ކުރިއަށް އޮތް ރަމަޟާން މަހާ ދިމާކޮށް ވެރިކަން ކުރާ ޕީއެންސީން ރައްޔިތުންނަށް ބޮޑު މާހެފުމެއް މިރޭ ދީފައެވެ.
ޕީޕަލްސް ނެޝަނަލް ކޮންގްރެސް، ޕީއެންސީން ބޭއްވި މި މާހެފުމަކީ އެ ޕާޓީގެ އަންހެނުންގެ ހަރަކާތުގެ ފަރާތުން އިންތިޒާމްކޮށްގެން، މާލެ ސަރަޙައްދަށް ޚާއްސަކޮށްގެން ބޭއްވި މާހެފުމެކެވެ.
ޕީއެންސީގެ އިސްވެރިންނާއި އެ ޕާޓީގެ ގިނަ އަދަދެއްގެ މެމްބަރުން ބައިވެރިވި “މާހެފުން 2025” ކުރިއަށްދިޔައީ އާޓިފިޝަލް ބީޗު ސަރަހައްދުގައެވެ.
މާހެފުމުގައި ރައްޔިތުންގެ މަޖިލިހުގެ ރައީސް އަދި ޕީއެންސީގެ ޗެއާޕާސަން އަބްދުއްރަހީމް އަބްދުﷲ އާއި ސަރުކާރުގެ ބައެއް ވަޒީރުންނާއި ރައްޔިތުންގެ މަޖިލިހުގެ މެޖޯރިޓީ ލީޑަރު އަދި ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހިމް ފަލާހާއި ރައްޔިތުންގެ މަޖިލިހުގެ މެމްބަރުން ބައިވެރިވެވަޑައިގެންނެވިއެވެ. މީގެ އިތުރުން މާހެފުމުގައި ވަރަށް ގިނަ އަދަދެއްގެ ރައްޔިތުން ވެސް ބައިވެރިވިއެވެ.
މި ޙަފްލާގައި ހުރާ ދާއިރާގެ ޕީއެންސީގެ މެމްބަރު އަނާރާ ނަޢީމް ވިދާޅުވީ ރަމަޟާން މަހަކީ އެހެން މަސްތަކާއި އަޅާބަލާއިރު ގިނަ ސަވާބާއި ދަރުމަ ލިބޭ މަހެއް ކަމަށެވެ. އެހެންވެ، ކޮންމެ ދުވަހަކު ވެސް ހިފާ ރޯދަ އެންމެ ފުރިހަމަ ގޮތުގައި ހިފުން މުޙިއްމު ކަމުގައި އަނާރާ ވިދާޅުވިއެވެ.
މީގެ އިތުރުން އަނާރާގެ ވާހަކަފުޅުގައި ވަނީ މާހެފުމަކީގުޅުންތައް ބަދަހިކޮށް، އެކުވެރިކަން އާލާކުރުމުގެ މަޤްޞަދުގައި ޒަމާނުއްސުރެ އާއިލާތަކާއި، އެކުވެރިންގެ މެދުގައި އިންތިޒާމް ކުރަމުން އަންނަ ހަރަކާތެއްކަންވެސް ފާހަގަކުރައްވާފައެވެ.
އިނގުރައިދޫ ދާއިރާގެ މެމްބަރު އަދި ޕީއެންސީގެ ޕީޖީ ލީޑަރު ފަލާހް ވިދާޅުވީ ރަމަޟާން މަސް ދިވެހިންނާ ބައްދަލު ކުރާއިރު، ނޫސްތަކާއި ޓީވީތަކާއި ސޯޝަލް މީޑިއާ ފަދަ ތަންތަނުގައި ދޮގު ޚަބަރު ފެތުރުމާއި ފިތުނަ ފަސާދަ އުފެދޭ ވާހަކަތައް ދެއްކުން ހުއްޓާލަން ޖެހޭ ކަމަށެވެ. އަދި ހުރިހާ އެންމެން ވެސް ގައުމުގައި އޮތް ހަމަޖެހުމަށް އިސްކަން ދިނުމަށާއި ހަމަނުޖެހުން ނަގާލަން މަސައްކަތް ނުކުރަން ފަލާހް އެދިވަޑައިގެންނެވިއެވެ.
ޕީއެންސީއިން މިރޭ މާހެފުން ކުރިއަށް ގެންދިޔައިރު ރަމަޟާން މަހުގެ ކުރިން މާހެފުމަކީ ރާއްޖޭގެ ސަޤާފަތުގެ ތެރޭގައި އޮތް އިޖްތިމާޢީ އާދައެއްކަމަށާއި އެއީ ދީނީ އަޅުކަމެއްގެ ގޮތުން ކުރާ ކަމަކަށްނުވާތީ އެއީ ބިދުޢައަކަށް ނުވާނެކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސަޢީދު ވިދާޅުވިކަން ފާހަގަކޮށްލެވެއެވެ.
