ރައްޔިތުން މަޖިލީހުގެ ވައިކަރަދޫ ދާއިރާގެ އެމްޑީޕީ މެމްބަރު ހުސައިން ޒިޔާދު (ފިއްޓޭ) ވެރިކަންކުރާ ޕީއެންސީއަށް، ވެއްދި މައްސަލައިގައި ދައުލަތުގެ އިދާރާތައް އޮތީ ހަނުކަމަށް އަލްއުސްތާޛް މުޙައްމަދު ނިޝާން އިބްރާހީމް ވިދާޅުވެއްޖެއެވެ.
ވަކީލު ނިޝާން މިގޮތަށް ވިދާޅުވެފައިވަނީ، ދިވެހި ރައްޔިތުންގެ ޑިމޮކްރަޓިކް ޕާޓީ، އެމްޑީޕީ އިން އިއްޔެ އެޕާޓީން ބޭއްވި ޤާނޫނީ ވަކީލުންގެޓީމުގެ ނޫސްވެރިންގެ ބައްދަލުވުމުގައެވެ.
ނޫސްވެރިންގެ ބައްދަލުވުމުގައި، ވަކީލު ނިޝާނުގެ މިކަމަށް ނުރުހުން ފާޅުކުރައްވަމުން ވިދާޅުވީ، އަސާސީ ހައްޤަކާއި ގުޅޭ މިފަދަ ބޮޑު ހާދިޘާއެއް ހިނގައިގެން އެކަމަށް އިހުތިޖާޖުކުރަމުންދާއިރުވެސް ދައުލަތުގެ އެޓާރނީޖެނެރަލްއާއި ޕްރޮސެކިއުޓާރ ޖެނެރަލްވެސް ހުންނަވަނީ ހަނުކަމަށެވެ.
މިކަމުގައި ޖިނާއީ ކަންކަން ހިމެނޭ ފަދަ ގޮތަކަށް ވާހަކަދައްކަވަމުން ވަކީލު ވިދާޅުވީ، ޖިނާއީ ކަންކަންމުގައި ދައުލަތަކީ ޕޮރޮސެކިއުޓަރ ޖެނެރަލްކަމަށާއި، މަދަނީ ކަންކަމުގައި ދައުލަތުގެ ވަކީލަކީ އެޓާރނީ ޖެނެރަލްކަމަށެވެ. މިއިދާރާތަކުން މިކަމުގައި ހަނުހުރުމަކީ މައްސަލައެއްކަމަށް ދެކޭކަމަށް ވަކީލު ފާހަގަކުރިއެވެ.
އިތުރަށް ނިޝާން ވިދާޅުވީ، މިމައްސަލައިގައި ރައީސުލް ޖުމްހޫރިއްޔާ ބަސްފުޅެއް ވިދާޅުނުވުމަކީ ކަންބޮޑުވާންޖެހޭ ކަމެއްކަމަށާއި، ޤާނޫނު އަސާސީއާއި ޤާނޫނުތައް ތަންފީޒުކުރުމަކީ ރައީސުލްޖުމްހޫރިއްޔާގެ ވާޖިބެއްކަމަށްވެސް ފާހަގަކުރިއެވެ.
މިމައްސަލައިގައި ހޯމްލޭންޑް މިނިސްޓަރ އިހުސާންގެ އިތުބާރުނެތްކަމުގެ މައްސަލަ މަޖިލީހަށް ވައްދާފައިވާކަން ފާހަގަކުރަމުން ވަކީލު ވިދާޅުވީ، މިއީ ވަޒީރު މަޤާމުން ދުރުކުރަންޖެހޭ ހާލަތެއްކަމަށެވެ. މި ނިއުސްކޮންފަރެންސްގައި މިކަމަށް އޮތް ނުރުހުން އެމްޑީޕީގެ ޤާނޫނީޓީމުގައި ހިމެނިވަޑައިގަންނަވާ ވަކީލުން ފާހަގަކުރެއްވިއެވެ.
އިދިކޮޅު މައި ޕާޓީ އެމްޑީޕީ އިން އަންނަނީ މި ޖަނަވަރީ 31 ވާ ހުކުރު ދުވަހު މާލޭ ސިޓީގައި ބޮޑު ހިނގާލުމެއް ބޭއްވުމަށް ތައްޔާރުވަމުންނެވެ. އަދި މިހިނގާލުމަށް ޕާޓީގެ މެމްބަރުންނާއި ސަޕޯޓަރުން ބައިވެރިކުރުމަށް މައުލޫމާތު ހިއްސާކުރުމަށް، ދޮރުންދޮރަށް މާލޭ، ވިލިމާލެ އަދި ހުޅުމާލޭގައި ހަރަކާތްތަކެއް ވެސް ދަނީ ހިންގަމުންނެވެ.
