އިސްލާމީ ކަންތައްތަކާއި އައުޤާފާ ބެހޭ ވުޒާރާއިން ކޮންމެ އަހަރަކު ބާއްވަމުން ގެންދާ ”މަޢުރިފާ“ ފޮތް މައުރަޒު 2026 އޮކްޓޯބަރު 1 އިން 3 އަށް (ބުރާސްފަތި، ހުކުރު އަދި ހޮނިހިރު) އިސްލާމީ މަރުކަޒުގެ ޖަލްސާކުރާ މާލަމުގައި ހުޅުވައިފިއެވެ. . މި ފޮތް މައުރަޒު ކުރިއަށްދާނީ ކޮންމެ ދުވަހެއްގެ ހަވީރު 16:00 އިން 18:00 އަށް އަދި ރޭގަނޑު 20:00 އިން 22:00 އަށެވެ.
މި ފޮތް މައުރަޒުގައި ޖުމްލަ 22 ފަރާތަކުން ބައިވެރިވާނެ ކަމަށް އިސްލާމީ ކަންތައްތަކާ ބެހޭ ވުޒާރާއެއް ވިދާޅުވެއެވެ. މީގެތެރޭގައި ރާއްޖޭގެ ބޮޑެތި ބުކްޝޮޕްތަކުގެ އިތުރުން ޖަމްޢިއްޔާ ޖަމާޢަތްތަކާއި، މުވައްސަސާތަކާއި އަދި އަމިއްލަ ފޮތް ލިޔުންތެރިން ހިމެނެއެވެ. މި މައުރަޒުން ކުޑަކުދިންނަށް ޚާއްޞަ ވާހަކަފޮތްތަކާއި، ދިރާސާކުރާ ފަރާތްތަކަށް ބޭނުންވާ ފޮތްތަކާއި، ދިވެހިބަހަށް ޚާއްޞަ ޢިލްމީ ފޮތްތަކުގެ އިތުރުން ވެސް ގިނަ ކެޓަގަރީތަކެއްގެ ފޮތްތައް ގަންނަން ލިބޭނެއެވެ.
މިއަހަރު މުޅިން އަލަށް ކުރިއަށްގެންދާ ޚާއްޞަ ކަމެއްގެ ގޮތުން، ލިޔުންތެރިންގެ ތަޖުރިބާ ޙިއްޞާކުރުމަށް ޚާއްޞަ ”ކޯނާއެއް“ ބެހެއްޓުމަށް ވަނީ ހަމަޖެހިފައެވެ. މި ކޯނާ ޤާއިމުކުރުމުގެ މަޤްޞަދަކީ ލިޔުންތެރިން، އެބޭފުޅުންގެ ފޮތްތަކާބެހޭގޮތުން ތަޖުރިބާ ޙިއްޞާކުރުމާއެކު، ޒުވާން ޖީލު ލިޔުންތެރިކަމާއި ފޮތް ކިޔުމަށް ލޯބިޖެއްސުމެވެ. އަދި ޑޮކްޓަރ އާމާލް ޢަލީގެ ފޮތް ހުށަހެޅުއްވުން ވެސް މި ކޯނާގައި ކުރިއަށްދާނެއެވެ.
މީގެއިތުރުން، މިއަހަރު މައުރަޒަށް ޒިޔާރަތްކުރާ ފަރާތްތަކުގެ ތެރެއިން ގުރުއަތުން ހޮވޭ ނަސީބުވެރި ފަރާތަކަށް ކޮންމެ ދުވަހަކު 1,000 (އެއްހާސް) ރުފިޔާގެ ފައިސާގެ އިނާމެއް ލިބޭގޮތަށް ވަނީ ހަމަޖެހިފައެވެ. ގުރުއަތުލުން އޮންނާނީ ކޮންމެ ރެއެއްގެ 22:00 ގައި ކަމަށް އިސްލާމީ ކަންތައްތައްކާ ބެހޭ ވުޒާރާއެއް ވިދާޅުވެއެވެ.
މި ފޮތް މައުރަޒު އިފްތިތާޙު ކޮށްދެއްވާނީ، މިނިސްޓަރ އޮފް ސްޓޭޓް ފޮރ އިސްލާމިކް އެފެއާޒް އެންޑް އެންޑައުމަންޓްސް ޑޮކްޓަރ މޫސާ އަންވަރު ޙަސަނެވެ.
