ކަންކަމުގައި ޖަވާބުދާރީކުރުވުމަށާއި ހާމަކަން ބޮޑު ގޮތެއްގައި ކަންކަން ކުރުމަށް ޑިމާންޑް ކުރުމުގެ ހުރިހާ ޙައްޤެއް ރައްޔިތުންނަށް ލިބިގެންވާކަމުގައި ފާރިސް މައުމޫން ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
މިގޮތުން ސަރުކާރުތަކުން ޖަވާބުދާރީ ވުމުގައި ނުކުޅެދޭނަމަ މުޒާޙަރާ ކުރާނޭ ކަމުގައި އެމަނިކުފާނު ވިދާޅުވިއެވެ. އަދި ހަމައެހެންމެ ސަރުކާރުން ”ބްރޫޓް ފޯސް“ ބޭނުންކޮށް ޒުވާނުންގެ އަޑު ކަނޑުވާލެވޭނެ ކަމަށް އުއްމީދުކޮށްގެން ނުވާނޭކަމުގައިވެސް ފާރިސް އެކްސްގައި ކުރެއްވި ޕޯސްޓްގައި ވިދާޅުވިއެވެ.
މުޒާހަރާތަކުގައި ބައިވެރިވާ މީހުން ހައްޔަރުކުރުމުން ސަރުކާރާއި އަދި ކަމާބެހޭ މުއައްސަސާތަކާއި ދޭތެރޭ އޮންނަ އިތުބާރު ގެއްލޭނެކަމަށްވެސް ފާރިސް ވިދާޅުވިއެވެ.
އަދި އެމަނިކުފާނު ވަނީ ޒުވާނުން ބުރަސްފަތި ދުވަހުގެރޭ ކުރިއަށްގެންދިޔަ މުޒާހަރާގެ ތެރެއިން، ހައްޔަރުކުރި ދެ ޒުވާނުން ކަމަށްވާ ޢާއިޝަތު ޝިމަން އަޙްމަދާއި ޢަބްދުﷲ މަޙްޒޫމް މާޖިދު މިނިވަން ކުރުމަށްވެސް ގޮވާލައްވާފައެވެ.
ފާރިސް މިހެން ވިދާޅުވެފައިވާއިރު އޭޕްރިލް މަހުގެ 18 ވަނަދުވަހުގެ ފަތިހު މާލޭގެ ގެއެއްގެ ފުރާޅުމައްޗަށް ވެއްޓިފައި އޮއްވާ ފެނުނު އުމުރުން 21 އަހަރުގެ ޔުމްނު ރަޝީދުއަށް އިއްސާފު ހޯދައިދުނުމަށް ގޮވާލާ މާލޭގެ މަގުތަކުގައި ޒުވާނުން އިސްނަގައިގެން އަންނަނީ ސިލްސިލާ މުޒާޙަރާތަކެއް ކުރަމުންނެވެ. މިގޮތުން ބުރާސްފަތި ދުވަހުގެރޭ ކުރިއަށްދިޔަ މި މުޒާޙަރަާގެ ތެރެއިން ދެމީހަކުވަނީ ހައްޔަރުކޮށްފައެވެ.
ފުލުހުން ހާމަކޮށްފައިވާ ގޮތުގައި ޝިމަން އަދި މަޙްޒޫމްވެސް ހައްޔަރުކޮށްފައިވަނީ ފުލުހުންގެ އަމުރަށް ނުކިޔަމަންތެރިވެ ވާޖިބަށް ހުރަސްއެޅިކަމުގެ ތުޙުމަތުގައެވެ. މިގޮތުން ފުލުހުން ބުނީ މަޖީދީމަގުގައި ޒުވާނުން ކުރަމުން އައި މުޒާހަރާ ބާރުގެ ބޭނުންކޮށް ރޫޅާލީ ހުކުރުދުވަހު ޖީސީއީ އޯލެވަލް އިމްތިހާނަށް ގިނަ ދަރިވަރުން ހާޒިރުވާން ޖެހޭތީއާއި ދަރިވަރުންގެ ތައުލީމީ މަސްލަހަތާއި އާއްމު ރައްޔިތުންގެ ދިރިއުޅުމަށް ކުރާ އަސަރުތަކަށް ރިއާޔަތް ކުރުމަށް ފަހު ކަމަށެވެ
މާލޭގައި ސިލްސިލާކޮށް މިހާރު ޒުވާނުން އިސްނަގަައިގެން ކުރިއަށްގެންދާ މުޒާހަރާގެ ތެރެއިންބުރާސްފަތި ދުވަހުގެރޭ ހައްޔަރުކުރި، އައިޝަތު ޝިމަން އަހުމަދު އަދި އަބްދު ﷲ މަހްޒޫމް މާޖިދުގެ ބަންދަށް ކޯޓުން މިހާރުވަނީ 3 ދުވަސް ޖަހާފަކަން ފާހަގަކޮށްލެވެއެވެ.
ފާހަގަކޮށްލެވޭގޮތުގައި މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ އިން ހުކުރުދުވަހު ވަނީ ހުއްދަ ހޯދުމަކާ ނުލައި ސުލްޙަވެރިކަމާއެކު އެއްވެއުޅުން ހުއްދަ ސަރަޙައްދުތައް ކަނޑައެޅުމާ ގުޅޭ އިޢުލާނެއް އާންމުކޮށްފައެވެ.
