ކްރޮޕް ކަލަންޑަރގައި ހިމެނޭ ގޮތަށް ދުވަހުން ދުވަހަށް ކުރަންޖެހޭ މަސައްކަތްތައް ކުރާކަން ޔަގީންކުރުމާއި ހަދާފައިވާ ޗެކްލިސްޓްގައި ހިމެނޭކަންކަން ގަވައިދުން ބަލަހައްޓަމުން ގެންދާކަން ޔަގީންކުރުމެވެ. އަދި އެގޮތަށް ކަންކަން ކުރިއަށް ނުދާނަމަ ރަނގަޅުކުރަންވީ ކަންކަން ފާހަގަކޮށްދީ، ޕްރޮޖެކްޓް އަދި މިނިސްޓްރީގެ އެކްސްޓެންޝަން ސްޓާފުންގެ ލަފަޔާއި އެކު އެކަން ރަނގަޅު ކުރުމަށް ހިތްވަރުދީ އައި އެފް އެފް މެމްބަރުންނާއި އެކު ގްރީންހައުސްގެ މަސައްކަތްތަކުގައި އެހީތެރިވުމެވެ.
މެޕް ޕްރޮޖެކްޓުން ގްރީންހައުސް އަޅާފައިވާ ރަށްތަކާއި އަދި އާ ގްރީންހައުސްތައް އަޅާރަށްރަށުގެ އައި.އެފް.އެފް މެންބަރުންގެ ތެރެއިން ކޮންމެ ރަށަކުން މަދުވެގެން 2 މީހުން ނެގުމަށް ވަނީ ނިންމާފައެވެ. މިގޮތުން އިސް ދަނޑުވެރިން ނެގުމަށް ހަމަޖެހިފައިވާ ރަށްތަކަކީ: ހއ އަތޮޅުން މޮޅަދޫ، ކެލާ ، ފިއްލަދޫ، އުލިގަމު ހދ.އަތޮޅުން ކުމުންދޫ، ވައިކަރަދޫ ، މަކުނުދޫ، ނޭކުރަންދޫ، ނޮޅިވަރުފަރު، ށ.އަތޮޅުން ކަނޑިތީމު، ގޮއިދޫ، ބިލެއްފަހި، ފޯކައިދޫ، ނަރުދޫ، އަދި ފޭދޫއެވެ.
އިސް ދަނޑުވެރިންނަށް ބޭނުންވާ ތަމްރީންތައް މިހާރު ދީފައިވާއިރު، ހަނިމާދޫ އެގްރިކަލްޗަރ ސެންޓަރުގައި އަދި އެހެނިހެން ގޮތްގޮތުންވެސް ގަސްހެއްދުމާގުޅޭގޮތުން ތަމްރީން ޕްރޮގްރާމްތައް ވަނީ ކުރިޔަށް ގެންދެވިފައިވާ ކަމަށް ދަނޑުވެރިކަމާ ބެހޭ ވުޒާރާއިން ވިދާޅުވެއެވެ. މި ތަމްރީން ޕްރޮގްރާމްތަކުގައި ގަސް އިންދުމަށް ބޭނުންކުރާ މީޑީއާ، ގަހުގެ ބައިތައް، ގަހަށް ބޭނުންވާ ކާނާގެ މާއްދާތައް، ގަހަށް ޖެހޭ ބަލިތައް އަދި ބަލިތައް ކޮންޓްރޯލްކުރާނެގޮތްތައް ދަސްކޮށްދެވެއެވެ. މީގެއިތުރުން ގަސްހައްދާއިރުގައި ގެންގުޅެންޖެހޭނެ އެންމެ ރަނގަޅު މިންގަނޑުތަކާއި، ހިސާބުބެލެހެއްޓުމާއި، ކްރޮޕް ޕްލޭނަރ އާއި އަދި ޗެކްލިސްޓް ބަލަހައްޓާނެގޮތާއި ގްރޫޕެއްގޮތުގައި މަސައްކަތްކުރުމާއި، ގްރޫޕްމެނޭޖްކޮށް މޯޓިވޭޓްކޮށްގެން މަސައްކަތްތައް ބައްޓަންކުރެވޭނެގޮތުގެ ތަމްރީން ޕްރޮގްރާމްވެސް، އިސް ދަނޑުވެރިންނަށް ދެވޭނެއެވެ.
މެޕުން އަންނަނީ ރާއްޖޭގައި ދަނޑުވެރިކަން ފުޅާކޮށް، ކުރިއެރުވުމަށް ދަނޑުވެރިކަމުގެ އައު އީޖާދީ ގޮތްތައް ދަނޑުވެރިންނަށް ތައާރަޕްކޮށްދީ ދަސްކޮށްދިނުމަށް ގިނަ ޕްރޮގްރާމްތަކާއި ތަމްރިންތައް ހިންގަމުން ކަން ފާހަގަ ކޮށްލެވެއެވެ.
