މިއަހަރު ނިމުމުގެ ކުރިން މާލެ ސަރަޙައްދުގެ ސަރުކާރުގެ ހޮސްޕިޓަލްތަކުގެ އޮޕަރޭޝަން ތިއޭޓަރުތަކުގެ އަދަދު 12 އަށް އިތުރުކުރެވޭނެކަމަށް ދަރުމަވަންތަ ހޮސްޕިޓަލްގެ ސީއީއޯ އިބްރާހީމް އަބްދުއްރައްޒާގު ޙަލީމް ވިދާޅުވެއްޖެއެވެ.
މީޑިއާއަށް ދިން އިންޓަވިއުއެއްގައި ވާހަކަދައްކަވަމުން ދަރުމަވަންތަ ހޮސްޕިޓަލްގެ ސީއީއޯ އިބްރާހީމް އަބްދުއްރައްޒާގު ޙަލީމް ވިދާޅުވީ މިވަގުތު އައިޖީއެމްއެޗްއާއި ދަރުމަވަންތަ ހޮސްޕިޓަލްގައި ޚިދުމަތް ދެމުން ގެންދަނީ 4 އޮޕަރޭޝަން ތިއޭޓަރުގައިކަމަށެވެ. ނަމަވެސް އައިޖީއެމްއެޗްގެ ބެޑް ކެޕޭސިޓީ އިތުރުވުމާއެކު އެ އަދަދު 8 އަރާނެކަމަށާއި މިއަހަރު ނިމުމުގެ ކުރިން މާލެ ސަރަހައްދުގައި ހުރި ސަރުކާރު ހޮސްޕިޓަލްތަކުގެ އޮޕަރޭޝަން ތިއޭޓަރގެ އަދަދު 12 އަށް އިތުރުކުރާނެކަމަށްވެސް އޭނާ ވިދާޅުވިއެވެ. މީގެއިތުރުން ހުޅުމާލޭގައި ބޮޑު އާބާދީއެއް އޮތް އިރުވެސް މިހާތަނަށް ހުޅުމާލެ ހޮސްޕިޓަލްގައި އައިސީޔޫއެއް ނެތްކަން އަބްދުއްރައްޒާގު ޙަލީމް ފާހަގަކުރެއްވިއެވެ.
އިބްރާހީމް އަބްދުއްރައްޒާގު ޙަލީމް ވިދާޅުވީ ހުޅުމާލެ ހޮސްޕިޓަލްގައިވެސް ވަރަށް ބޮޑެތި ޑިވެލޮޕްމަންޓްތަކެއް ކުރިޔަށް އެބަ އާދާކަމަށާއި ކުރިއަށް އޮތް މަދު ދުވަސްތަކުގެ ތެރޭގައި އެ މަޝްރޫޢުތައްވެސް ނިންމާ ޚިދުމަތް ދޭން ފެށޭނެކަމަށެވެ.
އޭނާ ވިދާޅުވީ ހުޅުމާލެ ހޮސްޕިޓަލް ތަރައްޤީ ކުރުމުގެ މަސައްކަތުގެ ތެރެއިން 4 އޮޕަރޭޝަން ތިއޭޓަރާއި 14 އެނދުގެ އެންއައިސީޔޫއަކާއި 10 އެނދުގެ އައިސީޔޫއެއް ތަރައްޤީކުރުމުގެ މަސައްކަތް ހިނގަމުން އަންނަކަމަށެވެ. އަދި މިއާއެކު އައިޖީއެމްއެޗަށް ބާރުބޮޑުވާ މައްސަލައަށް ހައްލެއް ލިބޭނެކަމަށް ވިދާޅުވިއެވެ.
އައިޖީއެމްއެޗްގެ ތަފާސް ހިސާބުތައް ދައްކާގޮތުން އިމަޖެންސީއާއި ޖެނެރަލް ޕްރެކްޓިސް ނުވަތަ އާންމު ބަލިތަކަށް ޑޮކްޓަރަށް ދެއްކުމަށް މީހުން ޒިޔާރަތްކޮށްފައިވާ އަދަދު އުޅެނީ 150،000 އަށްވުރެ މަތީގައެވެ. އައިޖީއެމްއެޗްގައި އަދި އޯޕީޑީ ކޮންސަލްޓޭޝާންގެ ހިދުމަތް ހޯދުމަށް މީހުން ޒިޔާރަތްކޮށްފައިވާ އަދަދު އުޅެނީ 240000 ގައެވެ. އަދި ހުޅުމާލެ ހޮސްޕިޓަލަށް ޑޮކްޓަރަށް ދެއްކުމަށް މީހުން ޒިޔާރަތްކޮށްފައިވާ އަދަދު އުޅެނީ 238،000 އަށްވުރެ މަތީގައެވެ.
އައިޖީއެމްއެޗްގެ ޚިދުމަތްތައް ލުއިފަސޭހަކޮށް، އަވަސްކޮށް ފޯރުކޮށްދިނުމަށް މުހިއްމު ބަދަލުތަކެއް ގެންނަމުންދާއިރު ސަރުކާރު ހޮސްޕިޓަލުތަކުގެ ކިއު ދިގުވެ، ޑޮކްޓަރަށް ދެއްކުމަށް ހޭދަވާ ވަގުތު ކުޑަކުރުމަށް މާލޭގެ 4 ސަރަޙައްދެއްގައި ސަރުކާރުގެ ޖެނެރަލް ޕްރެކްޓިސް (ޖީޕީ) ނުވަތަ އާއްމު ބަލިތަކަށް ފަރުވާ ދިނުމަށް ކްލިނިކްތަކެއް ޤާއިމްކުރުމުގެ މަސައްކަތްވެސް ވަނީ ފަށާފައެވެ.
