ޤަޟާ ޤަދަރަށް އީމާންވާ މީހަކު އޭނާގެ ޙަޔާތް ހޭދަކުރާނީ ހިތްހަމަ ޖެހުމާއި އެކުގައި ކަމަށާއި، ފިތުނައިގެ ސަބަބުން އެފަދަ މީހަކު ގުޑުގުޑުއަޅައިގެން ނުދާނެ ކަމަށާއި އަދި ދަތި އުދަގޫ ކަމެއް ދިމާވުމުން އެފަދަ މީހަކު ބަލިކަށިވެގެން ނުދާނެ ކަމަށް މިއަދު ރާއްޖޭގައި ކުރި ހުކުރު ނަމާދުގެ ޚުތުބާގައި ވިދާޅުވެއްޖެއެވެ. މިއަދުގެ ޚުތުބާގެ މަޢުޟޫއު އަކީ “ ޤަޟާ ގަދަރަށް އީމާންވުން“ އެވެ. މިއަދުގެ ޚުތުބާގައި ވިދާޅުވީ ޤަޟާ ޤަދަރަށް އީމަންވުމަކީ އީމާން ކަމުގެ ރުކުނެއް ކަމަށާ ޤަޟާ ޤަދަރަށް އިންކާރުކޮށްފިނަމަ އޭނާގެ އީމާންކަން ފުރިހަމަ ނުވާނެ ކަމަށެވެ.
ޤަޟާ ޤަދަރަށް ނުވަތަ ހެޔޮ މިންވަރާ ނުބައި މިންވަރަށް އީމާންވުމުގައި ހަތަރު ކަމަކަށް އީމަންވާން ޖެހޭނެ ކަމަށް ވިދާޅުވިއެވެ. އެއީ ﷲ ސުބުހާނަހޫ ވަތަޢާލާ ހުރިހާ ކަމެއް ދެނެވޮޑިގެންވާނެ ކަމަށް އީމާން ވުމާއި، އައްލައުޙުލް މަޙްފޫޡުގައި ﷲ ސުބުހާނަހޫ ވަތަޢާލާ ހުރިހާ ކަމެއް ލިޔުއްވާފައި ވާކަމަށް އީމާންވުމާއި، ކޮންމެ ކަމެއްވެސް ހިނގަނީ ﷲގެ އިރާދަފުޅުން ކަމަށް އީމާންވުމާއި، ކައުނާ ކައުނުގައި ވާހާ ތަކެއްޗެއް ހެއްދެވީ ﷲ ސުބުހާނަހޫ ވަތަޢަލާކަމަށް އީމާންވުން ކަމުގައެވެ. މިހަތަރު ކަމަށް ތަފްޞީލީ ގޮތެއްގައި ޚުޠުބާގައި ބައްލަވާ ލައްވާފައި ވެއެވެ.
މާތްﷲ އެއްވެސް އަޅަކަށް ނުއުފުލޭވަރުގެ ތަކްލީފެއް ނުޖައްސަވާ ކަމަށާއި، އެކަލާންގެ އެއީ އެންމެ އަދުލުވެރި ރަސްކަލާންގެ ކަމަށާއި ، އެކަލާންގެ އެއްވެސް އަޅަކަށް އަނިޔާވެރިވެ ވޮޑިނުގަންނަވާނެ ކަމަށް މިއަދު ގެ ޚުޠުބާގައި ހަދާން ކޮށްދެއްވާފައި ވެއެވެ. އަހަރަމެން ދިމާވާ މުސީބާތްތަކުގައި އެންމެ ވަރުގަދަ ހަތިޔާރަކަށް ވާން ޖެހޭނީ ޤަޟާ ގަދަރަށް އީމާންވުމާއި ކެތްތެރިކަން އިސްކުރުން ކަން ފާހަގަ ކުރައްވަމުން ، އީމާން ކަމާއި ކެތްތެރިކަމުން ޙިމާޔަތް ލިބިގަންފިނަމަ ، ދުނިޔެ އާއި އާޚިރަތުގައި ހިސާބެއް ނެތި ދަރުމަ އާއި ޘަވާބު ދެއްވާނެ ކަމަށް މިއަދު ރާއްޖޭގައި މިސްކިތްތަކުގައި ކުރި ހުކުރު ނަމާދުގެ ހުޠުބާގައި އިމާމް ވިދާޅުވިއެވެ. މާތްﷲގެ ވަހީ ބަސްފުޅެއްގެ މާނަގައި ވަނީ“ ކެތްތެރިންނަށް އެއުރެންގެ ދަރުމަ ދެއްވާ ހުށިކަން ކަށަވަރީ ހިސާބެއް ނެތިއެވެ.“ ކަމަށް ހަދާންކޮށް ދެއްވާފައި ވެއެވެ.
