އިއްޔެ ހެނދުނު 11:00 ހާއިރުން ފެށިގެން މެދުކެނޑުމެއް ނެތި ވެހުނު ވާރޭގައި މުޅި މާލެ އޮތީ ފެނު އަޑީގަ އެވެ. ގޭގެ އާއި ފިހާރަތަކަށް ފެން ވަދެ ބޮޑެތި ގެއްލުންތަކެއް ވުމުގެ އިތުރުން ފެނުގެ ސަބަބުން އެތައް ވެހިކަލަކަށް ވެސް ވަނީ ގެއްލުން ވެފަ އެވެ .
އެމްއެންޑީއެފުން ޕަމްޕުތައް ބަހައްޓައިގެން މާލޭގެ ހަ ސަރަހައްދަކުން ފެން ހިންދުމުގެ މަސައްކަތް ކުރަމުންދިޔައެވެ. އެމްއެންޑީއެފުން ބުނި ގޮތުގައި އިއްޔެ 11:37 ހާއިރުން ފެށިގެން އެމްއެންޑީއެފުން ފެން ހިންދުމުގެ މަސައްކަތް ދިޔައީ ކުރަމުންނެވެ. އަދި ރޭ 8:30 ހާއިރު އެ އޮޕަރޭޝަން ނިންމާލިއިރު 30،569 ޓަނުގެ ފެން މާލެއިން ހިންދާފައިވާ ކަމަށް ބުންޏެވެ. އެއީ 30 މިލިއަނަށް ވުރެ ގިނަ ލީޓަރުގެ ފެނެވެ .
ފެން ހިންދުމުގެ މަސައްކަތުގައި އެންމެ އިސްކޮށް އުޅުނީ ސިފައިންނެވެ. ސިފައިން ބުނީ، އެ މީހުން ފެން ހިންދުމުގެ މަސައްކަތްކުރި ރަށްރަށުގެ ތެރެއިން ގިނަ ރަށްތައް މިހާރު އާންމު ހާލަތަށް ގެނެވިފައިވާ ކަމަށެވެ .
ފާހަގަކޮށްލެވޭ ގޮތުގައި އިއްޔެ ކުރި ވިއްސާރައިގެ ސަބަބުން 36 ގެއެއްގެ 226 މީހަކަށް ވަގުތީ ބޯހިޔާވަހިކަމާއި ކާނާ ފޯރުކޮށްދީފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ އިން ވަނީ ބުނެފައެވެ .
އެމްއެންޑީއެފުން ހާމަކުރި މައުލޫމާތަށް ބަލާއިރު ފެން ހިންދުމަށް ހޭދަކުރި 20 ގަޑިއިރާއި 53 މިނެޓް ތެރޭ ކޮންމެ މިނެޓަކު ގާތްގަނޑަކަށް 24،397 ލީޓަރުގެ ފެން މާލެއިން ބޭރުކޮށްފައިވެ އެވެ .
ވަރަށް ގިނަ މަގުތަކުގައި އިއްޔެ ކަކުލުން މައްޗަށް ފެން ހެދިފައި އޮތެވެ. މިގޮތުން އެންމެ ބޮޑަށް ފެންބޮޑުވާ އެއް ސަރަހައްދުކަމަށްވާ މާފަންނު މަޖީދީމަގުގެ ފިހާރަތަކަށް ފެންވަދެ މުދަލަށް އެކިވަރުގެ ބޮޑެތި ގެއްލުންލިބިފައިވެއެވެ. އަދި މުހިންމު ލިޔެ ކިޔުންތައް ވަނީ ބޭނުން ނުކުރެވޭ ވަރަށް ހަލާކުވެފަކަމަށްވެސް އެފަރާތްތަކުން ބުނެއެވެ. އަދި ބައެއް ފިހާރަތަކަށް ފެން ވަނުމުގެ ސަބަބުން ވިޔަފާރިކުރުމަށް ދަތިވެ، ވިޔަފާރި ހުއްޓާލާފައިވެއެވެ. މިގޮތުން ފެން ނުހިނދި ލަސްވާން ފެށުމުން ރަސްފަންނާ ދިމާލުން މޫދަށް ކޯރެއް ކެނޑިއެވެ. މިގޮތުން މި ކޯރުކަނޑާފައި ވަނީ އާއްމުރައްޔިތުންކަން ފާހަގަކޮށްލެވެއެވެ.
މިކަން ހިނގިގޮތަށް ބަލާލާއިރު ފެންހިންދުމުގައި ލަސްތަކެއް ވާތީއެ އާއްމު ރައްޔިތުން ހާޑްވެއަރ ފިހާރައަކުން މަރުތޭލެއް ގެނެސް ރަސްފަންނާއި ދިމާލުން މޫދަށް ކޯރެއްކެނޑީއެވެ. އެފަރާތްތަކުން ނުރުހުންފާޅުކޮށް ސޯޝަލް މީޑިއާގައިވަނީ މިވީޑިއޯ ހިއްސާވެސްކޮށްފައެވެ.
