މިމަހުގެ 18 ވަނަދުވަހު ހ. ފެންޓެނޯއީ ގޭގެ ނުވަވަނަ ފަންގިފިލާއިން ވެއްޓުނު ހައްވާ ޔުމްނު ރަޝީދު އަށް އިންސާފު ހޯދައިދިނުމަށް ގޮވާލައި ޒުވާނުން އިސްނަގައިގެން މާލޭގައި ކުރަމުންދާ ސިލްސިލާ މުޒާހަރާ ހޯމަދުވަހުގެރޭވެސް ކުރިއަށްގެންގޮސްފިއެވެ.
”ދުލެއް ނުކުރާނަން“ ގެ ނަމުގައި ކްރިމިނަލް އިންވެސްޓިގޭޝަން ބިލްޑިންގ ކައިރީގައި ކުރަމުންދާ މި މުޒާހަރާގެ މިއީ ފަސަވަނަރޭކަން ފާހަގަކޮށްލެވެއެވެ.
މުޒާހަރާގެ ބައިވެރިން ވަނީ ސަރުކާރަށް 10 ޑިމާންޑެއް ކޮށްފައެވެ. މި ޑިމާންޑުތަކުގެ ތެރޭގައި ހޯމް މިނިސްޓަރު އަލީ އިހުސާން އާއި ޓްރާންސްޕޯޓު މިނިސްޓަރު މުހައްމަދު އަމީން އިސްތިއުފާ ދިނުމަށް ގޮވާލުން ހިމެނެއެވެ. މީގެ އިތުރުން , އިންސާފުވެރި ތަހުގީގެއް ކުރިއަށް ގެންދިޔުމާއި , ތުހުމަތުކުރެވޭ ހުރިހާ އެންމެން ހައްޔަރުކޮށް، އަދަބު ދިނުމާއި , ފުލުހުން ހާމަކުރި ސީސީޓީވީ ފުޓޭޖުން ބައެއް ގެއްލުނު ސަބަބު ސާފުކޮށްދިނުމާއި , ތަހުގީގަށް ހޯދުނު ހުރިހާ ހެކިތައް ހާމަކުރުމާއި , ފުލުހުންގެ ހިންގާ ތަހުގީގާ މެދު އިންކުއަރީއެއް ހަދައިދިނުން ހިމެނެއެވެ.
ފާހަގަކޮށްލެވޭ ގޮތުގައި މުޒާހަރާގައި ޒުވާނުން ވަނީ މައްސަލަ ބެލުމަށް ރައީސް ޚާއްސަ ކޮމިޝަން އުފެއްދިކަން ފާހަގަކޮށްފައެވެ. އަދި އެދުނީ ކުރީ ސަރުކާރުން ހެދި ގޮތަށް ނަތީޖާއެއް ނުނެރެވޭ ކޮމިޝަނަކަށް މި ފަހަރު ވިޔަ ނުދިނުމެވެ. އެ ޒުވާނުން ވަނީ މުޒާހަރާގެ ބައިވެރީން ދައްކާ ވާހަކަ ރައީސް އަޑުއައްސަވާތީވެ އެކަމަށް ތަކުރާރުކޮށް ރައީސްއަށް ޝުކުރު އަދާކޮށްފައެވެ.
މުޒާހަރާކުރާ ފަރާތްތަކުން ވަނީ މި މައްސަލައިގައި ދެފުށް ފެންނަ ތަހުޤީގެއް ކުރިއަށް ގެންދިއުމަށާއި، ތުހުމަތުކުރެވޭ އެންމެން ހައްޔަރުކޮށް ދަޢުވާކުރުމަށް ގޮވާލާފައެވެ. އަދި ޙާދިޞާގެ ވީޑިއޯ ފުޓޭޖުތައް ދިމާނުވާ ސަބަބު ސާފުކޮށްދިނުމަށާއި، ތަހުޤީގަށް ލިބިފައިވާ ހެކިތައް ހާމަކުރުމަށްވެސް ވަނީ އެދިފައެވެ. މީގެ އިތުރުން، ދޮގު މަޢުލޫމާތު ދިނުމާ ގުޅިގެން ފުލުހުން މަޢާފަށް އެދުމަށްވެސް މުޒާހަރާގެ ބައިވެރިން ވަނީ ގޮވާލާފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މި މައްސަލައިގައި އަވަސް ތަހުޤީގެއް ކުރިއަށް ގެންދިއުމަށް ކަމާބެހޭ އިދާރާތަކަށް އަންގަވާފައެވެ.
ހައްވާ ޔުމްނު ރަޝީދު ވެއްޓުނު މައްސަލަ ތަހުގީގުކުރަން ރައީސް ޑރ. މުއިއްޒު ހާއްސަ ރިޔާސީ ކޮމިޝަނެއް އުފެއްދެވީ މިދިޔަ އާދިއްތަ ދުވަހުއެވެ. އޭރު ކޮމިޝަންގައި ހިމެނެނީ ތިން މެމްބަރުންގެ ތެރެއިން ޑރ. މުހައްމަދު ހަބީބް ހޯމަދުވަހު ވަނީ ކޮމިޝަނުން އިސްތިއުފާދެއްވާފައެވެ. ޑރ. ހަބީބު އިސްތިއުފާދެއްވުމުން ރައީސް ޑރ. މުއިއްޒު މިވަނީ ކޮމިޝަނަށް ބަދަލު ގެންނަވާ އަލުން އެ ކޮމިޝަން އެކުލަވާލާފައެވެ. ކުރިން ކޮމިޝަންގައި ހުސް ފިރިހެނުން ތިބުމުން އަމާޒުވި ފާޑުކިޔުންތަކާއި ހެދި ކޮމިޝަން ބަދަލުކުރެއްވި އިރު އަންހެން މެމްބަރުންވެސް މި ފަހަރު ހިމަނުއްވާފަކަން ފާހަގަކުރެވެއެވެ.
