ރީތި ދިގު އިސްތަށިގަނޑެއް ލިބުމީ ކޮންމެ އަންހެނެއްގެ ހުވަފެނެކެވެ. ހަމަގައިމުވެސް ސޯޝަލް މީޑިއާގެ ޕްލެޓްފޯމްތަކުގެ ތެރެއިން އިސްތަށިގަނޑު ރީތިކޮށް ދިގުކޮށް ބަހައްޓާނެ ގޮތްތަކާ ބެހޭގޮތުން ގުނާ ނުލެވޭ އަދަދަށް ވީޑިއޯތަކާއި ލިޔުންތައް ތިޔަފަރާތުންވެސް ހޯދައި ބަލާފައިވާނެކަން ކަށަވަރެވެ. އެކަމަކު އެހާ ގިނަ ވީޑިއޯތަކާއި އާރިޓިކަލްތަށް ބެލެނުއިރު އެތަނުން އިސްތަށިގަނޑު ރީތިކޮށް ދިގުކޮށް ބެހެއްޓުމަށް އެންމެ ރަނގަޅީ ކޮންކޮން ތެލެއްކަން ކޮބައިތޯ ޚިޔާރު ކުރަން އެނގޭނީ ކިހިނެއް ހެއްޔެވެ؟ ވަގުތު ބޭކާރުނުކޮށް މި ލިޔުން އަޅެ ކިޔާލަބަލާށެވެ.
މިއަދު އަޅުގަނޑު މި ބަލާލަނީ އިސްތަށިގަނޑު ރީތިކޮށް , ވަރުގަދަކޮށް ބެހެއްޓުމަށްޓަކައި ބޭނުންކުރެވިދާނެ ބައެއް ތެޔޮތަކަށެވެ.
ރީތި އިސްތަށިގަނޑަކަށް އެންމެ ރަނގަޅީ ކޮން ތެލެއް ހެއްޔެވެ؟
މިގޮތުން ފާހަގަކޮށްލެވޭ 3 ތެލެއް އެބަހުއްޓެވެ. ކޮންމެ ތެލެއްގައިވެސް ތަފާތު ފައިދާތަކެއް ހުރެއެވެ. މީގެން މިލިއްބައިދޭ ފައިދާތަކަށް ބަލާލަމާ ހިނގާށެވެ!
އާގަން އޮއިލް
އާގަން އޮއިލް އަކީ އިސްތަށިގަނޑު ބޯކޮށް ރީތިކޮށް ބެހެއްޓުމަށް އެންމެ ރަނގަޅު އެއް ތެލެވެ. އެއީ ޤަބޫލުކުރަން ދަތި ވަރުގެ ވިޓަމިން އީ އާއި ފެޓީ އެސިޑް އެކުލެވޭ އެއްޗަކަށް ވާތީ އެވެ. ވިޓަމިން އީ އަކީ ފްރީ ރެޑިކަލްސް އާއި ތިމާވެއްޓަށް ގެއްލުންދޭ ކަންތައްތަކުން އިސްތަށިގަނޑު ރައްކާތެރި ކުރުމަށް އެހީތެރިވެދޭ ވަރުގަދަ އެންޓިއޮކްސިޑެންޓެކެވެ.
އާގަން ތެލަކީ އަހަރެމެންގެ އިސްތަށިގަނޑު ރައްކާތެރިކޮށްދިނުމުގެ އިތުރުން ބޮލުގެ ހަންގަނޑަށްވެސް ވަރަށް ރަނގަޅު އެއްޗެކެވެ. އަދި އާގަން ތެލުގައި ހިމެނޭ ފެޓީ އެސިޑްތަކުގެ ސަބަބުން އިސްތަށިގަނޑުގެ އިލާސްޓިސިޓީ ރަނގަޅުކޮށްދޭއިރު، މިއީ އިސްތަށިގަނޑު ދެކަފިވެ އިސްތަށީގެ ކޮޅުތައް ހިކުމުންވެސް ރައްކާތެރިކޮށްދާ އެއްޗެކެވެ. ދިގު، ދުޅަހެޔޮ އިސްތަށިގަނޑެއް ހޯދުމަށް މަސައްކަތް ކުރާއިރު އިލާސްޓިސިޓީ ވަރަށް މުހިންމެވެ.
