އަމާންކަމާ ރައްކާތެރިކަން ކަށަވަރު މުޖުތަމަޢުއެއް ބިނާކުރުމަށް ފުލުހުން ކުރަމުންދާ ބުރަ މަސައްކަތަށް ކޮމިޝަނަރ އޮފް ޕޮލިސް ޢަލީ ޝުޖާއު ތަޢުރީފުކުރައްވައިފިއެވެ.
ފުލުހުންގެ ހަރަކާތް އިތުރުކުރުމަށް މިހާރު ފަށާފައިވާ މަސައްކަތާއި ގުޅޭގޮތުން ވާހަކަ ދައްކަވަމުން ސީޕީ ވިދާޅުވީ ފުލުހުންގެ ކިބައިން ފެނުނީ ރައްޔިތުންނަށް ޚިދުމަތް ކުރުމުގެ ލޯބި ކަމަށެވެ.
ފްރޮންޓްލައިންގަ މަސައްކަތް ކުރާ ފުލުހުން ގާތްގަނޑަކަށް 12 ގަޑި އިރު މަސައްކަތް ކުރާކަން ފާހަގަކުރައްވާ ސީޕީ ވަނީ ފުލުހުން މިވަގު ޤައުމަށް ވަނީ ވަރަށް ބޮޑު ގުރުބާނީއެއް ކަމަށް ވިދާޅުވެފައެވެ.
“ މިކުދިންގެ އާއިލާ އާއި އަދި ކުރަންޖެހޭ އެހެނިހެން ކަންތައްތައްވެސް ހުންނާނެ. ނަމަވެސް މީގެ ކުރިން ލިބުނު ވަރަށް ގިނަ ވަގުތުތަކެއް ހަމަ ރައްޔިތުންގެ ޚިދުމަތުގަ އެކުދިން ރައްޔިތުންގެ ކަންބޮޑުވުންތަކުގަ ރައްޔިތުންނާ އެކު އެ ހޭދަ ކުރަނީ. މި ފުރުސަތުގަ އަޅުގަނޑު މި މުއައްސަސާގެ އެންމެ އިސް މީހެއްގެ ހައިސިއްޔަތުން ދިވެހި ފުލުހުން ރައްޔިތުންގެ ހިމާޔަތާއި ރައްޔިތުންގެ ސަލާމަތަށްޓަކައި އެ ކުރައްވާ ބުރަ މަސައްކަތް ފާހަގަކޮށް ހުރިހާ ފުލުހުންނަށް ޝުކުރު ދަންނަވަން.“ ކޮމިޝަނަރ އޮފް ޕޮލިސް
ޓްރެއިނިންގ ހެދުމަށްޓަކައި 300އަށް ވުރެ ގިނަ ފުލުހުން އުޅެމުންދާ ދުވަސްވަރެއްގައި އެ ފުލުހުންގެ މަސައްކަތްވެސް މިވަގުތު ޑިއުޓީގަ އުޅޭ ފުލުހުން އަދާކުރައްވަމުންގެންދަވާ ކަމަށްވެސް ސީޕީގެ ވާހަކައިގައި ފާހަގަކުރެއްވިއެވެ.
ސީޕީ ވިދާޅުވީ މިވަގުތު ބުރަކޮށް މަސައްކަތް ކުރަން ޖެހުނުނަމަވެސް ޓްރެއިނިންގ ހަދަމުންދާ ފުލުހުން ޚިދުމަތަށް ނުކުތުމުން އާއިލާއެކީ ގިނަ ވަގުތު ހޭދަ ކުރުމުގެ ފުރުސަތު އެ ފުލުހުންނަށް ލިބޭނެ ކަމަށެވެ.
އަދި މިފަދަ ކޮންމެ ދަތި ވަގުތެއްގައި ފުލުހުން ހާމަކޮށްދެނީ ފުލުހުންގެ ޚިދުމަތުގެ ޚާއްސަކަން ކަމަށާއި ފުލުހުންނަކީ 24 ގަޑިއިރު ރައްޔިތުންގެ ސަލާމަތާއި ރައްކާތެރިކަމަށްޓަކައި ހޭލާ ތިބޭ ބައެއްކަން ސީޕީ ފާހާގަކުރެއްވިއެވެ.
