ރާއްޖެއިން ބޫޓާނާއި ކުވޭތާއި ސްވިޓްޒަލޭންޑަށް ޢައްޔަންކުރަން ބޭނުންފުޅުވާ ނޮން-ރެޒިޑަންޓް ސަފީރުންގެ ނަންފުޅުތަށް ރައްޔިތުންގެ މަޖިލީހަށް ހުށަހަޅުއްވައިފިއެވެ.
މި މަޤާމުތަކަށް ޢައްޔަންކުރެއްވުމަށް ރައީސް ޑރ. މުޙައްމަދު މުޢިއްޒު ފޮނުއްވި ނަންފުޅުތައް ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ އިއްވަވައިފައެވެ.
މިގޮތުން ދިވެހިރާއްޖެއިން ބޫޓާނަށް ކަނޑައަޅުއްވާފައި ހުންނަވާ ނޮން-ރެސިޑަންޓް ސަފީރުގެ މަޤާމަށް ހުށަހަޅުއްވާފައިވަނީ މިހާރު ބަންގްލަދޭޝަނަށް ކަނޑައަޅުއްވާފައި ހުންނަވާ ސަފީރު، ސ. ހުޅުދޫ، އަސަރީގެ، ޝިއުނީން ރަޝީދުގެ ނަންފުޅެވެ.
ކުވޭތަށް ރާއްޖެއިން ކަނޑައަޅާ ނޮން-ރެސިޑަންޓް ސަފީރުގެ މަޤާމަށް ޢައްޔަންކުރެއްވުމަށް ފޮނުއްވީ މިހާރު ސަޢޫދީ ޢަރަބިއްޔާއަށް ކަނޑައަޅުއްވާފައިވާ ހުންނަވާ ސަފީރު، މ. ވެެސްޓްސައިޑް، އަޙްމަދު ސަރީރެވެ.
އަދި، ސްވިޓްޒަލަންޑަށް ރާއްޖެއިން ކަނޑައަޅުއްވާފައި ހުންނަވާ ނޮން-ރެސިޑަންޓް ސަފީރުގެ މަޤާމަށް ރައީސް ހުށަހެޅުއްވީ މިހާރު ޖެނީވާގައި ހުންނަ އެކުވެރި ދައުލަތްތަކުގެ މަރުކަޒުތަކަށް ރާއްޖެއިން ކަނޑައަޅުއްވާފައި ހުންނަވާ ދާއިމީ މަންދޫބު، ޑރ. ސަލްމާ ރަޝީދުގެ ނަންފުޅެވެ.
މި ތިން ބޭފުޅުންގެ ނަންފުޅުތައްވެސް ދިރާސާކުރުމަށް ވަނީ މަޖިލީހުގެ ޚާރިޖީ ގުޅުންތަކާ ބެހޭ ކޮމިޓީއަށް ފޮނުވައިފައެވެ. ރައީސް ޑރ. މުއިއްޒު މަޖިލީހަށް ފޮނުއްވި ސިޓީގައި މި ތިން ބޭފުޅުންނަށް ރުހުން ދިނުމާ މެދު މަޖިލީހަށް ފެނިވަޑައިގަންނަވާ ގޮތެއް އަންގަވައިދެއްވުމަށް ވަނީ އެދިވަޑައިގެންފައެވެ.
