ބޮންޑެޑް ވެއާހައުސް ދެން ހިންގޭނީ ހަމަ އެކަނީ ”ކަސްޓަމްސްގެ ފުލް ކޮންޓްރޯލް“ އޮންނަ ސަރަހައްދުތަކުގައި ކަމުގައި ހޯމްލޭންޑް މިނިސްޓަރި އަލީ އިހުސާނު ވިދާޅުވެއްއެވެ.
މިނިސްޓަރު އިހުސާން މިހެންވިދާޅުވީ މިއަދު އެކްސް ގައި ހިއްސާކުރެއްވި ޕޯސްޓެއްގަ އެވެ. އެފޯސްޓަކީ ބޮންޑެޑް ވެއާހައުސް އެއްގައި ހުރި ގާތްގަނޑަކަށް 34،500 ކާޓޫނުގެ ސިނގިރޭޓް ގެއްލިފައިވާ ކަމަށް މިޑީއާއަކުން ރިޕޯޓްކޮށްފައިވާ މައްސަލައާއި ގުޅޭގޮތުން ކުރެއްވިފޯސްޓެކެވެ.
ހޯމްލޭންޑް މިނިސްޓަރު އަލީ އިހުސާން، ރަސްމީ އެކައުންޓުން ’އެކްސް‘ ގައި ކުރި ޕޯސްޓެއްގައި އިހުސާން ވިދާޅުވީ ޒަމާންތަކެއް ވަންދެން ބޮންޑެޑް ވެއާހައުސްތައް މާލޭގެ އެކި ގެތަކުގައި އަދި އެޕާޓްމަންޓްތަކުގައި ހިންގަމުން އައި ކަމަށާއި އެތަންތަނުގައި ދެ ތަޅު ހަރުކޮށްފައިވާ ކަމަށެވެ. އޭގެ ތެރެއން އެއްތަޅުގެ ތަޅުދަނޑި އޮންނަނީ ކަސްޓަމްސް އަތުގަ އެވެ.
މިނިސްޓަރު އިހުސާން ވިދާޅުވީ ސިނގިރޭޓްތަކެއް ގެއްލިފައިވާ ބޮންޑެޑް ވެއާހައުސް އަކީވެސް އެގޮތަށް ގެއެއްގައި ހަދާފައި ހުރި ތަނެއް ކަމަށެވެ.
ނަމަވެސް ވެރި ފަރާތުން ވެއާހައުސް ހިންގިތަން ދޫކޮށް އެތަނުގައި އެހެން މަސައްކަތެއް ކުރަމުން އަންނަ މައުލޫމާތު ކަސްޓަމްސްއަށް ލިބުމުން އެކަން ޔަގީންކޮށް, ވެއާހައުސްގައި ހުރި ކަމަށް ކަސްޓަމްސްގެ ރެކޯޑްތަކުން ދައްކާ މުދަލަށް ޑިއުޓީ ދެއްކުމަށް އަންގާފައިވާ ކަމަށް ވެސް އިހުސާން ވިދާޅުވި އެވެ.
އަދި އެގޮތަށް ގޭގެތަކުގައި ބޮންޑެޑް ވެއާހައުސް ހިންގުމަކީ ސަލާމަތީ ގޮތުން އަދި ކޮންޓްރޯލް ކުރުމަށް އެންމެ ރަނގަޅު ގޮތް ކަމަށް ނުފެންނާތީ ސަރުކާރުން ބޮންޑެޑް ވެއާހައުސް ދެން ހިންގޭނީ ހަމަ އެކަނީ ”ކަސްޓަސްގެ ފުލް ކޮންޓްރޯލް“ އޮންނަ ސަރަހައްދުތަކުގައި އެކަނި ކަމަށް ކަނޑައަޅައި އެ ސިޔާސަތު ތަންފީޒުކުރުން ފަށާފައިވާކަމަށް ވެސް މިނިސްޓަރު އިހުސާން ހިއްސާކުރެއްވިއެވެ.
މައުލޫމާތުލިބިގައިވާ ގޮތުގައި ގެއްލުން އެ ސިނގިރޭޓުތަކަށް އިމްޕޯޓު ޑިއުޓީ އާއި ރެވެނިއު ސްޓޭމްޕުގެ ގޮތުގައި ދައުލަތަށް 47 މިލިއަން ރުފިޔާ އަރަ އެވެ.
