ދުބާއީގައި މިހާރު ކުރިއަށްދާ އަރަބް ޓްރެވަލް މާކެޓް 2025 ގައި ރާއްޖޭގެ ޓޫރިޒަމް މިނިސްޓަރު ޠާރިޤް އިބްރާހީމް ދުނިޔޭގެ އެންމެ ބޮޑެތި ޓްރެވަލް ކުންފުނިތަކުގެ ތެރޭގައި ހިމެނޭ ޑުނަޓާ ޓްރެވަލްގެ އިސްވެރިންނާއި ބައްދަލުކުރައްވައި މުޙިއްމު މަޝްވަރާތަކެއް ކުރައްވައިފިއެވެ.
މި ބައްދަލުވުމުގައި ރާއްޖޭގެ ފަތުރުވެރިކަން އިތުރަށް ކުރިއެރުވުމަށްޓަކައި ދެފަރާތުން ގުޅިގެން މަސައްކަތް ކުރެވިދާނެ ދާއިރާތަކާ ބެހޭގޮތުން ވަނީ މަޝްވަރާކުރައްވާފައެވެ. މީގެ އިތުރުން ދަތުރުފަތުރުގެ ދާއިރާގައި އަންނަމުންދާ ބަދަލުތަކާއި، ފަތުރުވެރިންގެ ތަޖުރިބާ އިތުރަށް ފުރިހަމަކުރުމަށް ގެންނަންޖެހޭ އައު ބަދަލުތަކާ ބެހޭގޮތުންވެސް ވަނީ މަޝްވަރާކުރައްވާފައެވެ.
މި ބައްދަލުވުމުގައި ޑުނަޓާއާއެކު ކުރިއަށްދިޔަ އެއްބާރުލުމަކީ ވަރަށް މުޙިއްމު އެއްބާރުލުމެއް ކަމަށް މިނިސްޓަރު ޠާރިޤް އިބްރާހީމް ވިދާޅުވެފައިވެއެވެ. އަދި މި ބައްދަލުވުމުގައި ކުރެވުނު މަޝްވަރާތަކަކީ ވަރަށް ފައިދާހުރި މަޝްވަރާތަކެއް ކަމަށްވެސް އެމަނިކުފާނު ވިދާޅުވެފައިވެއެވެ.
މިހާރު ދުބާއީގައި ކުރިއަށްދާ އޭޓީއެމް ދުބާއީ ފެއަރގައި ބައިވެރިވެވަޑައިގަތުމަށް ވަޑައިގެން ޓޫރިޒަމް މިނިސްޓަރު ޠާރިޤު އިބްރާހިމްވަނީ ޑެޒަރޓް ގޭޓްގެ އިސްވެރިންނާވެސް ބައްދަލުކުރައްވާ، ދިވެހިރާއްޖޭގެ ފަތުރުވެރިކަން އިތުރަށް ކުރިއެރުވުމާ ގުޅޭގޮތުން މަޝްވަރާކުރައްވާފަވެއެވެ.
އޭޕްރިލް 30 ވަނަ ދުވަހު ކުރިއަށްގެންދެވުނު މި ބައްދަލުވުމުގައި، މާކެޓް ޓްރެންޑްތަކާއި ފަތުރުވެރިންގެ ޝައުޤުވެރިކަން ހުރި ދާއިރާތަކާ ގުޅޭގޮތުން މަޝްވަރާކުރެވުނެވެ. އަދި ދިވެހިރާއްޖެއަށް ޒިޔާރަތްކުރާ ފަތުރުވެރިންނަށް ފަސޭހަކަމާއެކު ދަތުރުފަތުރު ކުރެވޭނެ ގޮތްތަކާއި، ދިވެހިރާއްޖޭގެ އެންމެ ރީތި އަދި ޚާއްސަ ކަންތައްތައް ފަތުރުވެރިންނަށް ދެއްކުމާ ގުޅޭގޮތުން ވެސް ވަނީ މަޝްވަރާކުރެވިފައެވެ.
