ހޯމް މިނިސްޓަރު އަލީ އިހުސާނުގެ ތުހުމަތަކީ ޒިންމާދާރުކަން ކުޑައަމަލެއްކަމަށް ކުރީގެ އިކޮނެމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ. ފައްޔާޒު މިހެން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.
އެޕޯސްޓުގައި ހިއްސާކުރައްވާއިވާގޮތުގައި ޕޮލިސް ސްޓޭޝަން އެޅުމުގެ ޕްރޮޖެކްޓާ ގުޅޭ ގޮތުން ހޯމް މިނިސްޓަރު އަލީ އިހުސާން، އެކި ޕްލެޓްފޯމްތަކުގައި ދޮގު މައުލޫމާތު ދެއްވާފައިވާ ކަމަށް ރައީސް އިބްރާހިމް މުހައްމަދު ސޯލިހު ސަރުކާރުގައި އިކޮނޮމިކް މިނިސްޓަރުކަން ކުރެއްވި ފައްޔާޒް އިސްމާއިލް ވިދާޅުވެފައިވެއެވެ. އަދި މިނސްޓަރ އިހުސާންގެ އެ ތުހުމަތާ ގުޅިގެން ފައްޔާޒް ”އެކްސް“ ގައި ކުރެއްވި ޕޯސްޓެއްގައި ވިދާޅުވީ އިހުސާންގެ ވާހަކަތަކާ ގުޅިގެން ދޭން ޖެހޭ ޖަވާބުތައް އެކި ޕްލެޓްފޯމްތަކުގައި ދެއްވާފައިވާ ކަމަށެވެ. ތަހުގީގީ އިދާރާތަކުގެ ބެލެނިވެރި ވަޒީރަކަށް އިހުސާން ހުންނަވާތާ އަހަރެއްވާ އިރު، އެ މުއްދަތުގައި އެއްވެސް ތަހުގީގެއް ނުކޮށް، ދައުވާއެއް ނުއުފުލައި މިފަދަ ތުހުމަތުތަކެއް ކުރަމުން ދިއުމަކީ ޒިންމާދާރުކަން ކުޑަ އަމަލެއް ކަމަށް ވެސް ފައްޔާޒު ވިދާޅުވިއެވެ.
ހޯމަދުވަހު އޮތް ރައްޔިތުންގެ މަޖިލިހުގެ ޖަލްސާގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން ހޯމް މިނިސްޓަރު އިހުސާން ވިދާޅުވީ ޕޮލިސް ސްޓޭޝަން އަޅަން ހަވާލު ކުރި އިންޑިއާގެ އިންދިރާ ޕްރްޖެކްޓްސް ކުންފުނިން އެ މަސައްކަތް ނުކުރާ ކަމަށާއި އެ ކުންފުނިން ކުރާ މަސައްކަތަކީ ކުރީގެ އިކޮނެމިކް މިނިސްޓަރު ފައްޔާޒްގެ އާއިލީ މަސްލަހަތު އޮންނަ ބިގް ކުންފުނީގެ ހިއްސާ ގަތުމަށް ފަހު މާލޭގެ ގަލޮޅުގައި ހުންނަ މޫނިމާގެ އިމާރާތް ކުރުން ކަމަށް ތުހުމަތު ކުރައްވާފައެވެ
އެހެންވެ މިކަމުގައި ރަސްމީކޮށް ޖަވާބުދާރީވުމުގެ މަގު ތަނަވަސް ކުރުމުގެ ގޮތުން މި މައްސަލަ ތަހުގީގުކޮށް ދިނުމަށް އެދި އޭސީސީ އަދި ފުލުހުންނަށް ހުށަހަޅާފައިވާ ކަމަށް ފައްޔާޒް ވިދާޅުވިއެވެ. ފައްޔާޒް ވަނީ އޭސީސީ އާއި ފުލުހުންގެ މުއައްސަސާއަށް ފޮނުވި ސިޓީ ވެސް އެކްސްގައި ހިއްސާކުރައްވާފައެވެ.
”މި ވާހަކަ އިހުސާން ދެން ދައްކަވަން ވާނީ ރައްޔިތުންގެ ފަރާތުން ހަވާލުކޮށްފައިވާ ޒިންމާ އަދާކުރެއްވުމަށް ފަހު.“ ފައްޔާޒް ވިދާޅުވެފައިވެއެވެ. އަދި ފައްޔާޒު އެކްސްގައި ކުރެއްވިޕޯސްޓުގައި ވިދާޅުވި ގޮތުގައި ރާއްޖޭގެ މީޑިއާތަކުގައި މިނިސްޓަރ އިހުސާންގެ ވާހަކަ ގެނެސްދީފައިވަނީ އެ ފައިސާ އިން އޭނާ ނާޖައިޒު މަންފާތަކެއް ލިބިފައިވާ ކަމަށް އިޝާރަތްކޮށްކަމަށެވެ.
ހޯމަދުވަހުގެ ޖަލްސާގައި އިހުސާން ވިދާޅުވީ ރާއްޖޭގެ 60 ރަށެއްގައި ޕޮލިސް ސްޓޭޝަން އެޅުމަށް އިންޑިއާ ކުންފުންޏަކާ ހަވާލު ކުރި މަޝްރޫއަށް ބޭނުންވާ 3.6 މިލިއަން ޑޮލަރު އެ ކުންފުންޏާ ހަވާލު ކުރި ނަމަވެސް އެއްވެސް މަސައްކަތެއް ނުހިނގާ ކަމަށެވެ
