އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އަދާލަތު ޕާޓީއަށް ސޮއިކުރައްވައިފިއެވެ.
އަދާލަތު ޕާޓީގެ އެންމެ އިސް މުއައްސިސުންގެ ތެރޭގައި ވެސް ހިމެނިވަޑައިގަންނަވާ ޑރ. ޝަހީމް އެ ޕާޓީގައި 12 އަހަރު ވަންދެން އުޅުއްވިއެވެ. އަދާލަތު ޕާޓީގެ ސްލޮޓުގައި ކުރީގެ ރައީސް މުހައްމަދު ވަހީދުގެ ވެރިކަމުގައި އޭރުގެ ސަރުކާރުގެ އިސްލާމިކް މިނިސްޓަރުކަން ވެސް ޑރ. ޝަހީމް ކުރައްވާފަވެއެވެ. ޑރ. ޝަހީމް އަދާލަތު ޕާޓީން ވަކިވެވަޑައިގަތީ 2017 ވަނަ އަހަރުގެ ފެބްރުއަރީ މަހުގައެވެ.
އޭރު ޑރ. ޝަހީމް އަދާލަތު ޕާޓީން ވަކިވެވަޑައިގަންނަވަން ހުށަހެޅުއްވީ ދެތިން އަހަރެއްހާ ދުވަހު ޚިޔާލު ތަފާތުވުމެއްގެ ތެރޭގައި އުޅުއްވުމަށް ފަހުގަކަން ފާހަގަކޮށްލެވެއެވެ.
އަދާލަތު ޕާޓީއާ އަލުން ގުޅިވަޑައިގަންނަވައި، މި އަހަރުގެ ފަހުކޮޅު ބާއްވާ އެ ޕާޓީގެ ރައީސްގެ އިންތިހާބުގައި ވާދަކުރައްވާނެކަން ޑރ. ޝަހީމް ހާމަކުރެއްވީ މިދިޔަ ބުދަ ދުވަހުއެވެ. އެއާއި އެކު އެޕާޓީގެ ބައެއް އިސްވެރިން ވަނީ އެކަމަށް މަރުހަބާ ކިޔާފައެވެ.
ފާހަގަކޮށްލެވޭ ގޮތުގައި އަދާލަތު ޕާޓީގެ ރައީސްކަމަށް އިސްލާމިކް މިނިސްޓަރު ޑރ. ޝަހީމް ކުރިމަތިލައްވާ ގޮތަށް ނިންމަވާ އެކަން އިއުލާންކުރުމާއިއެކު އަދާލަތު ޕާޓީގެ މިހާރު ރައީސް އިމްރާން އަބްދު ﷲ އާ އެއްބޭފުޅަކު އަނެއް ބޭފުޅަށް ވަނީ ބަހުގެ ހަމަލާތަކެއް ދެއްވާފައެވެ.