ފިހާރަތަކުގެ އިތުރުން ގޭގެއަށް ފެން ވަދެ، ރޭގައި ނުނިދާ ހޭލާ ފެން ހިންދުމުގެ މަސައްކަތްކުރަން ތިބި ރައްޔިތުން ވެސް ވަކި މަދެއް ނޫނެވެ. ގާތްގަނޑަކަށް މާލޭގެ މާފަންނު ސަރަޙައްދުގެ ހުރިހާ ގެއަކަށް ވަނީ ފެންވަދެ، އެގޭގޭގައި ހިފާ ގެންގުޅޭ ސާމާނަށް ބޮޑެތި ގެއްލުންތަކެއްވެފައެވެ. ގެއްލުން ލިބުނު ފަރާތަކުން ފެނުގެ ސަބަބުން ނުނިދިގެން ނިދަން އެހެން ތަނަތަނަށް ދާން ޖެހުނުކަމަށްވެސް ބުންޏެވެ. އަދި ދިހަ ބާރަ ބުރިއަށްނަގާފައިވާ ބޮޑެތި އިމާރާތްތަކުގެ ލިފްޓަށް ފެންއެޅި ލިފްޓު އަނެއްދުވަހުވެސް ބޭނުންނުކުރެވޭކަމަށް އެސަރަހައްދުގައި އުޅޭ ފަރާތްތަކުން ބުނެއެވެ. އެންމެ ހައިރާންކަމެއް ގެނުވަނީ މިދޭތެރެއިން މަގުތަށް ހެދިއިރު މާފަންނު ހަވީރީމަގު ހެދިފަހުން އަދި ހަމަގައިމުވެސް ދެ ހަފްތާވެސް ނުވަނީސް މިކުރި ކުރިވިއްސާރައިގައި މިމަގުގަވެސް ކަކުލުން މައްޗަށް ފެން ހުރުމުންނެވެ.
ކޮންމެއަކަސް ގެތަކަށް ފެން ވަދެ، ގެއްލުންވުމުގެ ސަބަބުން ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ވަނީ މާލެއިން ހާލުގައި ޖެހުނު 36 ގެއެއްގެ 226 މީހަކަށް ވަގުތީ ބޯހިޔާވަހިކަމާއި ކެއުންބުއިމުގެ އެހީތެރިކަން ފޯރުކޮށްދީފަ އެވެ .
މީގެ އިތުރުން، ފެންބޮޑުވުމާއި ގުޅިގެން ވެހިކަލްތަކަށްވެސް ބޮޑެތި ގެއްލުންތައް ލިބިފައިވެއެވެ.
މާލޭގެ އިތުރުން، ވިއްސާރައިގައި އިތުރު އަށް ރަށަކަށް އެކިވަރުގެ ގެއްލުންތައް ވެފައިވެއެވެ. އެ ގޮތުން؛
ފ. ނިލަންދޫގެ 80 އިންސައްތައިގައި ފެންބޮޑުވި
ދ. ކުޑަހުވަދޫގެ 10 ވަރަކަށް ގެއަށް ގެއްލުން ލިބުނު
ދ. މީދޫގެ 10 ވަރަކަށް ގެއަށް ގެއްލުން ލިބުނު
ފ. މަގޫދޫގެ 9 ގެއަކަށް ގެއްލުން ލިބި އެއް ގެއިން މީހުން ހުސްކުރި
އދ. މާމިނގިލީގެ ހަތަރު ގެއަކަށް ބޮޑެތި ގެއްލުންތަކެއް ލިބުނު
ކ. ގުރައިދޫގެ 60 ގެއަކަށް އެކިވަރުގެ ގެއްލުން ލިބުނު
ފ. ފީއަލީގެ އެއް ގެއިން މީހުން ހުސްކުރި
ކ. ހިންމަފުށީގެ 60 އިންސައްތަ ގޭގައި ފެންބޮޑުވި
މި ވިއްސާރައިގައި ރ. އިނގުރައިދުއާއި ށ. ނަރުދުއަށް ވެސް އިއްޔެ އުދައަރައި ބޮޑެތި ގެއްލުންތަކެއްވިއެވެ.
މީގެ ކުރިން މެޓް އޮފީހުން އަންދާޒާ ކޮށްފައި އޮތީ ހޮނިހިރު ދުވަހުގެ ފަހުން މޫސުން ރަނގަޅުވާނެކަމަށެވެ .
ރާއްޖެއަށް ކުރަމުންދާ ވިއްސާރައަކީ މި ސަރަހައްދުގައި އުފެދިފައިވާ ކޮޅިގަނޑެއްގެ ސަބަބުން ކުރަމުންދާ ވިއްސާރައްކަމަށާއި ވިއްސާރަ އަލިވާނެކަމަށް ބެލެވެނީ ހޯމަ ދުވަހުގެ ފަހުން ކަމަށް މެޓު އޮފީހުން މިއަދު ބުނެފިއެވެ .
