މިފްކޯގެ ޗީފް ފައިނޭންޝަލް އޮފިސަރު( ސީއެފްއޯ) ގެ މަގާމުގައި ހުންނެވި އިލްޔާސް ހަނީފް އެ މަގާމުން އިސްތިއުފާދެއްވައިފިއެވެ. އެނގިފައިވާ ގޮތުގައި އިލްޔާސް ހަނީފު މަޤާމުން އިސްތިއުފާ ދެއްވާފައިވަނީ އަމިއްލަ ސަބަބުތަކަކާ ހުރެ މިދިޔަ މަހުގެ ފަހުކޮޅުގައެވެ.
މި ސަރުކާރުން އަންނަނީ މިފްކޯ ހަރުދަނާކުރުމަށް ވަރަށް ގިނަ މަސައްކަތްތަކެއް ކުރަމުންނެވެ. އެގޮތުން މިފްކޯގެ އާ ސީއީއޯއަކަށް ސްވިޓްޒަލެންޑުގެ ރައްޔިތެއް ކަމަށްވާ ޑރ. ވިޓާލީ ލުބިމޯވް ވަނީ އައްޔަނުކުރައްވާފައެވެ. މިފްކޯގެ ސީއީއޯގެ މަގާމު ހުސްވީ މި ސަރުކާރުން އެ މަގާމަށް އައްޔަންކުރި އަހުމަދު ސަމާހު ރަޝީދު ވަކިކުރަން ޕީސީބީން ނިންމުންނެވެ.
މިފްކޯގައި އޮތް ކޮރަޕްޝަން މުލުން ލުހެލައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިފަހުން ވަނީ ވިދާޅުވެފައެވެ. ރައީސުލްޖުމްހޫރިއްޔާ ވަނީ މަސްވެރިކަމުގެ ސިނާއަތް ކުރިއެރުވުމަށް ގިނަ މަސައްކަތްތަކެއް ކުރައްވަމުން ގެންދަވާކަމަށް ވިދާޅުވެ މި ސިނާޢަތަކީ އެންމެ ބޮޑު އާމްދަނީއެއް ލިބޭ ސިނާޢަތަށް ހެދޭނެކަމަށް ޤަބޫލުކުރައްވާކަމަށް ވިދާޅުވެފައެވެ. އަދި ފަތުރުވެރިކަން ކުރިއެރުވުމަށް ކުރާ މަސައްކަތް ނުހުއްޓި ކުރިއަށްދާނެކަން ފާހަގަކުރައްވާ އެމަނިކުފާނު ވިދާޅުވީ މަސްވެރިކަންވެސް ކުރިއަރުވައި ސިންދާފާތު ކުރާނެ ކަމަށެވެ.މަސްވެރިކަމުގެ ސިނާޢަތް ކުރިއަރުވައި ތަރައްޤީކުރުމަށް ކުރެވޭ މަސައްކަތަކަށް އަލިއަޅުވާލައްވަމުން އެމަނިކުފާނު ވަނީ ސަރުކާރުން މިފްކޯއަށް ގިނަ ބަދަލުތަކެއް ގެންނަމުންދާކަން ފާހަގަކުރައްވާފައެވެ. އެގޮތުން މިފްކޯގައި ތެރޭގައި ހުރި ޒަމާންވީ މައްސަލަތައް ހައްލު ކޮށްދެއްވާނެ ކަމަށް ވިދާޅުވިއެވެ.
މިފްކޯއަކީ ދިވެހިރާއްޖޭގެ މަސްވެރިކަމުގެ ދާއިރާގައި އެންމެ މުހިންމު ދައުރެއް އަދާކުރާ ކުންފުނިތަކުގެ ތެރެއިން އެއް ކުންފުންޏެވެ. މިފްކޯއަކީ 1993 ވަނަ އަހަރު އުފެދުނު، ސަރުކާރުގެ 100 އިންސައްތަ ހިއްސާ އޮންނަ ކުންފުންޏެކެވެ. މި ކުންފުނީގެ މައިގަނޑު މަޤްޞަދަކީ ދިވެހިރާއްޖޭގެ މަސްވެރިކަމުގެ ސިނާޢަތު ތަރައްޤީކޮށް، މަސްވެރިންނަށް ހަމައަގު ހޯދައިދިނުމެވެ.
