މާލެ، ހުޅުލެ އަދި ހުޅުމާލެ އިން ކަރަންޓް ކެނޑިފައިވާތީ އެފަދަ ކަމެއް ތަކުރާރު ނުވާނެހެން ފިޔަވަޅު އަޅާނެ ކަމަށް ސްޓެލްކޯ އިން ބުނެފި އެވެ. ސްޓެލްކޯގެ މެނޭޖިން ޑިރެކްޓަރު ހުސައިން ފަހްމީ އެކްސްގައި ކުރެއްވި ޕޯސްޓެއްގައި ވިދާޅުވީ ގްރޭޓަ މާލެ އިންޓަކަނެކްޝަން ގްރިޑަށް ކުރިމަތިވެފައިވާ މައްސަލަ މިހާރު ހައްލުކުރެވިފައިވާ ކަމަށެވެ.
ފަހްމީ ވަނީ ކަރަންޓުގެ ހިދުމަތް އަލުން ދިނުމަށްޓަކައި އެ ކުންފުނީގެ މުވައްޒަފުންނާއި، އެކި ގޮތްގޮތުން އެހީތެރިވެދެއްވި އެންމެހައި ފަރާތްތަކަށް ޝުކުރުވެސް އަދާކުރައްވާފަ އެވެ.
މީގެ އިތުރުން އެފަދަ ހާދިސާއެއް ތަކުރާރުވިޔަ ނުދިނުމަށްޓަކައި އަޅަންޖެހޭ ހުރިހާ ފިޔަވަޅުތަކެއް އަޅާނެ ކަމުގެ ޔަގީންކަންވެސް ވަނީ ދެއްވާފަ އެވެ.
”މީގެ ސަބަބުން ރައްޔިތުންނަށް ކުރިމަތިވި އުނދަގޫތަކަށް މައާފަށް އެދެން. އަދި މިއަދު ގްރޭޓާމާލެ ގްރިޑް ބްލެކްއައުޓަކަށް ދިއުމަށް މެދުވެރިވި ސަބަބު ދެނަގަނެ އެކަމާ ގުޅުންހުރި މައުލޫމާތު ފަހުން އާންމު ކުރާނެ ކަމުގެ ޔަގީންކަން އަރުވަން،“ ފަހްމީ ވިދާޅުވި އެވެ.
އާދިއްތަ ދުވަހު މެންދުރު 12.30ން ފެށިގެން މާލެ، ހުޅުމާލެ، އަދި ހުޅުލެ ސަރަހައްދު ކަރަންޓްގެ ޚިދުމަތް މެދުކެނޑިފައި ވުމުގެ ސަބަބުން ޢާއްމު ދިރިއުޅުން މުޅީން ހުއްޓުމަކަށް އައިކަން ފާހަގަ ކޮށްލެވެ. ސްޓެލްކޯއިން ބުނެފައިވަނީ އިރު އޮއްސުމުގެ ކުރިން މައްސަލަ ޙައްލު ކުރެވި ހުރިހާ ސަރަޙައްދަށް ކަރަންޓް ފޯރު ދެވިފައިވާ ވާކަމަށެވެ.