ކާށި ތެޔޮ
ކާށިތެލަކީ އިސްތަށިގަނޑު ބޯކޮށްބޭއްވުމަށް ރަނގަޅު ޗޮއިސްއެއް ކަމުގައި ވާއިރު، އެއީ އިސްތަށިގަނޑު އަނަރޫފަވެ ކުރަކިވުން ކުޑަކޮށްދީ އިސްތަށިގަނޑަށް އިތުރު ތެތްކަން ލިއްބައިދޭ އެއްޗެކެވެ. މިކަމުގެ ސަބަބުން އިސްތަށިގަނޑުގެ ސްޓްރެންޑްތައް ވަރުގަދަވެގެންދެއެވެ.
ކާށިތެލުގެ އެންމެ މުހިންމު އެއް ކަމަކީ ލޯރިކް އެސިޑެވެ. ލޯރިކް އެސިޑްގައި އެންޓިފަންގަލް ޕްރޮޕަޓީސް އެކުލެވިގެންވާއިރު، އެއީ އިސްތަށިގަނޑުގެ މައްސަލަތަކާއި ބޮލުގައި ހަންފޮޅުން ނުވަތަ ޑެންޑްރަފްފަދަ މައްސަލަތަކާ ދެކޮޅަށް ހަނގުރާމަކުރާ އެއްޗެކެވެ. އިސްތަށިގަނޑު ބެލެހެއްޓުމުގެ ރޫޓިންގައި ކާށިތެޔޮ ބޭނުންކުރާނަމަ އިސްތަށިގަނޑަށް ދިރުން ލިއްބައިދީ އިސްތަށިގަނޑު އޮމާންވެ ވިދުންގެނުވައެވެ.
ރޯޒްމެރީ އޮއިލް
މީގެކުރިން ރޯޒްމެރީ ތެލަށް މާބޮޑު ސަމާލުކަމެއް ނުލިބުނު ނަމަވެސް މިއީ މިހާރު ހަމަގައިމުވެސް ވަރަށްވެސް މަޤުބޫލުވެފައިވާ އެއްޗެކެވެ. އަހަރުމެން ދިވެހީންގެ ތެރޭގައިވެސް ރޯޒްމެރީ ތެލަކީ މިއަދު ވަރަށް މަޤުބޫލު އެއްޗެކެވެ. މިގޮތުން މިހާރު މާލޭގެ ގިނަ ކޮސްމެޓިކްސް ފިހާރަތަކުންވެސް ފަސޭހައިން ރޯޒްމެރީ އޮއިލް ލިބެން ހުރެއެވެ.
ރޯޒްމެރީ ތެލަކީ އިސްތަށިގަނޑު ފެޅުމަށް ބާރުއަޅާ އެއްޗެއްކަން ސައިންޓިފިކް ގޮތުން ސާބިތުވެފައިވެއެވެ. މާނައަކީ އިސްތަށި ފައިބާނަމަ ރޯޒްމެރީ ތެލަކީ އެންމެ ރަނގަޅު އެއް ތެލެވެ.
ކާށިތެލެކޭ އެއްފަދައިން، އިސްތަށިގަނޑު ދުޅަހެޔޮކޮށް ހެދިބޮޑުވުމަށް ކޮންމެހެން ބޭނުންވާ ވިޓަމިންސްތަށްވެސް ރޯޒްމެރީ އޮއިލްގައި އެކުލެވިގެންވެ އެވެ.
އެކަމަކު އެންމެ ޝައުގުވެރި އެއް ޕްރޮޕަޓީއަކީ މިއީ އިސްތަށިގަނޑު ނުރަވުމުން ދުރުކޮށްދޭ ތެލަކަށްވުމެވެ. އެއީ އިސްތަށިގަނޑުގައި ޑީއެޗްޓީ ކިޔާ ހޯރމޯނެއް އުފެއްދުން ހުއްޓުވާތީ އެވެ. ޑީއެޗްޓީ އަކީ ގިނަ ފަހަރަށް އިސްތަށިގަނޑު ތުނިވުމާއި އިސްތަށިގަނޑު ނުރަވުމާ ގުޅުން ހުރި އެއްޗެކެވެ.
ދުޅަހެޔޮ ރީތި ދިގު އިސްތަށިގަނޑެއް ބޭނުންނަމަ އަޅެ މިތަނުން ކޮންމެވެސް އެއް ތެލެއްގެ އަޖުމަ ބަލާލަމާ!
