ކޮޅުމަޑުލު ވިލުފުށީގެ މިސްކިތެއްގެ ތެރޭގައި ފިރިހެނުންނާއި އަންހެނުން ގުޅިގެން ކުޅިވަރު ކުޅުނު މައްސަލައެއް އިސްލާމިކް މިނިސްޓްރީން ބަލަން ފަށައިފިއެވެ.
އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ”އެކްސް“ގައި ކުރެއްވި ޕޯސްޓެއްގައި ވިދާޅުވީ މިސްކިތެއް ކަމަށް ބެލެވޭ ތަނެއްގައި މިސްކިތެއްގެ ގަދަރާއި އިހުތިރާމާ ނުގުޅޭ ކަންތައްތަކެއް ކުރާތަން ފެންނަ ވީޑިއޯގެ މައްސަލަ މިނިސްޓްރީގެ ސަމާލު ކަމަށް އައިސްފައިވާ ކަމަށެވެ.
“ މިއީ ކިހިނެއް ހިނގާފައިވާ ކަމެއްތޯ ބެލުމުގެ ކަންކަން މިނިސްޓްރީ އިން ވަނީ ފަށާފަ. މިސްކިތްތަކުގެ ހުރުމަތް ކަނޑާ ފަރާތްތަކަށް ދީނީ އެއްބައިވަންތަކަން ހިމާޔަތްކުރުމުގެ ގާނޫނާއި ގަވައިދުގެ ދަށުން ފިޔަވަޅު އަޅާނަން. އިންޝާ ﷲ.“ ޝަހީމް ވިދާޅުވިއެވެ.
ވިލުފުށީގެ މިސްކިތެއްގެ ތެރޭގައި ކުޅިވަރު ކުޅޭތަން އާންމުވެފައިވާ ވީޑިއޯއިން ފެންނަ ގޮތުގައި އެތަނުގައި އެ ހަރަކާތެއް ހިންގާފައި ވަނީ ބިދޭސީންނެވެ. އެ ވީޑިއޯގައި ފެން އަޅާ ތައްޓެއް ބޮލަށް ލައިގެން ދެ މީހަކު ރޭސް ޖަހާ މަންޒަރު ފެނެއެވެ. އެ ތަނުގައި އެ ވަގުތު ލަވަ ވެސް ޖަހާފައި ހުރެއެވެ.
އެ ހަރަކާތްތައް އެ މީހުން ކުރިއަށް ގެންދިޔަ އިރުގައި މާތްﷲ ގެ ކަލާމްފުޅާއި ގުރުއާނުގެ އެކި ކުރެހުންތައް އެ އިމާރާތުގެ ތެރޭގައި ހުރި މަންޒަރު ވެސް ވީޑިއޯއިން ފެނެއެވެ. އެނގިފައިވާ ގޮތުގައި އެ ހަރަކާތް ހިންގާފައިވާ ވިލިފުށީގެ މަސްޖިދުލް އުމަރު ފާރޫގްގެ ބޭސްމެންޓްގެ ތެރޭގައެވެ. އެމިސްކިތަކީ ނަމާދު ކުރާ މިސްކިތަށް ޚާއްޞަ ބައިގެ އިތުރުން ކޮންފަރެންސް ހޯލް ފަދަ ތަންތަން ހިމެނޭ ގޮތަށް އެއްފަހަރާ 2000މީހުންނަށް ދަތިނުވެ ނަމާދު ކުރެވޭ ގޮތަށް އިމާރާތް ކޮށްފައިވާ މިސްކިތކެވެ.
