މޯލްޑިވްސް ޑިވެލޮޕްމެންޓް ބޭންކުގެ ސީއީއޯ ކަމުން އިސްތިއުފާ ދެއްވި ނޮއެލް ގްރެގާ ޕެޓަސަން ޖޯންސް މުސާރަ އާއި އިނާޔަތްތައް ނުލިބިގެން ވަޒީފާއާ ބެހޭ ޓްރައިބިއުނަލަށް މައްސަލަ ހުށަހަޅައިފި އެވެ.
ވަޒީފާއާ ބެހޭ ޓްރައިބިއުނަލްގެ ވެބްސައިޓްގައިވާ ގޮތުން ނޮއެލް މައްސަލަ ހުށަހަޅާފައިވަނީ މިދިޔަ އޭޕްރީލް މަހުގެ ހަތްވަނަ ދުވަހު އެވެ. އޭނާ މަގާމުން އިސްތިއުފާ ދެއްވީ މާޗް މަހުގެ 23 ވަނަ ދުވަހު އެވެ.
ޓްރައިބިއުނަލްގެ ވެބްސައިޓުން ޢާއްމުކޮށްފައިވާ މައުލޫމާތަށް ބަލާއިރު ނޮއެލް މައްސަލަ ހުށަހަޅާފައިވަނީ މުސާރަ އާއި އިނާޔަތްތައް ނުލިބިގެންނެވެ. ނަމަވެސް، އޭގެ ތަފްސީލް އެނގޭކަށް ނެތެވެ.
ވަޒީފާއާ ބެހޭ ޓްރައިބިއުނަލުން ވަނީ ނޮއެލް ހުށަހެޅި މައްސަލަ މި މަހުގެ ހަތްވަނަ ދުވަހު ބާތިލްކޮށްފަ އެވެ. މައްސަލަ ބާތިލްކުރި ސަބަބެއް ކަމަށް ޓްރައިބިއުނަލްގެ ނިންމުމުގައި ބުނެފައިވަނީ މައްސަލަ ހުށަހެޅި ފަރާތަކީ ދިވެހި ބަސް ނޭނގޭ ބިދޭސީއަކަށްވާތީ ތަރުޖަމާނަކު ހޯދަން ދިން ފުރުސަތުގައި އެކަން ކޮށްފައި ނުވާތީ ކަމަށެވެ.
ޑިވެލޮޕްމަންޓްގެ ފުރަތަމަ ސީއީއޯއަކަށް ހަމަޖެއްސި ނޮއެލް އެންމެ ފަހުން ހުންނެވީ ސައުދީ އަރަބިއްޔާގެ ނެޝަނަލް އިންސްފްރާސްޓްރަކްޗާ ފަންޑުގެ ޗީފް އިންވެސްޓްމެންޓް އޮފިސަރުގެ މަގާމުގަ އެވެ. އަދި 2013 އިން 2016 އަށް އިނގިރޭސި ވިލާތުގެ ޔޫކޭ ގްރީން އިންވެސްޓްމެންޓް ބޭންކުގެ މެނޭޖިން ޑިރެކްޓަރުގެ މަގާމުގައި ވެސް ހުންނެވި އެވެ.
