’މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ގާނޫނު’ގެ ނަމުގައި ރައްޔިތުންގެ މަޖިލީހަށް ހުށަހަޅާފައި އޮތް ބިލު ބޭރުކުރާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވުމުން ނޫސްވެރިންގެ ދިފާއުގައި މަސައްކަތްކުރާ ބައިނަލްއަގުވާމީ ޖަމިއްޔާއެއް ކަމަށްވާ ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އޭޝިޔާއިން އެ ކަމަށް ޓަކައި ތަހުނިޔާ ކިޔައިފިއެވެ.
ރައީސުލްޖުމްހޫރިއްޔާގެ ކޮންޓްރޯލް އޮންނަ ކޮމިޝަނަކުން މީޑިއާތަކާއި ނޫސްވެރިން ޖޫރިމަނާކުރެވޭ ގޮތަށް ބަދަލު ކުރަން، މަޖިލީހުގެ އަމިއްލަ މެންބަރެއް ކަމަށްވާ ތުޅާދޫ ދާއިރާގެ މެންބަރު އަބްދުލްހަންނާނު އަބޫބަކުރު ވަނީ ބިލެއް ހުށަހަޅުއްވާފައެވެ.
އެ ބިލާ ގުޅިގެން ބައެއް ޖަމިއްޔާތަކުންނާއި ސަރުކާރާ އިދިކޮޅު ފަރާތްތަކުން ވަނީ ކަންބޮޑުވުން ފާޅުކޮށްފައެވެ.
މި ސަރުކާރަށް އަހަރުފުރުމާ ގުޅިގެން އާދިއްތަދުވަހުގެ ރޭ ސޯޝަލް ސެންޓަރުގައި ބޭއްވި ރަސްމިއްޔާތަށް ފަހު ރައީސް ވަނީ އެ ބިލް މަޖިލީހުން ބޭރުކުރާނެ ކަމުގެ ޔަގީންކަން ދެއްވައިފައެވެ.
މި ބިލުގެ ސަބަބުން ސަރުކާރުގެ އިދާރާތަކަށް ނޫސްވެރިންނާއި މީޑިއާތަކަށް ޖޫރިމަނާ ކުރުމާއި، ނޫސްވެރިކަމުގެ ލައިސަންސް ހިފެހެއްޓުމާއި، ނޫސްވެރިކަމަށް ހުރަސްއެޅުމުގެ ފުރުސަތު ދެވިގެންދާނެކަން ސީޕީޖޭއިން ވެސް ވަނީ ފާހަގަކޮށްފައެވެ.
އެހެން ކަމުން ގާނޫނު ހަދާ މަޖިލީހުން މި ބިލާ ގުޅޭގޮތުން ނޫސްވެރިންނާއި މުޖުތަމައުގެ މަޝްވަރާ ހޯދައި، ނޫސްވެރިކަމުގެ މިނިވަންކަން ލިބިދޭ މީޑިއާގެ އައު ބިލެއް ޑްރާފްޓު ކުރުމަށް އެ ޖަމިއްޔާއިންވަނީ ގޮވާލައިފައެވެ.
މި ބިލާ ގުޅިގެން ޖުޑީޝަލް ސާވިސް ކޮމިޝަނުގެ ކުރީގެ މެމްބަރު ޑރ. ޝަމްސުލް ފަލާހު ވެސް ވަނީ ނުރުހުން ފާޅު ކުރައްވައިފައެވެ. އަދި ސަރުކާރު ހިންގާ ޕީއެންސީގެ ސުޕަ މެޖޯރިޓީ މަޖިލީހުގައި އޮތްއިރު، އެއިން އެއްވެސް މެންބަރަކު މި ބިލާ ގުޅިގެން ކަންބޮޑުވުން ފާޅުކުރައްވާފައިނުވާތީ ފާޑުވިދާޅުވެފައިވެއެވެ.
މި ބިލާ ގުޅިގެން ކަންބޮޑުވުން ފާޅުކޮށް ނޫސްވެރިން އިސްނަގައިގެން ވަނީ ’ހަތަރެއް ހައްގުގައި‘ ނަމުގައި ކެންޕެއިނެއް ފަށާފައެވެ.
އެ ބިލާ ގުޅޭ ގޮތުން ހުރި ކަންބޮޑުވުންތައް ހިއްސާކުރަން އެ ކެންޕޭނުގައި އިސްކޮށް ހަރަކާތްތެރިވާ ނޫސްވެރިން ވަނީ އޭޖީ އުޝާމްއާއި ޔޫތު މިނިސްޓަރު އިބްރާހީމް ވަހީދުގެ އިތުރުން ރައީސް އޮފީހުގެ ކޮމިއުނިކޭޝަންސް މިނިސްޓަރު އިބްރާހީމް ޚަލީލާ ވެސް ބައްދަލުކޮށްފައެވެ.
އެ ބައްދަލުވުމުގައި އޭޖީ ދެއްވި ޔަގީންކަމަކީ ނޫސްވެރިކަން ހަނިވާފަދަ ކަމެއް ނުކުރައްވާނެ ކަމެވެ.