މިނިސްޓަރު ޠާރިޤު އިބްރާހިމް ވިދާޅުވީ، މި ބައްދަލުވުމަކީ ދިވެހިރާއްޖޭގެ ފަތުރުވެރިކަން އިތުރަށް ކުރިއެރުވުމަށް ވަރަށް މުޙިއްމު ބައްދަލުވުމެއް ކަމަށެވެ. އަދި ޑެޒަރޓް ގޭޓާއެކު އޮންނަ ގުޅުން އިތުރަށް ބަދަހިކޮށް، ކުރިއަށް އޮތް ތަނުގައި ގިނަ މަސައްކަތްތަކެއް ކުރެވިގެންދާނެ ކަމަށް އުންމީދުކުރައްވާ ކަމަށް ވެސް ވިދާޅުވިއެވެ.
މީގެ އިތުރުން މިނިސްޓަރުވަނީ އެރަބް ޓްރެވަލް މާކެޓް 2025 (އޭޓީއެމް 2025) ގައި ވިޒް އެއަރގެ އިސްވެރިންނާ ވެސް ބައްދަލުކުރައްވައި، މުޙިއްމު މަޝްވަރާތަކެއް ކުރައްވާފަކަން ފާހަގަކޮށްލެވެއެވެ.
މިގޮތުން މި ބައްދަލުވުމުގައި ދެފަރާތުން ވަނީ ވަރަށް ފައިދާހުރި މަޝްވަރާތަކެއް ކުރައްވާފައެވެ.
ވިޒް އެއަރއަކީ ހަންގޭރީގައި މައި އޮފީސް ހުންނަ، ޔޫރަޕްގެ އެންމެ ބޮޑު އަދި އަވަސް ދަތުރުތައް ކުރާ އެއަރލައިންތަކުގެ ތެރޭގައި ހިމެނޭ ކުންފުންޏެކެވެ. މި ބައްދަލުވުމަކީ ރާއްޖޭގެ ފަތުރުވެރިކަމުގެ ދާއިރާއަށް އިތުރު ކުރިއެރުންތަކެއް ހޯދުމަށް މަގުފަހިވެދާނެ ބައްދަލުވުމެއް ކަމަށް ބެލެވެއެވެ.
އޭޓީއެމް 2025 އަކީ މެއި މަހުގެ ތެރޭގައި ދުބާއީގައި ބޭއްވޭ، މެދު އިރުމަތީގެ އެންމެ ބޮޑު އެއް ޓްރެވަލް އަދި ޓޫރިޒަމް އިވެންޓެވެ. މި އިވެންޓުގައި ދުނިޔޭގެ އެކި ކަންކޮޅުތަކުން ޓޫރިޒަމް ދާއިރާގެ އެތައް ހާސް ޕްރޮފެޝަނަލުންނެއް ބައިވެރިވެ، އެކި ފަރާތްތަކާ ބައްދަލުކޮށް މަޝްވަރާކުރުމުގެ ފުރުސަތު ލިބެއެވެ.
ރާއްޖޭގެ ފަތުރުވެރިކަމުގެ ދާއިރާ އިތުރަށް ތަރައްޤީކޮށް ކުރިއެރުވުމަށްޓަކައި މިސަރުކާރުން ދަނީ ގިނަގުނަ މަސައްކަތްތަކެއް ކުރަމުންކަން ފާހަގަކޮށްލެވެއެވެ. މިގޮތުން ބައިނަލްއަޤްވާމީ ފެންވަރުގައި ބޭއްވޭ ފަތުރުވެރިކަމާ ގުޅުންހުރި މުޙިއްމު ބައްދަލުވުންތަކުގައި ބައިވެރިވެ، އެކި ފަރާތްތަކާއެކު ގުޅުން ބަދަހިކުރުމުގެ މަސައްކަތް ދަނީ ކުރަމުންނެވެ.