ސީޕީ ވިދާޅުވީ މާލެ ސަރަޙައްދުގައި ހިނގާ އެކްސިޑެންޓްތައް އިތުރުވަމުން ދިއުމާގުޅިގެން މާލެ ސަރަޙައްދު ބެލެހެއްޓުމުގައި ޚާއްސަ ސިޔާސަތުތަކެއް ކަނޑައަޅާ ތަންފިޒުކުރަން ފަށާފައިވާ ކަމަށެވެ.
މިހާރު މަގުތަކުގައި ބާރުބޮޑުވާ ގަޑިތަކުގައި މާލޭގެ 21 ސަރަޙައްދެއްގައި ފުލުހުން ހަރަކާތްތެރިވަމުން ގެންދާކަން ސިޕީ ފާހަގަކުރެއްވިއެވެ.
މި މަސައްކަތްތައް މޮނިޓަރކޮށް ވިލަރެސް ކުރުމަށް ޒަމާނީ ކޮމިއުނިކޭޝަން ސެންޓަރެއް މާލެ އަދި ހުޅުމާލޭގައި މިހާރު ވަނީ ޤާއިމުކޮށްފައެވެ. ސީނިއާ ފުލުހުން މި ސެންޓަރުގައި 24 ގަޑިއިރު ޑިއުޓީ ކުރަމުން ގެންދާކަމަށް ސީޕީ ވިދާޅުވިއެވެ. މުޅި މާލޭގެ ސީސީޓީވީ ނިޒާމް މަރުކަޒީކޮށް، ކޮންޓްރޯލްކޮށް މޮނިޓަރ ކުރަމުން ގެންދާނީ މި ސެންޓަރުގައެވެ.
ފުލުހުން ހަރަކާތެރިވަމުންދާ ސީދާ ސަރަހައްދު އެ ސެންޓަރުން ވަގުތުން ބަލައިލެވޭނެއެވެ. އަދި ފުލުހުންގެ މަސައްކަތްތަކަށް ބޭނުންވާ މައުލޫމާތު ޓެކްނޮލޮޖީގެ އެހީގައި އެ ސެންޓަރުން ވަގުތުން އެއްކޮށް ވަގުތުން އެނަލައިޒްކުރަމުންދާނެއެވެ.
މީގެއިތުރުން ގޭންގު ކުށްތައް ހުއްޓުވުމަށް ޤާއިމުކުރި ވިންގާއެކު، މާލެއާއި ހުޅުމާލޭގައި ގޭންގުތައް ހަރަކާތްތެރިވާ ސަރަޙައްދުތައް، އެކަމަށް ޚާއްސަ ފުލުހުން ޤަވައިދުން ބަލަހައްޓަމުންދެއެވެ. އަދި ގޭންގު ކުށްތަކާ ދެކޮޅަށް ގިނަ މަސައްކަތްތަކެއް ކުރިއަށްގެންގޮސް ކުރިއެރުންތައް ހޯދަމުންދާ ކަމަށް ސީޕީ ވިދާޅުވިއެވެ.
ސީޕީ އަލީ ޝުޖާއު ވިދާޅުވީ، ރައްކާތެރިކަން ކަށަވަރުކުރުމަށް ކުރާ މަސައްކަތުގައި ފުލުހުންގެ ބައިވެރިވުން އިތުރުކޮށް، ރައްޔިތުންނަށް ރައްކާތެރިކަމުގެ އިޙުސާސުކޮށްދިނުމަކީ މިހާރު ކުރަމުންދާ މަސައްކަތްތަކުން ފުލުހުންގެ ޚިދުމަތުން ނެރެން ބޭނުންވާ އެންމެ މުހިންމު ނަތީޖާކަމަށެވެ.
